香港居住環境擠迫，不少人都深受鄰居噪音問題困擾，而且都似乎不易解決……有住公屋的網民就上連登討論區發帖，說鄰居每次假期前夕半夜一、兩點，就一定開枱打麻雀！十幾人之中有紋身漢，不單說話大聲，還要開窗大叫……樓主驚到不敢報警或報管理處，惟有向網民求救……大家又有甚麼解決方法？
報警肯定知係我！
網民都鼓勵樓主報警或報管理處：「你肯定十人以上就報警啦，兩枱麻雀以上已經可以入佢經營賭檔啦！」、「1823不停投訴，房署就會做嘢，拍片錄音做證據」、「可能係公屋賭檔，報埋房署收x埋間屋！」，但樓主表示：「報警肯定知係我！同埋警方會搵我錄口供！」。對於樓主無論如何都無勇氣報警或報管理處，網民都爆鬧：「你乜都驚一餐，人哋畀意見你又話咁咁咁……人地話唔會，你就話點點點……真係幫篤屎好過幫你條廢柴！」、「男人老狗你真係好X廢，我一個女仔都走上樓嘈嗰班男人，仲要樓上幾條佬揸電鑽大大隻，依家你喺屋企報警都唔敢，靠你真係死得！」。
樓主不敢報警或向管理處投訴，怕被鄰居「點相」！
試吓深夜剁肉餅、瘋狂幫佢叫外賣
既然樓主不敢報警，網民惟有提出各種「極具創意」的解決方案，包括一齊「參與」：「過去一齊打！」、「佢打親你就join，食佢糊食到佢唔敢打囉！」、「試吓喺窗門，但唔好畀佢哋望到嘅角度大叫，輸呀！」，但樓主好像擔心被「點相」：「我房個窗對住佢個廳，嘈到應一應！」，有網民就轉而建議：「攞望遠鏡睇佢哋啲牌，然之後大聲讀出嚟！」
有網民就覺得應該和鄰居「以毒攻毒」：「係佢打完瞓覺果陣，你開枱打麻雀」、「試吓深夜剁肉餅，應該好快解決到」、「淘寶震樓神器，當佢地打完麻雀就開機」、「試吓用蟲攻，班人知有蟲後就再唔會上嚟玩！」有網民建議：「瘋狂幫佢叫外賣！」，誰知樓主回應：「聽屋企人講，佢本身做餐飲業！」。亦有網民建議向鄰居獻出「關心」：「打牌最嘈都係洗牌，你買個自動麻雀枱，送個禮，應該會好好多！」誰知樓主回應：「最嘈係佢地啲笑聲！」，網民建議出撒手鐧：「你買間屋畀佢第度打，送個禮，應該會好好多！」
樓主房間個窗對住鄰居客廳，網民獻計：「攞望遠鏡睇佢哋啲牌，然之後大聲讀出嚟！」
有網民好有創意，建議樓主試吓深夜剁肉餅！
亦有網民建議瘋狂幫鄰居叫外賣，可惜鄰居本身都係從事飲食業……
如果眾多方法都不可行，網民建議出撒手鐧：「你買間屋畀佢哋喺第度打！」
text/Joyce
photo/HKET圖片庫
========
同場加映
【蝸居睇樓團】上門睇風水！龍師傅帶睇九龍城47年舊樓旺氣不再？鏡對睡床影響情緒+屋企太暗多病痛
」，
App內睇文同睇片可隨時捕捉U Fun彩蛋，
換領現金券及禮品！
↓【限時搶⚡】位元堂凍乾水果脆套裝！↓
↓ 冷凍乾燥技術鎖住濃濃果香！/ 保留營養素及豐富膳食纖維！↓
↓【必收藏】最新深圳食買玩攻略！↓
↓ 大灣區一小時生活圈！最新打卡熱點／熱門美食等！↓
