好多人做咗幾年嘢，都想搬出嚟同男/女朋友一齊住，不過budget有限，又唔想大家返工路程太遠，淨係揀地區都好頭痛！有網民就喺連登討論區發帖問網民意見：話搬出嚟住嘅租金budget係13-15K，最理想係九龍城區，若果揀舊樓，面積大啲但又怕多蛇蟲鼠蟻，如果揀新樓，又真係面積細兼間隔唔實用，大家認為應該點揀好呢？
樓主分享話暫時睇中嘅租盤，舊樓嗰個係約336呎，間隔四正、新裝2房，月租萬五蚊；新樓嗰個約270呎，1 房有露台，月租約萬四蚊，而家唔知點揀！樓主又話見翔龍灣好多放盤，問網友有無住過，可以分享吓心得，點知就有人回應：「五門歸心，仲有露台，大房要瞓上窗台，啲房細x到擺衣櫃得嚟，無位擺床頭櫃，搭船去北角返工就方便」，亦有網民提議其他地區：「啟德咁多平租新樓都唔睇吓！」、「將軍澳，康城，萬5有2房啦，變頻冷氣，會所，近鐵」，「沙田、大圍、油麻地，都有更好選擇」、「點解要九龍城區？15k budget係其他區大把選擇」、「住遠啲，可以平啲都有新啲又有房嘅樓」，樓主就回應點解想揀九龍城：「大家返工都方便啲！接受唔到住大西北，坐幾個鐘同人逼返工」。
樓主心目中想搵位於九龍城嘅租盤，因為比較方便返工。
樓主亦諗過搵翔龍灣，但住過嘅網友話房細窗台大又有露台，間隔唔實用。
租樓緊係揀新樓 住完返唔到轉頭
至於揀新樓好定舊樓好，有網民支持住新樓：「租新買舊」、「有新住新」、「租完新樓返唔到轉頭，個感覺差太遠」，「但新樓有會所又可能啱你後生仔，主要都係睇你想唔想用空間換其他嘢」、「租樓緊係新樓，最好搵啲新樓重貨供應區，租金又叫唔起，過兩年佢加租你就搵其他附近嘅新盤租，管理費業主食埋；租舊樓，個問題係啲家電設備舊得濟，驗收果下開得著，但用落先知有問題，例如冷氣唔夠凍，熱水爐供熱唔穩定，業主又未必肯同你換，整多一兩次大家都覺得大家煩」。
網民話新樓設備好又有會所，住過未必可以返轉頭住舊樓。
住舊樓嘅話，可能啲家電會容易壞，業主又未必肯換或者修理，到時租客都幾煩惱。
舊樓地方大啲 嘈交可以多間房避吓
但亦有好多網民支持揀舊樓，地方會比較見使，係主要原因：「新樓當然企理好多，不過一房冇乜空間擺嘢，如果你哋多衫褲鞋襪同埋多雜物（例如模型/收藏品/露營用品等等），咁就唔駛諗」，「舊樓啦！咁少筆直，太細真係住到人發癲！其實400呎兩個人住，都唔係幾夠，不過香港地無辦法啦！」、「寧願舊樓地方大啲，朋友上嚟都有位坐下玩下」，但估唔到網民連感情問題都有考慮到：「到有日嘈吓交，發現冇地方可避個吓，你會想多間房」。
有網民就講到大家最唔想面對嘅空間同錢嘅關係：「新樓一房200幾呎其實兩個人住問題不大，13k鬆啲應該有交易」、「係咪我離地，200幾呎住2個成年人，竟然有人話問題不大！」、「呢個收入學咩人有要求！」
不過其實實地睇樓視察環境，都係好重要：「新樓仲有多個露台其實仲細，就咁睇如果你可以預先去睇吓環境，乾淨企理舊樓好似仲好，不過都要睇隔離有冇麻煩友。」
新樓嘅問題係面積太細，如果樓主多雜物，或者成日邀請朋友上嚟玩，應該唔夠地方用。
有網民更加提醒：話如果單位得一間房或者太細，萬一嗌交，想搵個地方大家冷靜吓都無呀！
text/Joyce
photo/HKET圖片庫
========
同場加映
【蝸居睇樓團】師傅話你知！新居入伙前拜四角宜忌 +四類人忌拜祭
」，
App內睇文同睇片可隨時捕捉U Fun彩蛋，
換領現金券及禮品！
↓【限時搶⚡】The Big Bounce 電子門票！↓
↓ 全球最大充氣城堡/ Sport Slam體育狂熱/黑夜彈跳派對↓
↓【限時搶⚡】Canuxi Feathery薄荷綠3D立體防護口罩！↓
↓ 高透氣過濾層/ 不起毛不黏笠↓
