屋企廁所有窗好重要？感覺會更舒服？ 網民熱討：「明廁」係咪比「黑廁」更好？
唔知大家屋企嘅廁所係有窗定係冇窗呢？早前就有網民喺連登討論區上發帖，表示不解「黑廁」即冇窗嘅廁所存在著咩問題，結果就引起一眾網民熱烈討論：「黑廁」究竟有咩唔好？而「明廁」係咪又比「黑廁」好？
「明廁」會更通風？用落感覺更精神？
樓主表示商場內多數嘅廁所都係冇窗，但又唔覺得當中存有排氣以及濕氣嘅問題，因此就不解「黑廁」其實係有咩問題，而對沖涼又會有咩影響？有網民就首先認為商場嘅情況與住宅唔同，難以用作例子：「你留得喺商場廁所最多咪十幾廿分鐘，點同屋企廁所比較呀？」、「主要原因係商場通風非常足夠，主要係中央通風，加上商場係唔會沖涼，所以濕氣大減」、「其實點解樓主會用商場做比較，係都應該問酒店啦」，其後有網民就認為「明廁」比起「黑廁」通風更好更乾淨：「光(明)厠(廁)有陽光，陽光可殺菌除濕除味，厠(廁)所會乾爽好多」、「光猛啲，氣流都好啲，抽氣扇打橫抽走廊/廳嘅空氣」、「光(明)廁抽氣直出戶外，大力好多，鍾意既話裝晒浴室寶加抽氣又得，又唔會有昆蟲由中央系統爬入黎」、「撇開通風問題唔講，有窗點都好啲，即使唔打開窗，但有日光照到的話，細菌都少啲」
亦有網民認為「明廁」喺使用時感覺較舒服：「明廁有自然光係會舒服D(啲)，朝早起身刷牙洗臉感覺精神少少，同睡房起身果下陽光曬落黎道理一樣」、「痾住屎沖住涼有陽光射入嚟個feel係relax好多」、「有自然光/風透入黎，你長期的精神狀態係會有分別」、「平時無沖涼真係會開少少窗等啲陽光曬入黎，感覺好似有消毒咁，心理作用」，但亦有網民表示唔覺得廁所有窗會有太大嘅分別：「我屋企超開陽+長開(窗)，但唔覺得乾爽，都濕濕漉漉咁」、「有x分別咩，有窗從來都無開過」
另外有網民就提出若廁所窗對正大廈天井就等同冇窗一樣：「如果光(明)廁對天井，應該都唔會點開，基本上都無分別」、「光(天)井勁多菌，個個抽晒D(啲)污糟氣入去，仲有D(啲)屎渠實有漏水的，你打開隻窗，人地D(啲)屎粒子咪入晒你屋」，隨即有不少網民亦表示認同：「真，出面對正天井，好多蟲就係嗰度躝入嚟，點開呀」、「真，而家仲要疫症垂直感染，邊敢開…」、「光(明)廁個窗對天井真係慘過食兩舊屎」
有網民認為「明廁」抽氣通風效果較好，能減少細菌滋生的機會。
有網民則認為「明廁」有陽光照入，使用時感覺會較精神及放鬆。
「黑廁」會好臭？較容易滋生細菌？
網民除了有對「明廁」發表意見外，有網民亦討論到「黑廁」抽濕效果有限：「室內光同室外光既感覺差好遠，之前住個到黑廁搞唔掂硬係好潮濕咁」、「d(啲)人話咩明廁唔開窗，其實同黑廁無窗好唔同，明廁抽氣扇後面已經係出氣，即使個天井幾污糟，抽氣效果點都好好多，黑廁走氣喉好多清潔唔到，抽氣扇只要一壞，基本上已爆菌」、「(「黑廁」抽氣扇)難保養，洗唔到排氣喉，抽氣能力隨時間遞減，明厠(廁)唔開窗但個排濕都會勁過黑厠(廁)好多，黑厠(廁)真係無得散，一次抽唔足就關左門足以爆一轉霉菌」，亦有網民認為「黑廁」存在著衛生問題：「黑厠(廁)水氣難散，陰陰濕濕，某d(啲)地方浴室寶風力不到，長濕易有菌，影响(響)健康」、「(「明廁」)起碼通風先，黑廁臭到飛起」、「我有朋友柯(痾)屎臭到x街，你聞過就知咩料」、「(「黑廁」)排氣喉勁長，清潔唔到，試過打風吹返一舊舊塵入返黎，想嘔」
但亦有網民認為「黑廁」其實並無甚麼問題：「用明廁大，搬屋之後用咗黑廁幾年，完全冇問題」、「我都覺得冇問題，就算而家明廁我都係長閂窗同長開抽氣扇，有冇光是x但啦咪又係開燈」、「日本9成9屋都係黑廁，但係完全冇問題，問題係出自個廁所有咩配備」、「宜家有浴室寶有抽濕機，黑廁根本就冇問題，相反你光(明)廁隻窗打開係天井，又有異味又有機會有小強入屋」，更有網民認為「黑廁」比起「明廁」更加好：「我反而覺得黑廁對COVID無咁恐懼，自己管理好，裝UVC消毒燈就得，我住緊明廁，COVID以黎無x開過個窗，抽氣扇又要檢查有無入氣位。」
有網民認為「黑廁」有著容易有臭味以及較潮濕易滋生細菌等衛生問題。
亦有網民認為「黑廁」並無太大問題，前題是要有設置浴室寶或抽濕機等配備。
港生活人氣本地熱話
【樂迷注意🎧】《社群》請您免費聽歌三個月！
【Chill Guide旅遊指南😎】日韓台泰越深圳2025行程攻略✈️
↓即睇最新行程懶人包、爆紅打卡點🔥、必吃美食😋等↓
