買舊樓怕將來賣唔返出去？怕要蝕住咁賣？ 網民熱討：四、五十年嘅舊樓仲會唔會有人買？

平啲實有人買？要睇地段睇狀態？

樓主發帖詢問是否需擔心買樓齡約四、五十年嘅舊樓將來會有賣唔出嘅風險，亦問到會否就算地段位於中半山及西半山嘅舊樓都有賣唔出嘅風險，而一眾網民都熱心解答樓主嘅問題，紛紛咁發表自己嘅意見，有網民就認為賣唔賣得出都係價錢問題，以平價出售就實賣得出：「一講到尾都係價錢問題，舊樓只會愈來愈平，除非係豪宅地址」、「睇你咩價姐，600幾呎舊樓你銀行估(價)900幾萬，你放市價950-1000萬咁一定放未必放得出啦，你放700-800萬包放得出」、「個價平返d(啲)實有人買，有d(啲)人心態係唔理新舊住住先，更何況要計返折舊」、「真，本身有層49年(樓)放緊，有裝修，408(萬)落到398(萬)，突然勁多aa(意指地產經紀)約睇」

有網民就認為要視乎舊樓處於邊一個地區以及舊樓嘅保養狀態如何：「睇價錢睇地段睇狀態，63年樓有lift，算企理，樓下(有)地鐵，放一個禮拜就賣咗」、「狀態真係可以差好遠，一定要揀d管理得好既，有好多40年樓好多法團都無人想理又一堆廢老」、「睇地段，中西半山、何文田大把人要」、「認同要睇地段，例如跑馬地愉寶大廈43年樓齡都可以有破頂成交」、「銅鑼灣海邊堆舊樓咪又五六十年，又大單位大騎樓，二千萬都有人要」、「舊樓如果保養得正不知幾正，但都要樓下同附近配套配合先有個(嗰)個感覺，銅鑼灣個堆就係」，但亦有網民認為就算係西半山嘅舊樓都難以出售：「西半山下跑馬地40年(樓)想賣真係發x緊夢，除非地值比率仲有好多淨，唔係真係等下世，反而美孚呢d(啲)大型屋苑就真係有啦」

有網民指出若以平價出售舊樓就不用擔心賣唔出。

亦有網民認為位於銅鑼灣、中西半山及何文田的舊樓極具市場價值。

買舊樓等被收購重建？後生仔唔會買舊樓？

有網民表示舊樓始終有其市場需求，若想出售舊樓，買之前最好揀一些較好嘅單位：「始終有d(啲)錢唔太多但又要買既客，地段靚個d(啲)唔洗同佢擔心，淨係放租都夠，如果買，搵d(啲)全爆過既單位最好，舊樓全爆條裝修數都唔平」、「好似美孚咁都一直有人買，有d(啲)人可能一買就買3房，已經一步到位買來自住唔諗換樓，咁呢批人咪唔會諗咁多賣唔賣返出去」、「呢D(啲)要target靚則，好座向靚景，大單位果(嗰)批」

亦有網民認為有些人會因單位有被收購的可能性而對樓齡超舊嘅舊樓有興趣：「等收樓果(嗰)班(會買)，但唔知等幾耐」、「50年重建，到時就發發」、「等收樓期間仲有維修」，但有人則認為收購只限於市區唐樓：「市區矮嘅唐樓就話有人收購，但40-50年嘅大屋苑真係唔知會點收科」。另外有網民就認為現時年輕人不會考慮買舊樓，舊樓唔會有年輕人嘅市場：「係後生仔眼中，3年樓齡都已經好舊，10年樓齡已經係不適宜居住既危樓。買得40年+舊樓既投資客係唔會考慮新樓，同樣地嫌3年樓齡舊既後生仔係唔會考慮樓花以外既選擇。根本就唔同客路，無野好比較。」、「買市區20年樓大型屋苑，佢地(指年輕中產)都問點解買咁舊。佢地眼中只buy新/半新，而半新真係只限10年內個d(啲)。」

有網民認為有些人會因希望單位能被收購重建而選擇買舊樓。

有網民就認為在香港年輕人眼中10年樓齡已經不能接受，年輕人只會選擇新樓，絕不會考慮購買舊樓。