網民熱議：白居二單人組別抽中第一粒珠 都唔會有機會揀到樓？！
最新一期嘅居屋同白居二攪珠抽籤結果剛公布，有申請咗白居二單人組別嘅網民，滿心歡喜咁喺連登討論區發帖，問網友：「單人第一行第一粒，成數幾大？」點知網民嘅回應，都唔係幾睇好……仲話其實白居二，根本有伏，大家點睇呢？
有中籤者會嫌麻煩唔做資產審查 排名較後人士仍有機會
有網民好快就潑樓主冷水：「根本唔會到你揀到樓，利申：中過」，點解呢？「白居二4,500個quota，家庭：單人，9比1，即4,050家庭，450for單人。第一粒珠都可能超過450個單人申請者，所以啲人話單人中白居二首珠，都有可能落空」。
但亦有網民安慰樓主，其實會有唔少人會怕咗手續麻煩，樓主仍然有機會買到樓：「樓主你中第一粒珠，雖然係單人，但我相信房署都大機會寄信畀你做資格審查。好多人嫌麻煩同懶，唔交資料做審查，咁佢地嘅位就會順延留畀後面有做審查嘅人。如果收到審查做，點都做咗先，通過之後，房署會邀請你買批准信定資格證明書，好似要$700左右，咁基本上買得批准信都中彩㗎啦。再之後，房署就會邀請你購買『準買證』，有兩款，每款都係盛惠$700幾。一款是房署個款，另一款係房協。我當年都只是買咗房署嘅準買證，無買房協。拎到準買證，你可以去睇樓同賣家簽臨約買樓㗎啦」。網民仲補充話，可以同一時間申請晒房委會同房協兩邊既準買證，但最後只可以買一個單位。
有網民回應；「放心，實有你份，但白居二其實搵笨多，或者你有兩球野首期，不過好多人有兩球野都情願買私樓」，跟住網民熱烈討論嘅重點，反而係：白居二究竟係咪買得過？
網民話其實單人白居二，應該大約只得450個quota，如果第一粒珠都已經超過450個單人申請者，真係可能連揀樓都無機會。
但有網民話有好多人都嫌麻煩而唔交資產審查資料，等同放棄機會，所以叫樓主一定要放審查資料，仍有有揀樓機會。
白居二其實係雞肋 不如賣私樓好過！
網民力數白居二嘅缺點：「白居二雞肋嚟，想買舊啲，樓齡over25年嘅居屋，就要畀四成首期，平極樓價當350萬，你都要有140萬首期，有140萬首期，我做咩唔買私樓」、「你單人資產上限得85萬，與其點都要搵人幫手，我寧願買私樓，要套現都方便啲啦！」、「除非你幾確定住一世唔換樓，同埋將來唔會有需要套現，咁你就去啦！如果你有以上兩個考慮嘅話，我建議你都係諗清楚，你下手點買？」
但有網民反駁，：「但無350萬嘅私樓呢？！」，「你邊度搵300幾萬有400尺接近500尺單位嚟？你唔要大把人搶」。
有網民覺得如果買樓齡達25年嘅舊居屋，隨時要畀百幾萬首期，認為倒不如買私樓好過。
白居二勝在唔使按揭保險費同壓力測試
不過亦有已經買咗白居二嘅網民，分享心得：「我係前年白居二買家，畀你參考下，全部最多供25年，樓齡過咗20年做唔到9成按，但20年以下嗰堆都係天價，一定貴過銀行估價，等於俾業主賺你一兩球，21-24年樓齡要問銀行做到幾多成按（通常7-8成），樓齡25年以上必定做6成按，首期差唔多兩球。你重要考慮埋裝修費、電器傢俬，得幾十萬其實好少選擇」。
有網民好細心咁分析咗白居二比私樓優勝嘅地方：「樓齡新個啲居屋，叫價又真係好進取，想買二手居屋嘅中彩人士，不訪搵下啲20年樓齡左右嘅，未必做到925（即9成按揭，25年供款），但都做到920嘅，每月供款唔係話差好多。至於白居二VS私樓，白居二都有佢嘅好同唔好，例如：二手居屋唔洗按揭保險費，呢度都10幾萬架可能；第二：白居二有政府擔保，唔洗壓力測試（留意返房協樓係要壓力測試），第三：白居二相比私樓，呎價一定平啲，大西北地區可能300-400萬就買到500幾呎」。
有賣過白居二嘅網民分享，如果係樓齡達25年或以上嘅二手居屋，最多只可以做到6成按揭，所以最好選擇樓齡20年以下嘅屋苑。
網民亦分析，買白居二唔使過壓力測試，亦唔使畀按揭保險費，都係有優勝之處。
text/Joyce
photo/HKET圖片庫
========
同場加映
【蝸居睇樓團】師傅話你知！新居入伙前拜四角宜忌 +四類人忌拜祭
港生活人氣本地熱話
↓【限時搶⚡】Orca Skincare芭絲特貓神魔幻養肌蜜粉↓
↓櫻花粉色增添紅潤血色感｜蜜桃粉橙色提亮膚色↓
【寵主請留步】《社群》送您AQUA PRO+TECH「寵物護理入門套裝」🛁！
