慳返半個月租代理佣金 租「免佣盤」有咩要注意？

要查冊、打釐、租約寫清楚責任

樓主發帖提問：「終於搵到免佣樓租，請問一般直接與業主deal嘅租樓手續程序係點嘅呢？作為租客有什麼可保障自己？」，隨即有唔少熱心網民回應解答，而眾多網民都提醒樓主記得要查冊、打釐印以及租約需要寫清楚：「正常業主，租客，用文具店買的租約已足夠，咪寫清楚包乜傢私電器，維修責任」、「有標準合約，網上下載或去文具舖買都得，最緊要係打釐印咁份租約先有効嘅，打釐印可以網上做都得」、「記得記得記得打釐印，另外就係業主查冊」。

有網民則認為要注意租盤係唔係凶宅：「打探清楚會否（是）凶宅」，而根據網上資料，查看單位是否凶宅則可透過瀏覽各大凶宅網、詢問地產代理以及參考銀行對單位的估價等方式。

另外亦有網民認為其實業主應為更擔心的一方：「咪玩，真業主驚租客多啲，你最緊要查冊佢係（咪）真業主」，並認為業主在合約處理方面會比租客更為謹慎：「（租約）業主會搞㗎啦，驚過你啦佢」！

有網民認為租「免佣樓」最緊要是查冊及在租約上打釐印，並需將租約內容寫清楚。

亦有網民認為要小心單位會唔會係凶宅。

究竟咩係查冊同打釐印？

查冊，即查閱土地紀錄，係土地註冊處所提供嘅其中一項服務，任何人都可以經土地註冊處查閱各地址嘅相關土地紀錄如業主資料、買賣合約、法定押記等，係租樓及買樓前應要做嘅事情之一。查冊可透過土地註冊處嘅「綜合註冊資訊系統」以網上方式進行，費用為10港元/次，亦可親自前往各個土地註冊處客戶服務中心以及新界查冊中心辦理。

打釐印，意思為將租約交予稅務局在其加蓋租約印花稅印花。在租客與業主簽定租約後，須向稅務局繳「釐印費」，即租約印花稅，而租約在繳完「釐印費」及打過釐印後才有具法律效力，在法律上，租約中所列明的條文才是正式生效的，從而保障雙方的利益。如不幸遇上業主不願意打釐印，租客亦可向稅務局單方面申請，亦具相同效力，唯租客需要獨自承擔所需費用。

租屋或買樓前，記得去土地註冊處查閱各地址嘅相關土地紀錄如業主資料、買賣合約、法定押記等。

租屋時記得將租約交予稅務局在其加蓋租約印花稅印花，即是打釐印。