根據房委會最新公布，截止3月底，一般公屋申請者嘅平均輪候公屋時間，升至新高嘅6.1年！因此好多人都話：如果你有間公屋，喺香港都算係個人生勝利組！不過好多公屋居民，都話自己住緊條邨好多問題，喺連登討論區，就有網民開帖，叫大家舉出心目中最劣質嘅公共屋邨！網民嘅反應，相當踴躍，大家嘅心水又係邊條邨呢？
石籬、石蔭、梨木樹邨 位置差又無啖好食
一開呢個話題，網友紛紛提名心目中嘅「地獄屋邨」：長貴邨、富亨邨、翠林邨、馬頭圍邨、沙田坳邨、柴灣興民邨、「慈雲山所有公屋」等等，都榜上有名。不過以下嘅屋邨，討論特別多。
原來葵涌區嘅屋邨，係一個重災區：「石籬、石蔭、梨木樹邨，位置差，又無啖好食，落葵芳又要搭車」，但有街坊立刻反駁：「石籬商場裝修後多左好多嘢食！唔錯啦！」，亦有網民認為安蔭邨先係「地獄」：「數得呢三寶，點可以漏咗安蔭邨？上面呢三個都起碼叫做到有個可以自給自足嘅商場，安蔭最近先叫有返間餐廳，成個商場丟空晒咁滯，街市又拆鬼埋；講交通，啲巴士一係就唔到，一係就兜晒成個區先返嚟總站！」、「安蔭一定係最差！大快活都執埋！」，葵涌另一個屋邨亦成為話題：「葵盛東邨，白卡多，斬人多，廢老多！」，但有街坊認為葵盛西邨更加差：「西仲垃圾過東！東起碼有升降機有電梯，西成個迷宮山咁，又舊，出入又煩！」
梨木樹邨、石籬邨及石蔭邨，被網民形容為交通不便兼無啖好食。
但網民話安蔭邨情況仲差，街市拆咗，商場差唔多空置。
網民又認為葵盛西邨不單舊，仲話好似個迷宮山咁唔方便。
山景邨如死城 長康邨曱甴周圍走
屯門都係另一個災區如屯門山景邨，網民形容為「死城咁」、「全港最臭公屋之一」、「有得賣都過半賣唔出」、「女仔住好X危險，正式山卡啦，荒山野嶺咁」!點知有屯門友就回應：「友愛邨仲衰，好污糟，成地曱甴！」亦有人重點提名青衣長康邨：「某幢樓淨係大堂已經一堆曱甴，牆/風扇/地下/lift門都有，入lift成日有曱甴陪埋你入去！出面㩒密碼位長期十幾隻看門口！附近又冇乜好嘢食！」
網民形容屯門山景邨猶如死城，仲係全港最臭公屋之一。
網民發現山景邨同友愛邨，自殺率都好高。
網民話青衣長康邨嘅曱甴超多，而當中的康美樓，前年亦因多個單位住客確診新冠肺炎而聞名。
劣評如潮5大新屋邨
樓齡高屋邨嘅死因，固然因為設施舊同污糟而評價差，但原來新屋邨，網民都劣評如潮！例如因為被政府用作檢疫中心而為人熟識嘅火炭駿洋邨，就被網民點名：「行去火炭站又遠，附近又工廠區，乜都無」，另一個位於觀塘安達臣道嘅安達邨亦有份，死因係：「多新移民、要落山、遲啲越嚟越多、根本唔夠配置」，但有網民立刻回應：「有邊個公屋邨唔係多新移民？」。
火炭駿洋邨被評為交通不便，周邊配套差。
網民亦嫌觀塘安達邨交通不便、新移民多及配套差。
至於以交通隔涉而聞名嘅粉嶺皇后山邨，當然亦有份，網民評為：「個個派到彈鐘！」，不過亦有網民諗法好正面：「個個星期去流水響行山夠方便！」、「窮人係短視！遲吓有鐵路一定搶手，好似日出康城咁！」。沙田水泉澳邨都「劣評如潮」：「水泉澳，大劣人大本營之一，四邊環山潮濕都x街，又陰，長期住對身體唔好，上山時間長過皇后山，配套差過皇后山」、「皇后山都唔算上山，水泉澳條大斜路，連車行都覺得辛苦」，唯一優點：「好處喺隣近沙田圍站」。
偏遠嘅粉嶺皇后山邨，以交通不便而馳名。
網民話位處山上嘅水泉澳邨，要行上山，環境又潮濕，相當唔好住。
但一講到東涌逸東邨，網民到達絕望地步：「一定係東涌逸東邨，人口最x多嘅大型公屋邨，講廢老同新移民同南亞裔多，無一條邨比佢多。地理位置偏僻，得架38可以出地鐵站，車程12分鐘到，但朝朝返工時間等車人龍極長，等車上車最少都搞你10分鐘，落雨更慘，夜晚返去班次鬆（疏），人又多，15分鐘先有車上仲耐過程車。」、「之前有間曱甴屋出名到上過東張西望，又有人開放屋企打麻雀抽水，好似拉咗！做呢啲人嘅鄰居，真係慘過食兩舊屎！」
網民認為東涌逸東邨，既人口多，地理位置又偏僻，情況差到幾近令人絕望。
逸東邨來回港鐵站都要搭巴士接駁，班次疏，相當不便。
text/Joyce
photo/HKET圖片庫
========
同場加映
【蝸居睇樓團】半山1,600呎望深水灣靚景豪宅！酒店級雲石浴室+美國胡桃原木吧台+水泥波浪天花
」，
App內睇文同睇片可隨時捕捉U Fun彩蛋，
換領現金券及禮品！
↓【送禮】送友邦嘉年華門票連代幣400套！↓
↓【送禮】送友邦嘉年華門票連代幣400套！↓
↓【限時搶⚡】Lactovital乳鐵蛋白咀嚼片！↓
↓ 助您健腸/改善消化系統 /提升免疫力 ↓
