7大「禾桿冚珍珠」二手居屋逐個數!邊5個屋苑有泳池?邊個有複式單位?

2022.06.27

居屋2022公布完攪珠結果,有人抽中新居屋,亦有人中白居二!雖然有人覺得樓齡偏高嘅二手居屋,其實有按揭年數短同日後難再轉手嘅問題,但事實係唔少舊居屋位置好、間隔實用,而且比起新樓,呎價嘅性價比高,用嚟自住,都真係諗得過!而且原來有7個屋苑「禾桿冚珍珠:有啲有戶外泳池,有啲係處於豪宅區嘅低密度住宅建築,有啲仲有極罕嘅複式單位……你又知唔知係邊啲居屋屋苑呢?

有室外泳池:1.九龍灣麗晶花園
1985年落成嘅九龍灣麗晶花園,共有22座住宅樓宇合共5,904個單位,單位面積介乎407至540平方呎,係當年香港最具規模嘅私人機構參與居屋計劃,但係原來屋苑係有唔少康樂設施,包括戶外泳池、網球場、籃球場、排球場、壁球場、羽毛球場、乒乓球室及兒童遊樂場等,現時二手呎價,大約$11,857至$15,725。

雖然已經有37年樓齡,但身為居屋麗晶花園,原來係有戶外泳池㗎!

屋苑內仲有網球場。

室外羽毛球場。

有室外泳池:2.馬鞍山富安花園
位於馬鞍山大水坑嘅富安花園,於1987年落成入伙,係馬鞍山區第一批入伙嘅私人參建居屋,優點除咗徒步約5分鐘就會到馬鐵大水坑站之外,原來都係極少數擁有室外泳池嘅居屋屋苑,此外仲有室內羽毛球場、籃球場、網球場、兒童遊樂場,第11座對出廣場仲設有卵石路步行徑,現時二手呎價,大約由$10,135至$12,947。

有35年樓齡嘅馬鞍山富安花園,唔單止有室外泳池,仲有室內羽毛球場。

有室外泳池:3.將軍澳寶盈花園
於2001年落成嘅將軍澳寶盈花園,都係私人參建居屋,唔講未必知道,原來寶盈花園係全港首個智能居屋屋苑,全部單位都設有入屋光纖,而屋苑亦自設內聯網,故此住戶可以與屋苑管理處互通訊息,查詢及租用場地等服務。而且呢個屋苑喺2016年,曾經出現一個3房單位以550萬成交,成為將軍澳居屋綠表市場成交價最高嘅屋苑,亦係新界區綠表市場成交價最高嘅屋苑之一。屋苑設有25米長戶外泳池,池邊仲有園景瀑布,屋苑另設有羽毛球場、籃球場、排球場、網球場、兒童遊樂場、燒烤場及緩跑徑等,現時二手呎價約由$13,367至$16,815。

將軍澳寶盈花園有戶外泳池、燒烤場及緩跑徑等,仲係全港首個智能居屋屋苑,亦曾經成為將軍澳居屋綠表市場成交價最高嘅屋苑。

有室外泳池:4.將軍澳康盛花園
於1989年1月入嘅將軍澳康盛花園,原來係將軍澳唯一一個唔係建於填海土地上嘅私人參建居屋,屋苑入面有個水深由0.9至3米嘅室外泳池,仲有網球場、籃球場、乒乓球枱,兒童遊樂場。現場二手呎價約由$9,338至$13,293。

將軍澳康盛花園不單有泳池,原來係將軍澳唯一一個唔係建於填海土地上嘅私人參建居屋。

有室外泳池:5.黃大仙翠竹花園
於1989年開始入伙嘅私人參建居屋黃大仙翠竹花園,原來都係有戶外泳池,乒乓球枱及卵石路步行徑等,如果想行山,原來屋苑第6座對開,設有小徑連接獅子山郊野公園及麥理浩徑,方便前往獅子山一帶。現時二手呎價約$9,128至$13,843。

黃大仙翠竹花園有戶外泳池之外,仲有小徑連接獅子山郊野公園及麥理浩徑,方便行山。

全港唯一複式單位:觀塘順緻苑
早於1979年開始落成入伙嘅觀塘順緻苑,原來不單係香港首個居屋屋苑,而家所有單位唔需要補地價,就可以喺公開市場自由轉讓,更係唔讓唔知嘅係:原來順緻苑係唯一一個設有頂層複式單位嘅居屋屋苑,而且極少放盤,根據地產公司記錄,複式單位面積約646呎,成交價約每呎$10,836。

香港首個居屋屋苑觀塘順緻苑,亦係唯一一個設有頂層複式單位嘅居屋屋苑。

海景豪宅區:赤柱龍德苑
赤柱乃係傳統豪宅地段,附近又係海灘同景點,但大家有無留意呢度其實都有低密度居屋呢?赤柱龍德苑只有四座,每座樓高由4層至10層高,合共只有984個單位,單位面積由280至830平方呎。除咗鄰近海邊環境靚,屋苑內仲有乒乓球枱、健體區及卵石路步行徑等設施,現時二手呎價約由$11,027至$17,078。

赤柱龍德苑只得4座,而且樓與樓之間有園林景,環境極好。

龍德苑徒步5分鐘之內,就會到赤柱名勝美利樓以及海傍大道。

text/Joyce
photo/HKET圖片庫

========
同場加映
【蝸居睇樓團】師傅話你知!新居入伙前拜四角宜忌 +四類人忌拜祭

用App賺U Fun換獎賞!

會員登入U Lifestyle App即可領取
迎新禮遇 150

立即登入領取

↓【隆重登場】香港咖啡地圖2022!↓

↓即睇精選50間咖啡店(附評分及介紹)↓

即睇精選50間咖啡店(附評分及介紹)

↓「App限時搶」大派禮品↓

↓記得逢星期三3PM入App搶!↓

記得逢星期三3PM入App搶!

評語

相關文章