新屋入伙前又或者間屋住耐咗都難以避免需要裝修一下，但時不時都會喺網上見到有人哭訴搵裝修公司裝修完工中伏，如果想避免中伏又可以點做呢？最近就有網民喺連登討論區上分享心得，列出多個搵裝修公司進行裝修工程時所需要做嘅事項，以保障自己嘅利益，即睇網民認為點先可以防中伏啦！
1.上網搜查裝修公司嘅背景及評價
樓主表示自己屋企剛剛完成裝修工程，想向大家分享自己對於搵裝修公司進行家居裝修要注意啲咩，而第一步要做嘅就係於網上尋找裝修公司有冇不良嘅評價及記錄：「Google間野喺咪黑店，最基本要做嘅嘢，見住個氹都踩入去咁冇人幫到你。」
2.查看裝修公司有否曾做過類似單位嘅經驗
第二步為要搵有曾為類似格局單位進行裝修工程的公司：「(睇)間裝修公司有冇做過差唔多格局單位嘅經驗，去佢公司網睇下佢放出嚟晒命嘅成功例子，E.g如果佢有經驗做過和諧式，你間屋又係差唔多樣就可以搵佢報個價」
3.叫裝修公司提供平面圖
樓主認為如果裝修公司有做過類似單位嘅經驗而又有實力的話，即可提供到類似嘅平面圖：「我諗有好多人都會覺得次次報價都要上黎度尺好麻煩，其實根據2，如果佢做過差唔多嘅單位，佢又有料嘅，基本上佢可以即刻比到幅差唔多嘅圖你。你可以跟佢幅圖執，如果你自己設計師上身畫好晒圖，你都可以比幾十蚊R幅圖黎對比下。」
4.報價單需清楚列明每項收費及價錢
第4點為要求裝修公司寫清楚報價單當中嘅細節，大至傢俬價錢，小至裝修工人保險金額都要清楚列明：「首先要熟知報價單應該要有嘅嘢，而唔係一句50萬全包乜x都冇，傢俬尺尺價、傢俬平面圖、傢俬色碼、假天花、新追窗、淋浴屏、執漏限期、保養限期、裝修佬保險幾錢、有冇電工牌etc不能盡錄，總之你裝修有啲乜都要寫x晒入去，包括不限於長闊高，價錢，牌子，有冇連工包料，定係戶主自購」
5.最少分開4期交裝修費用
關於支付裝修費用方面，樓主就建議要最少分開4期交，並需每完成一個工程才付款：「分期(付款)，最少四期係基本，每做完一個工程收貨比錢，再接下個，唔收貨、裝修佬玩野，直接唱臭佢再搵人接手，千其唔好格硬比佢做落去，比人拆x晒爛尾都可以輸少當贏」
6.最少每兩日就要監工，每次都要影相
樓主認為最少每兩日就要觀察裝修情況及需影相以作保障，而當日若為重要工程就必定要監工：「每日/每兩日睇一次情況係基本，每次影相都係基本，知道師傅開工做重要野，e.g泥水、防水、地台，必須監工」
7.上YouTube睇片了解每項裝修工程大概流程
在監工方面，樓主就補充話若果唔了解該工程大概應該點做的話，監工就會失去意思，所以應該要喺YouTube上搵相關嘅影片去學習每項裝修工程大概嘅流程：「監工你唔知佢做岩做錯，其實係冇意思。上YouTube睇晒報價單入面所有工程係點做，唔識落手都要識睇。好似防水咁，佢做到膝頭哥咁高，你係咪又收貨？油左得一層防水，你係咪又收貨？砌完地下冇地腳線你又會唔會留意到？」
8.防水工程一定要監工及親自試驗
最後一點要注意嘅地方就係防水工程，樓主認為防水為裝修工程當中最重要嘅一項，必須要監工及完工後要自己再三試驗清楚：「唔該請假去監工，完工自己試水，拎個花灑射翻幾個鐘。全屋嘅野伏晒，都唔會夠你伏個防水咁麻煩。」
9.網民補充：唔好貪平 搵老店最穩陣
另外有網民就補充搵人裝修切忌貪平：「簡單講，一個師傅人工就點都1500蚊日，你裝得修點都要做翻70至90日，仲要有時唔係得一個師傅開工，條數咪自己乘，報你十零萬全包個啲，唔通打手真係但求打個和咩」，亦有網民認為搵老字號嘅裝修公司就最穩陣：「如果公屋，真係樓下商場做咗十幾廿年間舖最穩陣，不過就唔好要求手工好靚，設計新穎，花巧嘢」
」，
App內睇文同睇片可隨時捕捉U Fun彩蛋，
換領現金券及禮品！
↓【聖誕送您🎅】 Gourami 時尚運動套裝連HKD 100 現金券↓
↓新一季主打簡約精緻設計短款背心🧘時尚又實用 ↓
【聖誕送禮🎄】《社群》x wwwtc mall聖誕驚喜4重賞！
↓送您人氣下午茶套餐及禮品套裝↓
