公屋住戶想買樓上車，除咗以綠表抽居屋之外，其實仲可以以「零首期」、無額外嘅入息同資產限額，買入現居嘅公屋單位。如果認真比較交通、室外環境同配套設施等，究竟邊個屋邨先係真正嘅香港最正公屋呢？有網民就喺連登討論區提出咗心目中嘅「7大公屋王」，仲分析埋原因，不過其他網民似乎唔多同意……
樓主自己就率先選出心目中嘅7大最正屋邨，仲有分析埋各個屋邨嘅優缺點，排名不分先後：
1.廣福邨
優點：
1.行10分鐘就到地鐵站
2.附近大量巴士線去港九各地區
3.徒步去大埔超級城，有大量小店、食肆、連鎖店、超市
4.部份單位望到海，附近又有元州仔公園、大埔海濱，綠化夠，又有大草地。雖然大埔多工廠，但屋邨位置近海空氣唔差，係驚潮濕！
5.行十分幾鐘就有泳池，又有單車徑，好多嘢玩
6.Y型樓唔會樓望樓，通風好，樓宇密度還可
缺點：
1.係衰在屋邨無內園，環境都好公家feel
2.圍住屋邨就係河同橋，變相去邊都要經過橋先，落雨同曬就煩啲，樓宇內部嘅清潔程度6分左右
不過就有網民即刻質疑：「行十分鐘先到鐵都叫唔差，大把公屋樓下就係鐵！」、「大埔，笑X咗，新界有牛㗎喎！落後地區嚟㗎喎！」、「廣福邨咁X舊都公屋王？！」
有網民覺得廣福邨被河同橋圍住，如果雨天或夏天步行去市中心，其實都幾麻煩。
2.彩盈邨
優點：
1.地理位置好到爆燈，真真正正市區，去港九新界邊區都方便
2.天橋直駁落九龍灣地鐵站，7分鐘內行到，大雨都唔會濕
3.德福有大量巴士路線
4.有德福、淘大等大型商場
5.附近唔算極多食肆可以揀，但都應有盡有，食肆評分畀7.5分
6.近斧山道泳池，有戲院，自家商場一落去有超市
7.算係新落成唔算太耐，都好新淨，內觀清潔等都上佳
8.屋苑樓下有陽光照射嘅公園，基本上都小街客，落樓下唔會好多人，真正旺中帶靜
缺點：
1.去街市就遠咗啲
2.樓宇密度唔高，通風，但附近係主要道路，嘈音同空氣污染小不免
但就有網民唔多同意：「牛上牛下會唔會好啲？牛上高層樓可以望到海景！」
樓主認為由彩盈邨有天橋直駁落九龍灣地鐵站，德福又有大量巴士線，交通方便。
3.何文田邨
優點：
1.煙花景、旺中帶靜、去旺角等，10分鐘就到
2.勝在豪宅區、靚校網、有大學
3.多休憩地區、多球場、健身室、近泳池
4.但屋村算新淨，加分
5.風水好，但綠化差
缺點：
1.出咗地鐵站都要一段距離先返到屋企
2.近旺角同大公路空氣差
3.附近係旺角所以一定多老鼠
何文田邨所在校網好，係一大賣點。
4.竹園北邨
優點：
1.經黃大仙廣場同天橋駁住行，10分鐘左右就到地鐵站同龍翔道，大把巴士搭，加上屋苑樓下有巴士總站，交通算方便，加上黃大仙區，去邊都好方便
2.附近有鑽石山廣場同黃大仙中心，睇戲、購物，尚算方便
3.有屋村商場+街市，基本上生活百貨都齊
4.有內園，綠化比例高，Y型樓+樓宇密度唔高，唔近主要公路，因此空氣質素上佳
5.大部份單位可以望到山景/內園，唔會樓望樓，強如鳳德村甚至部份私樓都做唔到
6.邨內多球場，商場有康文健身室 行10分鐘到摩士泳池
7.屋苑內園有大型錦鯉魚池，好似叫錦鯉樂園，昔日港督曾放養幾十條日本名種錦鯉係池，依家好似話已經養到有過百條錦鯉，全港就算私樓內園都無邊個屋苑有咁大既錦鯉魚池
