網民熱議:屋企完全唔用煤氣,全屋只用電力係咪可行?!

2022.07.11

煤氣都可以話係家居生活不可缺少的「能源」……不過有獨居網民就喺連登討論區發帖,話自己平時煮食用開蒸焗爐、氣炸鍋同微波爐等,之前用過煤氣爐頭,都只係炒吓飯煎隻蛋;即使沖涼,冬天基本上五分鐘內可以完成……於是就考慮緊係咪可以完全唔用煤氣,大家認為係咪可行呢?

沖涼唔用煤氣等於玩死自己?!
有網民問其實用電同煤氣,邊樣平啲?樓主話:「咁一定用電平過煤氣(煮食計),我試過有兩個月完全無用煤氣煮嘢食,但照樣用煤氣沖涼,張單係明顯比以前,咩都用煤氣煮嘢食,係平一半以上」。煤氣主要都係用喺熱水爐同煮食方面,對於前者,樓主就話屋企無三相電,問網民應該用邊種電熱水爐好,但網民都叫樓主三思:「儲水真係人間地獄,勸樓主唔好做傻事」、「處死式電熱水爐」、「唔係沖開凍水涼就唔好攪啦!你以為自己得ja」、「沖涼唔用煤氣等於玩死自己」、「我屋企都有電磁爐蒸焗爐,但為咗沖涼,都有裝煤氣,就係唔想冬天被處死」。

網民都話冬天沖涼唔用煤氣爐而用儲水式電熱水爐,真係有機會玩死自己!

無用煤氣網民:買部容量大嘅儲水式熱水爐,其實可行嘅!
但有網民就話自己屋企都係無用煤氣全用電,仲分享自己嘅心得:「2公婆生活都係無用煤氣,煮嘢食無咩大問題,0要求嘅求其買個打邊爐果啲就夠,有少少要求就買雙頭果啲,依家好多都好夠力。沖涼嘅無三相應該用儲水式,2條友揀部大少少容量嘅(廿幾加侖果啲),夏天嘅咪收工開,開到瞓之前沖,每人沖5-10分鐘都好夠,冬天你預差唔多24小時開足,再配合埋浴室寶個暖氣,其實都係好夠。但你係習慣沖幾個字涼,或者人多果啲,就真係用返煤氣好過」、「屋企全電,儲水式15L熱水爐 +電磁爐,如果你冬天沖涼10分鐘內,唔係用超熱水都夠嘅,用之前係要等佢煲水15-20分鐘」、「點解個個都話行電就要儲水式熱水爐?明明而家都有行電即熱,我自己屋企都係全電,煤氣都cut埋!」

有全屋用電嘅網民分享心得,話揀一個容量大啲嘅儲水式電熱水爐,預早幾個鐘頭開定儲熱水,只要沖涼時間唔係太長,絕對無問題。

棄用煤氣嘅原因,竟然係因為個煤氣錶唔靚?!
有網民放棄用煤氣嘅原因,竟然係因為個煤氣錶太大:「因為真係識人全屋都用電,仲要係一家三口,都無連登咁一面倒撐煤氣,同埋兩樣嘢係我唔想用煤氣原因:第一,個煤氣錶喺屋裏面,好阻地方;第二,夏天想沖小小暖唔過三十度嘅水係唔得,所以依家直接凍水」,但有網民就反駁:「其實儲水式熱水爐都幾大舊又厚,煤氣爐有啲好薄,點都好睇啲;煤氣錶可以改位,改係廚櫃個轉角位度」,樓主就問:「煤氣錶可以改位?使唔使另收費?」,網民回應:「煤氣公司報價都係2千幾,點貴到hihi?我搵氣體註冊承辦商搞就$1,800」,不過樓主就覺得:「如果畀得起錢大裝修果種,扑爛晒牆重新再間過間格嘅,2千幾都接受!如果只係將入咗屋嘅錶,再鑽牆拉喉去另一個位……應該都會好醜樣。」

有網民放棄用煤氣嘅原因,竟然係因為覺得屋入面嘅煤氣錶好阻地方!

停電,好彩有煤氣爐,仲可以煮嘢食!
不過有網民就覺得唔好放棄用煤氣,全屋用電:「我又覺得保留一樣煤氣會好啲,電費係累進收費,愈用得多愈貴,如果你用電量係大,保留煤氣熱水爐可能會抵啲」、「之前都想全電,好似有人話過德國寶隻速熱式ok,除咗最凍果幾日,不過用電爐怕電死……最後都係留返煤氣沖涼」,不過最冷靜「有智慧」嘅,可能都係呢個答案:「上次停咗電,好彩有煤氣爐 可以煮嘢食!」

亦有網民指出電費係累進收費,如果樓主用電量大,不妨考慮保留煤氣熱水爐。

但有心水清網民講出重點:萬一停電,保留煤氣爐都仲可以繼續煮嘢食!

text/Joyce
photo/HKET圖片庫

============
同場加映:
【蝸居睇樓團】
沙田37年舊樓型格乾濕分離浴廁、客廳窗台巧變打卡位

用App睇片‧賺積分‧換獎賞!

認住 U Fun 標誌「」, App內睇文同睇片可隨時捕捉U Fun彩蛋, 換領現金券及禮品!

開啟 App 成為會員賺U Fun!

↓【U Lifestyle App聖誕周年慶】DayDay送大禮!↓

↓勁送機票/電話/遊戲機等巨獎!↓

↓勁送機票/電話/遊戲機等巨獎!↓

↓「U Lifestyle App限時搶」↓

↓逢星期三3PM入App搶!↓

↓逢星期三3PM入App搶!↓

評語

相關文章