今期居屋嘅攪珠結果公布咗，但好多算係有份中籤嘅人士都好苦惱，因為其實未必有機會揀樓，或者即使有得揀，都唔會揀到心水嘅屋苑。有用綠表抽居屋嘅網民喺連登討論區發帖，話根據自己的編號，估計只有可能揀今期交通最唔方便嘅觀塘安秀苑同東涌裕雅苑，問網民應該揀邊個屋苑好！結果除咗有網民分析呢兩個屋苑的優缺點之外，仲有人勸樓主下期再抽過，點解呢？
安秀苑：交通不便、配套差、勁潮濕
有網民話揀安秀苑：「安秀苑，點都係市區」，但立刻有人反駁位處昔日安達臣道石礦場嘅安秀苑交通極不便，配套又差：「果度劃區喺西貢區，去觀塘最快都四個字」、「安達臣送都唔好要，無半個鐘都落唔到山」、「簡單，住安達安泰嘅人都X啲交通垃圾、每朝要排隊搭lift去巴士站/秀茂坪商場，安秀仲要再入啲」、「安達臣家陣未住晒人，返工放工時間上落觀塘已經塞爆，配套完全跟唔上」、「安秀係山打風又癲、凍又癲，勝在市區，配套要慢慢先有，或者要落返安泰」。
除咗交通，網民繼續數安秀苑嘅缺點：「安達臣潮濕天氣死硬，4部抽濕機都唔夠」，而石礦場背景都有壞影響：「安達臣前身好似係石礦場，唔好制……驚有氡氣」。
安秀苑所在地，前身係安達臣道石礦場。
網民話而家由安秀苑去觀塘至少20分鐘，而附近嘅配套設施極少，叫樓主三思。
裕雅苑：贏在有現樓、配套會好啲
另一批網民就揀東涌裕雅苑：「2個都唔方便 但東涌贏現樓」、「兩邊交通都差，民生配套東涌好些少，我投東涌一票」、「裕雅苑係正東涌站同將來東涌東站中間，唔算近地鐵，不過生活配套上，隨著區內人口增加，應該會好好多」，有網民就畀咗個總結：「簡單啲講：機場/中環一帶/新界西/九龍西返工：東涌；九龍東/港島東返工：安達臣」。
雖然交通唔太方便，但裕雅苑有機會喺今年底落成，好快有現樓入伙，係一大賣點。
有網民總結，話如果係喺機場、中環、新界西或者九龍西返工，都不妨考慮揀東涌裕雅苑。
公屋咁正，梗係揀到心水居屋先交返間屋出嚟啦！
但除咗比較呢兩個屋苑，仲有好多網民建議樓主反正而家住緊公屋，今次不如放棄，等下屆居屋再抽過：「綠表就緊係繼續住公屋直至抽到心水啦」、「公屋無得輸架wor，又唔係無地方住，除非你有特別原因必須想搬姐」、「咁依家都係大公屋轉細居屋，仲要山卡拉，年年keep住申請，賭運，過多幾年兩老變家有長者，到時市區大2房任選添喎……不過個個人屋企都唔同，冇得講，但正路嘅綠表，都係有正嘢先交公屋」。
甚至有網民覺得，其實公屋仲正過居屋：「公屋唔使煩，居屋啲差餉管理費全部唔關公屋事，一年淨係慳埋呢啲錢夠去旅行。又冇供樓壓力，賺嘅錢真係可以洗盡一分一毫，叫人拎居屋出嚟換公屋，我諗大把人想」，有網民立刻反駁，話居屋日後轉售，隨時賺夠錢買私樓：「南昌一過禁售放出去升DOUBLE，唔見你講！大把人咁玩，有首期，上私樓」，但網民反駁：「俾你賺到個首期啫，唔係賺到層私樓喎！你出返去買私樓仲要過壓測，條按揭數又大左，每個月供又吃力過居屋」。
有網民認為根本公屋租又平又唔使煩差餉之類，所以叫樓主如果唔係真係揀到心水屋苑同單位，唔好輕易買居屋交返間公屋出嚟。
text/Joyce
photo/HKET圖片庫
========
同場加映
【蝸居睇樓團】師傅話你知！新居入伙前拜四角宜忌 +四類人忌拜祭
」，
App內睇文同睇片可隨時捕捉U Fun彩蛋，
換領現金券及禮品！
【登記送🎁】L'OCCITANE 3款臻緻節日倒數日曆🎄！
↓一次帶走24件護膚、身體／頭髮護理及香水產品↓
↓【限時搶⚡】卡樂B粟一燒熱浪香辣味！↓
↓ 粟一燒結合熱浪，香辣惹味！↓
