落地玻璃窗設計夠氣派但實用性低? 網民熱討:單位採用落地玻璃窗係好定唔好?

2022.08.05

近年愈嚟愈多新落成嘅住宅單位都有採用落地玻璃窗作設計,唔知大家又點睇呢一款嘅窗戶設計呢?最近有網民就喺香港討論區上發帖,表示不解香港大多新建成嘅樓都採用了落地玻璃窗設計,若當遇上極端天氣時,就會容易有入水及爆玻璃嘅風險,結果就引起一眾網民熱烈討論:點解新樓會以落地玻璃窗作設計?落地玻璃窗設計又究竟好定唔好?

落地玻璃窗設計成本平啲?採光好景觀又一流?

樓主表示近年新建成嘅單位採用落地玻璃窗設計雖則開揚,但其實存在著唔少嘅問題,當要清潔及維修時亦麻煩:「好容易入水,尤其是而家的極端天氣,一野玻璃都打爆你,係好開楊,但全無私隠,清潔好困難,如要維修你就大件事了」,有網民就認為因以落地玻璃窗作為設計成本較平,所以多數新建嘅單位都採用呢類設計:「石屎貴過玻璃」、「用玻璃,料又平啲,手工又平啲,維修保養費又高啲,發展商最愛」、「用少些鋼筋,水泥,賺多些。」,亦有網民提出以落地玻璃窗作設計可豁免計算單位建築面積:「擁巨幅玻璃的窗台同樣獲豁免建築面積,使發展商可以售賣更多實用面積」、「因為豁免計算地積比率,即是呃你尺,現在的冬冷夏熱大玻璃,全部都是地產商根據政府修例攞盡著數,食到你盡」

有網民就認為單位採用落地玻璃窗設計採光一流以及感覺更加高貴:「氣派,落地玻璃高貴好多」、「採光好,高端大氣,帶囡囡番屋企窗邊打卡,望住業主心心眼」、「落地玻璃夠哂光,但要睇坐向」,亦有網民認為高層單位採用落地玻璃窗設計景觀一流:「低層畀人睇通晒就唔好,極高層望海就有種大地在我腳下嘅感覺,正!」、「落地加一望無際海景,而且玻璃又見唔到樓,咁樣係正」

有網民認為採用落地玻璃窗設計成本較平及能豁免計算單位的建築面積,從而使地產商可獲利更多。

有網民則認為落地玻璃窗設計有採光好、夠氣派以及景觀一流等優點。

打風驚會爆玻璃?會令單位特別熱?

有不少網民就對樓主嘅說法表示認同,擔心落地玻璃窗設計會有安全問題:「幾靚望出窗外面但行雷閃電打風幾驚下,會否出事㗎!」、「打風季節真心驚,訓都訓得唔好」、「就算強化玻璃都有個死點位,幾年前一場颱風天鴿,很多落地玻璃都飛咗落街,覺得冇乜安全感」、「之前十號波山竹,都吹到好多住宅同寫字樓啲玻璃窗爛晒,吹晒入去。部分樓宇仲左搖右擺,真係睇見都覺得牙煙」,但亦有網民反駁到其實香港很少機會有極端天氣發生:「人地外國打風成間屋無左都未驚啦,香港有幾極端天氣?」、「玻璃落足料其實都超級硬淨的」

有網民則提出落地玻璃窗設計會令室溫提高:「大量密不透風落地玻璃的新樓,冇冷氣真係焗死熱死,就算開冷氣,有排都涼唔到」、「玻璃勁吸熱,日間開行冷氣都吾(唔)涼」、「漏heat,冷氣,打風驚餐死,洗窗又煩」,另外有網民就認為落地玻璃窗設計實用性低,不宜用於住宅單位設計:「望落好似好勁咁令人,但係靚少少已經可以收貴D(啲)呃人,實用性低」、「又鑽唔到縲絲,又無電制位」、「房是用來住,不是用來打卡,酒店咩!」、「自住最好緊(梗)係回歸基本,明窗露台先係最人性化」

有網民認為落地玻璃窗設計會令人失去安全感,當打風時亦會加倍擔心。

亦有網民認為落地玻璃窗設計會令單位更吸熱以及實用性低不夠人性化。

text/Jonathan
photo/HKET圖片庫
============
同場加映:
【蝸居睇樓團】青衣800呎3人1犬之家 海量魚竿收藏室、BTS粉絲Dream Room

用App賺U Fun換獎賞!

會員登入U Lifestyle App即可領取
迎新禮遇 150

立即登入領取

↓【送禮】送您5G智能電話及寵物店現金券!↓

↓ 立即分享貓狗相片 贏走豐富禮物!↓

立即分享貓狗相片 贏走豐富禮物!

↓社群送禮!贏走人氣網上超市現金券!↓

多玩多中!立即參加!

多玩多中!立即參加!

評語

相關文章