康城交通唔方便但地方新又有靚景? 網民熱討:到底康城好唔好住?

2022.07.19

究竟應該要用咩去判斷一個地區好唔好住呢?論交通?論環境?抑或係論新舊?最近有網民就喺連登討論區上發帖,表示自己剛搬到康城住兩個月,完全唔明白點解會有人覺得康城好,並大數住喺康城嘅缺點,結果引起一眾網民熱烈討論:到底康城好唔好住?

康城好唔方便?幾萬人迫一個細商場?

樓主搬到康城住兩個月後,就向網民列出自己認為住喺康城嘅幾項缺點:「(地)鐵4班車先得1班入康城,非繁忙時間仲要等12分鐘先有車入,巴士唔洗諗,得兩條全日巴士線,仲要20-30分鐘先得一班。商場正垃圾,又細又無野好食,仲要收得你貴。超市得一間不知明超市,做獨市生意,鐘意收你幾貴就幾貴,反正你都要買」,樓主認為只有在購買日用品方面因有藥房、萬寧及屈臣氏等商店,所以尚算可以,因此勸籲想住喺康城嘅人要諗清楚:「諗著搬入黎嘅,要諗清楚先,如果唔介意舊,寧願買park central(將軍澳中心)仲好」

有多位網民就表示認同樓主說法,認為康城交通非常不便:「根本就係垃圾地方,同樣價錢出面買到交通方便,更多配套,班aa(意指地產經紀)自己打飛機呃班傻仔入去垃圾地方」、「有車都無用,兩公婆都要打工真係唔好入嚟住,好唔方便」、「將軍澳線一壞基本上康城同世界末日冇分別」、「放假去過康城,一出地鐵大堆人排隊出閘都搞幾分鐘,人口好密集,車又疏,應該都幾chur,不過新囉。」,亦有網民認為康城只得一個商場之餘又好迫:「個商場細到,仲要整個溜冰場係到,我諗星期日啲人多到行年宵咁」、「幾萬人迫同一個細商場,仲衰過公屋」、「我係個頭返工都覺得人多到hihi,朝早食個大家樂買個外賣都要等幾個字,食野又貴又多人,遲小小化淡廠、石屎廠開埋,大車仲多」、「所以只要對生活有少少要求嘅都根本唔會揀嗰度,買條魚都難過人,仲要貴人哋幾成」

新搬住到康城兩個月的樓主表示康城交通不便、飲食選擇少、商場細兼只有一間貨品價格高昂的超市。

有網民認為康城人口非常密集,並只靠一個商場照顧幾萬人的生活需要。

康城全部嘢都好新?具良好升值潛力?

意見亦並非完全一面倒,有網民就認為康城並唔係樓主講到咁差,住喺康城亦有其好處:「康城唔係講得咁差既,有海景,地方大都還好」、「唔計配套交通,個環境係幾舒服既,有車條橋起埋當然更好」、「除左交通其他都還好,通常自己屋企煮,雖然得一個超級市場,但個度成日有啲特別野買,牛肉仲平過係寶琳買」、「樓下幾方便喎衣食住行吃喝玩樂乜都有,中法日泰咩類型餐廳都有,咩叫垃圾?商場貴?如果你負擔到咪唔覺囉,不過係潮濕好勁,自己揸車交通(就)唔係重點」、「商場4層成百間店鋪真係唔算細啦」、「(康城)地方新,路闊,平日過左䌓忙時間相對幽靜又不失必要既方便性,樓下海濱整好又多左散步地方,會所大同新,海景一流」

亦有網民認為住喺康城有好亦有壞,重點都係要睇自己嘅喜好:「各有各喜好,康城(樓價)升得快主要係因為所有野都好新,包括樓、商場、會所、公園,新樓同會所都好grand,而且最緊要係近MTR,落雨既時候,期期都唔使擔遮唔使淋,d(啲)人認為呢d(啲)優點重要過唔方便、冇街市超市、MTR班次疏落、樓望樓等因素」。另外有網民就認為於康城租樓會相對較平及康城樓價具有升值潛力:「咁既價,但租金平成咁,住個頭既fd都話好多後生仔女租個度,貪佢新又包家私(傢俬)。租金同樓價真係完全唔成正比」、「升值潛力係幾好,但如果住到相對唔方便但又咁多人真麻麻。投資既話康城x得過,自住既話可以揀無咁好升值潛力但平衡返其他既樓盤」、「有升值空間已經夠玩」

有網民認為康城地方大、海景一流及所有配套都非常新,居住於此感覺並不差。

亦有網民認為康城的樓盤具有不錯的升值潛力,可作投資選擇。

text/Jonathan
photo/HKET圖片庫

============
同場加映:
【蝸居睇樓團】
日本認證收納師教你!山泥傾瀉衣櫃整理大法 常着衣物放腰位、揀啱膠櫃桶+懶人最好掛衫

用App睇片‧賺積分‧換獎賞!

認住 U Fun 標誌「」, App內睇文同睇片可隨時捕捉U Fun彩蛋, 換領現金券及禮品!

開啟 App 成為會員賺U Fun!

↓【送禮】送您最新iPhone 14!↓

↓立即分享美食 贏走獎品!↓

↓立即分享美食 贏走獎品!↓

↓【聖誕送禮】送Soul Emotion Pro / Emotion Max耳機!↓

↓立即參加贏走!↓

↓立即參加贏走!↓

評語

相關文章