好多香港人都好鍾意買衫，但又未必會成日執衣櫃或者捨得丟棄舊衫，結果個衣櫃不單亂，一開衣櫃門就好似山泥傾瀉咁……有位網民就喺香港討論區發帖，慨歎老婆霸佔衣櫃搞到災難級咁亂，好無奈咁問網民：「真係大部份女人個衣櫃都係咁？」，大家點睇呢？
樓主：講多兩講老婆又發我脾氣，講到佢啲衫係應份成條梅菜……
樓主好仔細咁講述佢同老婆嘅衣櫃爭位戰爭：「講好咗個衣櫃係一人一半，整整吓老婆用咗3分2空間，諗住冬天衫厚，老婆又成日買大褸，要掛起佢就一定會用多啲位。上星期六我哋真正換季，諗住我可以多返啲位可以擺衫褲，點知夏天衫老婆都會用到3分2位！之前啲T-shirt係好地地摺，而家就要捲捲捲，捲起啲衫先可以擺到我啲T-shirt……」
但樓主細心分析，其實個問題癥結，係老婆唔執衣櫃：「發現其實老婆唔係多衫，只係佢對於收納同埋佢摺衫摺得唔整齊所以要用多咗位，叫老婆執好個衣櫃，因為佢啲衫只係放咗兩日咋！一開衣櫃門，就好似山泥傾瀉咁跌晒落嚟！老婆話：咁你唔好開我嗰邊個櫃門咪冇事囉，又唔係你啲衫跌落嚟！講多兩講老婆又發我脾氣，講到佢啲衫係應份成條梅菜，我叫佢執或者想幫佢執返好係我多事……真係大部份女人個衣櫃都係咁？」
樓主慨歎本來同老婆講好個衣櫃一人用一半，結果不單老婆衣物霸咗2/3空間，仲係一開衣櫃門嘅衫就好似山泥傾瀉咁！
樓主細心分析，發現老婆嘅衫其實並唔算真係太多，只係因為老婆嘅摺衫同收納技巧太差，所以先攪到個衣櫃咁亂！
女網民：我一個人有個四呎半衣櫃，不過都唔夠位……
有網民提供好正常同實用嘅回應：「買多個衣櫃再上淘寶買抽真空袋！又可以順便執下個衣櫃！」，樓主就回應：「厚衫有抽真空放入紅白藍袋，而家夏天衫都多到咁先陰功……」，不過女網民嘅回應，傾向女人其實就係好多衫，男人想同女人爭衣櫃，都係唔使諗：「好正常！我都係女，衣櫃又係山泥傾瀉，最緊要衣櫃關到門，關埋衣櫃當乜都睇唔到，好憎人搞自己啲野，亂中有序！最好一人一個衣櫃，唔好搞她啲野，終有日忍唔住會執嘅……」、「睇到忍唔住笑，你地個衣櫃有幾大？？我一個人有個四呎半衣櫃，不過都唔夠位……D褸真係要掛起架嘛， 仲有D裙呀……買多個衣櫃囉！」
女網民普遍都表示：女人多衫同衣櫃亂，其實係好正常，建議樓主不如另買多個衣櫃。
男網民：老婆當間房係衣櫃，佢乾咗嘅衫就推埋一邊……
男網友就對樓主嘅遭遇，深表同情：「你已經好幸福啦，我成間屋有7成地方被我老婆擺滿晒野，佢淨係衫褲鞋襪起碼超過300件！」、「我屋企隻老虎都係，個人佔一個半櫃，但著黎著去永遠係果十零件」、「咁好呀有3分2？！我衹係分到1個櫃桶咋！你真係幸福！」、「女人唔算好（多）衫啦！我識一個女人，成廿年，無掉衫，每件衫都用獨立袋，佢話有超過一千件！」、「我屋企攞咗間房嚟晾衫，原本有晾衫架响廁所出便，依家唔用喇……老婆當間房係衣櫃，佢乾咗嘅衫就推埋一邊……我果D就收埋……都好嘅，都好整齊……」
呢個問題似乎都解決唔到，網民亦提出咗唔少得啖笑嘅創意提議：「換過個衣櫃或者老婆，叫佢選擇嘍！」、「買多間屋或一個倉」、「衣櫃亂先放咗個男人都唔覺」、「只能說你無用，因為有能力嘅男人，都會提供衣帽間畀老婆。衣帽間就係一間獨立房間，專門用嚟放衣服，通常300尺或以上，有5個高身衣櫃掛衫及2-3個鞋櫃。」
有男網民表示老婆直頭將成間房當衣櫃，乾咗嘅衫就放埋一邊……
有創意網民話：有能力嘅男人，係應該提供一個衣帽間畀老婆……
text/Joyce
photo/HKET圖片庫
========
同場加映
【蝸居睇樓團】專業驗樓主任教路！新樓檢收5大必驗位，立即睇：
」，
App內睇文同睇片可隨時捕捉U Fun彩蛋，
換領現金券及禮品！
↓【送機票✈️】分享旅行靚相 贏免費機票↓
↓ 請您免費飛轉日／韓／泰！↓
↓【必收藏】最新深圳食買玩攻略！↓
↓ 大灣區一小時生活圈！最新打卡熱點／熱門美食等！↓