由竹園北邨行約10分鐘就可以到黃大仙港鐵站及商場。
5.勵德邨
優點：
1.豪宅級海景，傳統豪宅區，灣仔區內唯一公屋
2.當年嘅樓宇設計簡直無敵，合和咁嘅圓形設計，天然光同通風係全港數一數二
3.屋邨商場購物日常用品都足夠同好方便
4.行落去天后地鐵站只需10分鐘，附近有大量巴士搭去港九各地方
5.大坑都大把食肆，想要多種類或連鎖嘅，要落返英皇道果邊
6.如果唔係假期多人打卡，其實都小街客，都算幾清靜，居高臨下空氣十分清新，唔近公路無嘈音問題
7.有中央圖書館 附近有醫院，加分
缺點：
1.唯獨依家屋苑舊咗啲，加屋苑附近較舊
2.附近欠缺大型購物廣場，娛樂同休憩球場等欠奉，要落返英皇道先有
3.望山果邊有山景，但山景景觀略嫌唔夠美觀
不過網民回應：「勵德邨永一，有錢都買唔到」、「勵德只租不賣」。
6. 顯徑邨
優點：
1.今時唔同往日，有顯徑站開通，方便程度+100%，加上有巴士總站，去邊基本上都超方便，當然唔好同九龍灣黃大仙果啲比
2.屋苑有顯徑商場，超市生活百貨都齊
3.附近有醫院
4.臨近獅子山，附近唔係旺區同公路，空氣質素無得彈
缺點：
1.小遊客夠清靜 但又係衰左無大型廣場購物
7.蘇屋邨
優點：
1.市區樓一嚟就加咗分先啦！
2.重建後好新淨，去地鐵站真係幾分鐘就到，去旺角果啲更加係眨吓眼就到
3.附近都叫有個元州商場，買嘢都齊備
4.值得一提曾經英國皇室郡主係蘇屋邨種過櫻桃樹，皇室都植根係到證明無得頂！
缺點：
1.始終長沙灣深水埗比較污糟，會多老鼠
2.空氣差，多車多人
不過網民就反駁：「深水埗一大堆公屋配套超好喎！元洲邨、富昌邨呢堆又和諧式公屋又極近地鐵站+周邊超多商場食肆街市。」
華富邨隔離就係貝沙灣！
網民嘅心水正屋邨，當然唔止樓主提嗰7個：「一定係海富苑，要食嘢去大角咀大把；屋企煮餸，出旺角街市；濕平，奧海城，一係行出旺角，交通方便，旺角、奧運站去大埔、屯門，巴士一程。利申：我就係住海富！」、「油麗邨，近地鐵站，坐向啱有無敵海景，又係半山上面，下面除非填海，唔係都唔會有樓遮住！」、「禾輋邨特別係6座井字型，通風之餘景觀一流，樓下商場乜都有，全港十八區都可以巴士，轉最多一至兩程到」、「華富邨隔離貝沙灣」。
亦有人大讚房協嘅出租屋邨：「房協嗰幾幢乙類出租屋邨（駿發花園、寶石大廈、健康邨第一期）先正，一梯八伙、大堂企理，完全係公屋價錢、私樓享受。房協起啲樓，真係好過房委會多多聲」、「健康邨點睇？平時行過都唔覺得佢似公屋，交通又方便」。
港島南區老牌屋邨華富邨，出名風水好。
text/Joyce
photo/HKET圖片庫
=======
同場加映：
【蝸居睇樓團】鰂魚涌391呎溫馨新居 Tiffany Blue半開放式廚房、餐枱鞋櫃多功能組合櫃
」，
App內睇文同睇片可隨時捕捉U Fun彩蛋，
換領現金券及禮品！
↓【限時搶⚡】美獅鋒味搖滾美食節2024雙人電子門票！↓
↓ 呈獻超過20款特色環球創意料理 / 匯聚多位亞洲人氣歌手！↓
↓【限時搶⚡】moonwell尊貴花膠食療系列養生燉湯！↓
↓ 無添加、真材實料滋補養生燉湯！↓
