網民誤信Sales 廚房揀錯枱面石中伏 無縫石係咪廢到睇得唔用得?

2022.07.29

近年大家愈嚟愈重視廚房嘅裝修,但除咗美觀之外,物料嘅選擇都好重要。有網民喺連登討論區發帖,話裝修廚房嘅時候,「信錯咗」Sales,枱面石用咗無縫石,結果用咗一日就花晒!仲要嚴重到係就咁跌個銀仔落去都會刮花……樓主忍唔住要開post,問大家究竟無縫石係咪真係廢到淨係睇得唔用得?!大家有無類似經驗呢?

深色無縫石易刮花又唔受得熱
樓主話佢本身嘅廚房枱面,用開石英石,阿媽諗住裝修吓廚房,其他部分都無事,惟獨枱面聽咗裝修師傅話,改用無縫石,點知唔夠一日就花晒!樓主約師傅跟進,點知師傅話深色嘅石面係易花,點解唔揀淺色?仲話好多客用過深色石之後都後悔……樓主就話係裝修公司嘅Sales推薦,點知師傅竟然話樓主傻:「Sale緊係話好啦,博你地睇下會喎(唔)會買過件第二隻色賺多次,好信唔信信sale!」。結果師傅磨完成張枱,變晒啞晒色,雖然無晒之前嘅光澤,但都好過之前!點知到最近,爐邊又出現裂紋!樓主再叫師傅上嚟,師傅就話呢隻石唔受得熱,遲早會爆……整咗2次,整到成間屋都係塵!結果樓主幫襯另一間公司,換返原本嘅石英石,跟住就乜嘢問題都無再出現!

樓主用咗深色嘅無縫石做枱面,結果用咗一日就被刮花,連師傅都話樓主疑似信錯Sales。

無縫石揀返大牌子質素比較有保證
有網民就問:「無縫石/人造石質素係好參差的,你買咩牌子?」,其他網民亦認為揀質素好嘅無縫石,未必會出現樓主嘅問題:「我屋企用corian,無你呢啲問題出現;但裝修個陣個師傅想換隻大陸嘢」、「我上次裝修廚房係用 Staron 無縫石,用咗十年,除咗近 sink 盤邊有啲位有少少崩之外,其它都冇乜問題。無縫石揀返大牌子一般嚟講質素係有保證,除咗你吓吓街市剁肉法就另計」、襟唔襟要睇牌子,corian最貴$1,000-1,500直尺,其次Samsung,Lg,$1,000-700直呎,大陸牌子一律垃圾」。

亦有網民認為只要選用較高質嘅無縫石如corian,都未必一定會易刮花。

石英石容易清潔兼耐用
不過好多網民都撐用石英石:「大陸果啲石英石係最夠用同粗用都唔怕,夠硬唔花唔變色,又平,比(畀)錢買教訓」、「石英石係廚房造台最高級最耐用嘅物料,你走去換垃圾合成石」、「石英石啦,清潔方便好多,除非你唔煮嘢食」、「我都係用裝修佬推介cheap雞大陸石英石,雖然少入廚,但用得都粗唔會錫住用,用左三年都無咩伏野喎!」、「聽過無縫石唔襟用,用返真石啦!」。網民仲建議咗其他廚房枱面石嘅心得:「同埋爐位邊最易爆,好嘅石,爐位會加防熱物料,令到佢冇咁易爆」。

網民都話石英石易清潔又耐用,唔易刮花又唔易變色,就算粗用都無問題。

廚房宜用淺色石面
至於用色問題,似乎網民都知道廚房枱面石宜用淺色:「任何深色嘅地板/牆身/枱面都係一花就好覺」、「明知廚房又要介意花,你學咩人用深色,用唔起就唔好學用返淺色白色啦」、「普通都係用淺色嫁啦!深色好老套喎」、「無縫石都有分唔同品質,可能你果隻CEAHP嘢品質差,同埋廚房推薦用淺色石,除左深色易花之外,淺色都易見到邊到(度)彈到污糟野同埋打曱甴易啲」。

被刮花機會高嘅枱面同牆身,其實都比較適合用淺色嘅石面。

text/Joyce
photo/U Magazine圖片庫 
============
同場加映:
【蝸居睇樓團】348呎堅尼地城舊樓上車盤大翻新 7呎闊衣櫃無地台套房、玻璃間隔牆增空間感

用App賺U Fun換獎賞!

會員登入U Lifestyle App即可領取
迎新禮遇 150

立即登入領取

↓【隆重登場】香港咖啡地圖2022!↓

↓即睇精選50間咖啡店(附評分及介紹)↓

即睇精選50間咖啡店(附評分及介紹)

↓社群送禮!贏走人氣網上超市現金券!↓

多玩多中!立即參加!

多玩多中!立即參加!

評語

相關文章