租約完約業主唔肯退按金 網民熱討:租客應該要點做?
租屋嘅時候當然希望可以遇到一個好業主，但網上傳出遇上不良業主嘅事情卻多不勝數，最近就有網民喺連登討論區出帖求助，表示朋友租住業主盤(免佣盤)，即不經地產代理的協助下，租客與業主雙方自行交易的租盤，而當租約完約後，業主竟然唔肯退還按金，令佢不知所措，只好經樓主尋求網民意見，一眾網民都各出奇策，熱烈討論樓主朋友究竟可以點做！
瀨死唔走！ 住到應扣按金為止
對於遇上業主唔肯退還按金嘅情況，一開始有網民就建議樓主朋友同業主鬥「賴皮」：「咁咪換鎖，住多兩個月先囉，佢要搞收樓點都唔止兩個月，中途重(仲)可以幫佢裝修下添」、「唔退梗係唔搬走，住多兩個月先走，到時佢求返你轉頭」、「瀨死唔走，或者將間屋變到應扣按金狀態」，但樓主隨後表示朋友已經搬走：「完咗約，搬走咗，上唔返去...」，網民即對樓主朋友未收回按金就搬走大感驚訝，並認為其做法相當愚蠢：「唔退按金點解要交鎖匙？」、「蠢x到」、「傻的嗎，唔退按都俾番鎖匙佢？」
亦有網民提醒樓主朋友於下次租屋時應更加小心：「租落知個業主唔好嘅話最後2個月就咪交租啦」、「一定係要佢即場還按金先好交匙」、「叫朋友下次醒d上黎check屋先交匙，同時比返按金，而家再追佢都可以話你整爛乜整爛物所以唔退」
有網民建議用瀨死唔走等嘅「賴皮」方法應對。
樓主朋友在未收回按金下就搬走，網民提醒下次應先收按金後再交出單位。
經小額錢債審裁處追討！
有網民就建議採取法律途徑去追討按金：「入(稟)小額錢債咪得，反正已經有哂業主個名同地址同hkid」、「小額錢債搞搞佢？」、「我試過，結果我入左小額錢債追討」，樓主其後又補充原來朋友並沒有在租約上打釐印，導致小額錢債審裁處不會處理，網民都紛紛感到無奈：「咁真係無嘢幫到你朋友喎...唔打厘(釐)印不嬲誰大誰惡誰正確，你朋友仲要戇xx畀番條鎖匙人」、「唔打厘(釐)印又未收按金就還鎖匙，咩玩法黎？」、「當交學費啦，租車位或者個業主係朋友就話唔打啫」，亦有網民提醒應可以補打釐印，但另需付罰款：「好似可以補打返再追」、「(要)罰錢，好似至多罰10倍」
另外有網友認為租約沒有打釐印，其實業主可能本身都「身有屎」，或可以採用「攬炒」方法：「冇打stamp咁就好玩，多數業主可能係暗租，叫你朋友同業主講，唔退按金就報稅局(瞞稅)同金管局(高成數按揭但租俾人)」、「報稅局，佢唔打厘(釐)印九成無交稅」、「同稅局報懷疑業主無報租金收入」、「篤佢灰啦！」
網民建議樓主朋友可入稟小額錢債審裁處追討按金，不過先要去補打釐印。
有網民懷疑業主有可能瞞稅或違反按揭條約出租，建議樓主朋友將其舉報。
資料補充：咩係打釐印？
打釐印，意思為將租約交予稅務局加蓋租約印花稅印花。簽定租約後，租客與業主都須向稅務局繳「釐印費」，即租約印花稅，而租約在繳完「釐印費」及打過釐印後才有具法律效力，在法律上，租約中所列明的條文才是正式生效的，以達保障雙方的利益。如不幸遇上業主不願意打釐印，租客亦可向稅務局單方面申請，亦具同樣效力，唯租客需獨自承擔所有費用。
租屋後應把租約交予稅務局加蓋租約印花稅印花，即是打釐印，以保障自己的利益。
text/Jonathan
photo/HKET圖片庫
========
同場加映
【蝸居睇樓團】半山1,600呎望深水灣靚景豪宅！酒店級雲石浴室+美國胡桃原木吧台+水泥波浪天花
港生活人氣本地熱話
↓【限時搶⚡】勁賞⻁標SENSORIAL THERAPY精油乳液(薄荷)↓
↓舒爽呼吸，清新醒神｜舒緩壓力，提升專注力↓
全新功能《U GO》強勢登場🎉！
立即探索🔍本地熱門活動📍好去處🔔食玩買情報
