每次電視劇出現家族爭親之類嘅情節，我哋都會鬧劇情老土！但其實在現實中，即使唔係富豪家族，只要涉及公屋同居屋嘅業權，一樣都會有「爭產」嘅事發生。有網民就喺香港討論區出帖求救：「阿哥呃阿媽間公屋去抽居屋！」究竟詳情係點樣呢？
阿哥抽中居屋，阿媽會無家可歸？！
樓主嘅遭遇係咁樣：原來樓主嘅父母已離婚，樓主同父親同住，哥哥本來同母親同住，但事實上哥哥已搬走，並同女朋友住，公屋單位只剩母親獨居。而某日母親喊住致電樓主，話發現樓主哥哥借咗佢身份證去以綠表資格申請居屋，擔心萬一抽中，自己會無家可歸！
樓主表示阿哥一向「好不孝」，從來無畀家用，失業期間仲要阿媽供養佢同女友！懷疑阿哥係諗住將抽到嘅居屋單位，作為同女朋友結婚嘅新居，樓主出帖向網民求救：「有冇人可以畀下意見？依家都交咗表，萬一真係抽中，阿哥係咪可以瞞住阿媽做晒後面啲嘢？仲有剔名嗰度，佢係咪都可以瞞住阿媽去搞？我真係好迷茫，唔知點好……」
樓主擔心「不孝」阿哥用母親嘅名義抽中居屋後，新居會作為新婚居所，而交出公屋後嘅母親就會無家可歸。
只要阿媽唔簽紙，阿哥都無符？！
網民睇完樓主遭遇，有啲建議樓主即刻聯絡房署，甚至報警：「叫你媽寄封信去房署，表明情況意願，要求取消申請」、「綠表要經屋邨辦處理，打電話去叫停，最好寫埋信，話考慮過決定唔再申請」、「梗係報警啦！而家係你阿哥騙取使用他人身份證喎！」、「會唔會攞身份證去做擔保人借財仔先至真？」
有啲網民就認為即使萬一阿哥真係抽中居屋，只要阿媽唔出席揀樓或者簽紙，阿哥就唔可以「奸計得逞」：「份申請表要你阿媽簽名先申請到，你阿媽唔簽佢都入唔到表，除非你大佬冒簽」、「如果你阿媽係戶主，就算抽中咗，只要你阿媽唔去揀樓，都唔會收樓」、「呢個情況我問過做房署的朋友，佢話公屋有一欄係戶主，只要戶主係你媽個名，到時抽到居屋要辦手續，要戶主出席同簽名，即使行動不便都要見房署主任的，所以只要你媽到時拒絕就可以。同埋最緊要簽名前要問清楚職員，唔好聽你哥講係乜文件就照簽。」
好多網民就認為即使阿哥抽中居屋，只要樓主母親「企硬」，唔出席揀樓或簽署任何文件，阿哥亦應該無計可施。
去房署報定案，阻止出綠表資格許可證？！
但有網民就認為「唔好咁老定」，因為阿哥有機會係走去用綠表資格買未補地價二手居屋：「唔會係咁發生！樓主家人係申請綠表資格許可證，呢個房署通常都會一個月內批。問題係樓主阿哥話就話去抽居屋，其實仲可以去二手市場用綠表價錢買二手居屋，後者係有大把貨及地產經紀一條龍搞，天水圍三四百萬可以做9成按，仲可以寫你阿哥名，十拿九穩可換樓，成件事，係到間公屋還俾房署時，先要你媽簽個名。樓主可以帶你媽去房署報定案，阻止佢地出綠表資格許可證，如果出咗，就唯有報警，話懷疑有人盜用或偽做文件，留報案紀錄/時間，對日後上訴房署批唔批好大幫助。樓主要立即行動！
不過網民最擔心，係最後都係衰喺樓主母親心軟：「你哥如果知道你行動，就會用藉口，例如話將來會留間房俾阿媽，咁咁咁，你媽會心軟！」、「放心，如中咗你媽要再簽名，無得迫，但怕你媽心軟，幾年後又上東張西望，阿娟的故事下集姐！」
但有網民擔心，阿哥如果係攞母親嘅綠表資格去買未補地價二手居屋嘅話，就會好容易「奸計得逞」。
網民建議樓主及早向房署「報案」，阻止阿哥出綠表資格許可證。
text/Joyce
photo/HKET圖片庫
========
同場加映
【蝸居睇樓團】東涌250呎單身男型格蝸居|黑灰調Open Kitchen
」，
App內睇文同睇片可隨時捕捉U Fun彩蛋，
換領現金券及禮品！
【登記送🎁】L'OCCITANE 3款臻緻節日倒數日曆🎄！
↓一次帶走24件護膚、身體／頭髮護理及香水產品↓
↓【限時搶⚡】白燕NESTURE 必白美肌X烏黑生髮食療！↓
↓ 輕鬆回復素顏肌 / 同時減少白髮 ↓
