香港嘅住屋問題持續難搞，好多人都覺得如果能抽中居屋，已經算係人生勝利組！但有住居屋嘅網民竟然喺連登討論區發帖，鬧政府嘅居屋設計有問題：「點解4人居屋只能間兩間房？」、「點解要逼人兄弟姊妹，一定要同」大家有無諗過呢個問題呢？係政府嘅錯？定係香港土地問題嘅錯呢？
夫婦一間房好合理 但點解要兄弟姊妹同房？
其實板主一家四口住居屋，某日板主同細妹嘈交，細妹走返入房（霸咗間房！），結果板主只能留喺廳，於是板主忍唔住發帖控訴；「公平咩？！香港政府係要搞到市民撕裂！家庭申請咁，默認夫婦兩個人一間房都好合理，但點解要逼人兄弟姊妹，一定要同房？你默認三房唔得？係要整啲嘢搞到人家嘈屋閉/家庭地位最低個個做廳長？」
網民嘅回應，比較實用嘅有：「在廳間多一間房」，比較「有創意」嘅建議，包括：「廁所可以瞓一個」，你搞錯喇！係男性一間，女性一間」。但有網民就咁樣理解居屋設計者嘅「苦心」：「因為預咗仔女大個，成年就搬出去嘛，仲黐住父母做乜」，但樓主完全唔同意：「佢預埋一定生兩個仔/兩個女呀？15/16（歲）未成年，又要兩兄妹屈蛇！」
板主認為公屋或居屋嘅3至4人單位，基本上只預間2間房，如果子女唔同性別，相當唔合理。
有網民建議其實可以喺廳間多一間房。
亦有網民講笑話若果屋企人太多，大可以搵一個去廁所瞓。
如果唔解決同家人嘅關係 間屋幾大都會嘈交！
見板主不斷放負，網民都開始轉口風：「叫老豆老母買私樓啦！利申：由細到大三兄弟同房」，「2-3人開放式都未出聲」，「鬼叫你同細妹唔融洽咩！你哋撈亂骨頭係你哋的事，而且你可以霸住廁所，同佢鬥過囉！」，終於有人指出問題核心，其實係板主同家人相處嘅問題：「你自己同個妹嘈，就將問題推到全世界！你同佢各自一間房又點？無將問題解決喎！有可能一世都唔出房咩？又或者如果你同佢都無房，咁就無問題，唔會嘈交咩？」，但樓主仍然唔承認問題所在：「就算我同我妹唔嘈，唔代表3-4人，默認兩間房依個弱智決定唔存在。」
但網民重槌糾正板主錯誤嘅諗法：「最終都係睇2個之間關係問題，融洽咪3、4個屈埋一間房都開心，唔融洽的話同屋唔同房都大把嘈交理由，爭廁所，爭廚房，出入時間，爭電視機，樣樣都可以嘈！你要解決的係你同你妹問題，唔係有幾多間房事。你同佢之間為乜嘈，有無和解方法，有冇妥協空間，有冇交換條件，呢啲先係解決。佢走左入房，你留係廳，同你走入房，佢留係廳都一樣無解決過問題呀，細路仔！」
有網民指出好多人幾兄弟，甚至全家住開放式單位，都未必有爭執。
網民鄭重指出問題所在，係板主同家人嘅相處問題，並唔係間屋有幾多間房。
text/Joyce
photo/HKET圖片庫
========
同場加映
【蝸居睇樓團】上門睇風水！龍師傅帶睇九龍城47年舊樓旺氣不再？鏡對睡床影響情緒+屋企太暗多病痛
」，
App內睇文同睇片可隨時捕捉U Fun彩蛋，
換領現金券及禮品！
↓【限時搶⚡】卡樂B粟一燒熱浪香辣味！↓
↓ 粟一燒結合熱浪，香辣惹味！↓
↓【限時搶⚡】卡樂B Jagabee茄汁味波浪薯條！↓
↓ 酸酸甜甜，香脆可口！↓
