網民熱討：月入得萬幾蚊 相同價錢下 揀共居定自己租樓好？

想識人、鍾意同人交流就揀共居
樓主表示自己月入只得一萬多啲，而共居同租屋同樣需5至6千左右嘅租金，唔知應該點揀好，並認為兩者都各有利弊：「共居又唔洗(使)經紀佣金，傢俬電器都全部包晒，租期又彈性啲，會有共享空間，可以同唔同人交流；但租屋就可以有更多私人空間，廁所廚房都唔洗(使)同人共用，但就要再洗(使)錢買傢俬電器，仲有水電煤等等好多嘅費用都未計」。

有網民就認為共居住宿可有助認識新朋友：「睇你目的想做乜啦，識人一定係共居，只求一宿咪租樓」、「(想)溝女溝仔， 共居啦！」、「共居多單身有知識既人，唔怕陌生人，如果你份工，或個人喜歡交流，係OK，後生唔怕試共居」、「共居喺外國好興，設備好裝修靚。又可以畀啲人social溝仔溝女」，亦有網民認為要睇樓主本身自己性格而定：「各有各優點缺點，睇睇自己性格係喜歡熱鬧還是要有自己私人空間」、「好睇你注唔注重私人空間」。

另外有網民就認為多專業人士會選擇共居，並分享自己共居的住宿感受：「一啲專業人士(會揀共居)，(因)回到家又有家嘅感覺，有人同你傾計，每個星期有人和你吃宵夜......約莫八至十個人(共住)，住得好舒服，住客方面大部分都係專業人士，所以我哋都好守規矩」。

有網民認為共居可與更多不同的人交流，有助社交。

有網民認為許多專業人士都會選擇共居，並以親身經驗表示住得舒服及住客們都會守規矩。

共居等於劏房？ 最怕遇到質素差、污糟嘅人？
意見亦非一面倒，有網民就認為租樓會比共居較好，並認為其實自住開支並沒有樓主想像中咁大：「一條友，水煤值得幾多錢？一個人住，唔一定需要太多電器的，共居，雖然傢俬電器都係共用，但唔一定俾你用到，要輪。如果位置差唔多，價錢差唔多，我諗唔到什麼理由，要選共居，都唔選獨立租樓。」，亦有網民擔心共居住客質素問題：「共居相對經濟，但要面對共居人的不同素質」、「共居，識埋D(啲)都係窮x及D(啲)無謂人。」、「共居遇到偷錢、唔肯搞衛生嘅、污糟、變態偷拍嘅好慘」

另外亦有網民認為共居其實等於住劏房：「專業人士住呢啲地方，好聽叫共居，正確叫裝修好少少嘅劏房，自己呃自己」、「十個八個人共用廁所……」、「共居，其實同分享一個單位係無異，我有個朋友住劏房，多多問題，有事就向我呻，做得劏房，個單位都啲舊樓無咩管理，環境一定麻麻，仲要定期加租，一牆之隔，可能食煙，可能有狗味。」

有網民擔心共居有可能會遇上質素差的住客。

亦有網民認為共居與住劏房無異，同樣有著環保及衛生問題。