大停電 冇Lift搭 要行20幾層樓梯 網民熱討：究竟住高層定低層好？

住低層出入方便 住太高冇安全感
樓主嘅經歷是咁的：樓主於事故當日放工回家後發現大廈停電，連Lift都冇得搭，只可以行樓梯返屋企，並表示因居住嘅單位位於20多樓，令佢要非常辛苦兼且行到腳軟才可返到屋企，過程中亦遇到其他同大廈嘅住客，有人更表示住喺50多樓，令樓主當刻為自己只係住喺20多樓感到慶幸，另外亦提及其父親因雙腳狀況不太好，行唔到咁多層樓梯，最後要等到凌晨三點多電力恢復後才能回家，所以在經歷是次事件後，就認為住低層單位較好：「所以話，住低啲，就算停電冇lift，都唔洗咁慘行咁多層樓梯。」

有網民就認同樓主說法，認為住低層單位確實有其好處：「住低層有低層著數，起碼你趕返工行樓梯都快過你住高層等Lift」、「(住)一樓最方便」，亦有網民認為住高層單位會冇安全感：「有危機感是人的習性，會住近地面！」、「住太高又真係無乜安全感，有咩大吉利是........米(咪)話唔驚」、「又係呀，低層出入行樓梯都得，走火(警)也方便添」、「除咗停電，仲有走火警，20樓以上的，真心唔好買」

而有網民則認為香港較少機會發生大停電，不需將其納入考慮因素：「有幾可大停電吖？」、「停電沒乜幾何(可)，唔駛因為咁而買低層」、「幾年唔停一次電，無必要為此考慮太多。」、「行吓會死麽(麼)？有幾可停電停咁耐？」

樓主因經歷停電後，認為住低層單位較好，有網民認同並表示住低層較有安全感及較方便。

有網民就認為早前大停電的情況實屬罕見，不需因此而考慮住低層單位。

低層又多蚊又嘈 爆屎渠慘情過停電
有一部分網民就唔認同樓主嘅睇法，並大數住低層單位嘅壞處：「住低層多廢氣、垃圾臭味、街外噪音、多蚊蟲……」、「我以前住低層，又多烏蠅，又多飛蟲，又廢氣，有人下面嘈交又聽到，係onX先會選擇低層，有幾何成日停電？」、「大停電有乜何(可)發生呀，但大渠渠塞就經常發生，一塞就係馬桶湧返出嚟，而且低層又多蚊又嘈，地下啲人講嘢大聲少少都聽得到」、「低層爆屎渠，慘情過停電，我選高層好過啦」、「低層嘈，空氣唔好，實用面積更細，如果唔係真係好低層可以行落地下，好多時滿lift入唔到……」，不過亦有網民反駁高層單位亦會受昆蟲滋擾：「我當年住40樓頂層，曱甴螞蟻一樣有，夏天曬住成間屋好似焗爐咁」

另外有網民就認為住高層單位會特別擔心打風：「香港住高層驚打風就真！有朋友住藍灣半島50+樓高海景房，逢趁打3號風球成棟樓就開始搖吓搖吓，次次打風都嗚嗚聲、彭彭聲，大風大雨成日滲水而唔敢返屋企……」，亦有網民認為若大廈只得一部Lift，住高層單位就特需別注意：「一部電梯果(嗰)d(啲)，買高層前自己試下行唔行到上去」、「曾經係(喺)一座洋樓住過一年，得一部lift，之前唔識，原來個個月都check/壞，賭(倒)垃圾時段又唔坐得，我住廿幾樓，最初坐lobby等吓，但慢慢(發)覺唔係辦法，我催眠自己，擋(當)運動行上去」

有網民認為低層單位有蚊蟲多、空氣差、噪音大等等的問題。

亦有網民提出住高層單位的缺點，如打風時會受到較大的影響。

text/Jonathan
photo/HKET圖片庫

========

同場加映

【蝸居睇樓團】土瓜灣納米樓變身屋主珍藏展示屋+建閣樓變工作空間