網民熱議:月入約4萬 兩夫婦一齊返工另請傭工好啲?定係其中一個辭職湊小朋友?

2022.06.09

香港好多女性都係working mama,所以好多家庭都有聘請外傭,據統計在今年3月底,香港的外籍傭工人數就達32.8萬!但對於雙職父母嚟講,究竟係應該請個工人姐姐好啲?定係夫婦其中一個辭職,親自湊返小朋友好啲呢?有網民就喺香港討論區發帖,詢問大家意見呀!結果「請工人」派同「自己湊」派大戰,啲觀點由「萬一有一個被炒魷魚,全家生活費點算」,到「請到個無責任感嘅姐姐,搞到細路差啲無命」都有,好有參考價值。

萬一家庭經濟支柱無咗份工,如何持續生計?
樓主講述自己嘅情況,話兩夫婦一個月入2萬幾、一個萬幾,而計過數,若果共係其中一個人工作,只要慳住使,其實都應該都夠基本生活開支。認為樓主應該要兩夫婦一齊工作,另請工人姐姐嘅網民,好認真為樓主計數,話萬一出嚟工作果位失業,就好大件事:「兩個加埋先揾3萬幾4萬,學人請工人??」、「要預計埋萬一無份工做,所以就應該請工人自己出嚟做嘢好啲」、「小朋友有父母照顧當然理想,但現在大社會經濟環境動盪,二萬幾+萬幾,呢類白領階層最易被裁,藍領你又認為,身體挨唔挨到廿多年到個細路大呢?萬一(其實已經好common),家庭一經濟支柱無咗份工,另一位在家的已經與職場斷層,再回找到工作的可能性十分低,如何持續生計?未有小朋友的,要慎重考慮;有小朋友的,現實不是你所想的」。

網民覺得萬一作為經濟支柱嗰一位被炒魷,家庭嘅財政狀況就會陷入困境。

更有網民更從心理角度去析,雙職夫婦其實有好處:「唔返工個人會好頹,一耐咗兩公婆一定會為咗『邊個辛苦啲』就成日嘈!」、「有幾多搵幾多,搵錢嘅日子唔長,而且30、40歲係打工仔收入嘅高峰期。咪信啲人講一定要自己湊仔,當你對住仔女時間一長,你就會相對無咁上心去湊,倒頭來你喺屋企咪又係捽手機……hea湊。教小朋友係貴精,唔係鬥時間長。有啲理論L成日話ftmum比較好,根本無視事實,有大把女律師女醫生女高官女banker ,佢哋無放棄事業,但仔女一樣成才,睇你點教嘅唧!」

有網民話,即使最初諗得好理想做全職母親照顧仔女,亦可能因此引發夫婦糾紛,或者時間一長,會變得無心機教仔女。

工人姐姐出街無拖住個女,差啲搞出人命!
不過就算想請工人姐姐,都唔係話咁易:「問題係:請個好工人,唔易,除非你畀到高人工……但咁就唔係你可以負擔到的。」有網民甚至舉出有姐姐湊小朋友不善嘅惡劣經驗:「見過個小朋友老豆老母好忙搵好多,個工人唔識中文唔識英文,個小朋友3歲都唔識講嘢!」、「當年我家姐請工人,覺得唔安心,所以有日佢下晝放假去睇吓個工人點照顧佢個女。結果發現個工人帶咗佢個女出街,當年佢個女5歲,工人竟然唔拖住佢個女隻手,結果佢個女走出馬路,差D無命。我家姐見到即刻衝上去捉住佢個女,然後叫工人即刻返屋企執齊嘢走。之後我家姐辭工自己照顧個女。」、「最近有同事因連請3個姐姐都出事,連小朋友都開聲話唔想姐姐照顧,希望佢辭工留家,最後決定放棄工作。」

有網民嘅家姐試過工人姐姐出街無拖住女兒,女兒幾乎走出馬路釀成意外。

網民都話好嘅工人姐姐唔易請,萬一請咗個差嘅姐姐,都真係寧願辭職自己湊。

小朋友長大係好需要愛,工人點會幫你教?
但亦有網民力撐唔好請姐姐,應該辭職自己湊小朋友:「細路係自己嘅,工人點會幫你教?更何況,工人唔係淨係俾人工,佢喺你屋企都要俾佢食,仲有保險同醫療呢,搵得少果個賺番嚟果萬幾蚊,扣埋工人洗費仲有幾多剩?」、「萬零蚊人工啫,自己湊好好多,小朋友長大係好需要愛、耐性、德智體群美的教育、仲有父母同小朋友嘅關係,呢d種種就算姐姐幾好都唔可以依賴佢,何況而家嘅姐姐質素都有好大落差添。」、「過來人,10年前有相同問題,選擇長工轉兼職,小朋友自己湊返,好在不用供樓交租,只靠2萬多生活。10年過去了,小朋友入了三大,感覺當初的犧牲是值得的,最近自己也轉回長工」。

好多網民又覺得小朋友成長好需要愛,以及家長嘅陪伴,辭職全職湊小朋友嘅回報,唔係用錢計得到。

text/Joyce
photo/HKET圖片庫
========
同場加映
【蝸居睇樓團】半山1,600呎望深水灣靚景豪宅!酒店級雲石浴室+美國胡桃原木吧台+水泥波浪天花

用App賺U Fun換獎賞!

會員登入U Lifestyle App即可領取
迎新禮遇 150

立即登入領取

↓【隆重登場】香港咖啡地圖2022!↓

↓即睇精選50間咖啡店(附評分及介紹)↓

即睇精選50間咖啡店(附評分及介紹)

↓「App限時搶」大派現金券/禮品↓

↓記得逢星期三3PM入App搶!↓

記得逢星期三3PM入App搶!

評語

相關文章