位於將軍澳嘅大型私人屋苑日出康城，係目前香港最大型嘅私人屋苑項目，總共有13期，提供約25,500個單位，於是亦成為咗連登討論區上嘅熱門話題，甚至有網民出帖笑連登仔點解咁鍾意講日出康城！亦有網民索性開post搞個「日出康城排行榜」，意見相當全面，若果有打算購入日出康城樓盤，都真係值得要刨吓文。
領都有全天候室內通道 100號風球都唔怕？！
首先樓主先講出自己心目中嘅日出康城排行榜評級，不過似乎重點都係大廈同地鐡站嘅距離：「領都：全天候室內空氣調節有蓋通道，100號風球都唔怕；緻藍天：全天候室內空氣調節有蓋通道，近地鐵站，但有少少露天；首都：冇全天候室內空氣調節有蓋通道，但係由地鐵站行返屋企完全唔使溚雨；晉海： 距離地鐵站比較遠；LP6：距離地鐵站比較遠，入屋苑之前嗰條路，個簷蓬唔算太大；MALIBU：距離地鐵站比較近，商場行過去都算方便；MONTARA：睇到海景；SEA TO SKY：距離地鐵站中等，但係要行一條比較空曠嘅天橋；MARINI：距離地鐵站比較遠，要行天橋，用日立電梯。我嘅頭三名係（個人感覺，不代表其他人立場）領都→緻藍天→首都」。
有網民都和議領都有全天候通道呢點最正：「領都最好，地鐵站返屋企完全唔使出室外，連屋苑通道都係室內」，但係有網民就提出反駁，甚至展開「罵戰」：「我住領都，去地鐵站邊有全天侯室內通道？ 咪又係要行天橋穿過商場。 利申我一年唔搭一次地鐵」、「屋苑入邊去座同座之間條通道，唔係24小時全天候室內冷氣調節？希望你真係住喺領都」、「果個係lobby唔係通道，你要出去，一定要行天橋，天橋有蓋，但唔係室內，十號風球同露天無分別。」
樓主列出佢心目中嘅「日出康城排行榜」，排首位嘅係「領都」。
樓主以及支持領都嘅網民，都認為最大優勢，係大廈連接地鐵站，有全天候空調通道。
樓主心水排行榜嘅第二位，係緻藍天。
Marini同Malibu牆身厚 究竟係好定唔好？！
另有網民就從景觀及用料去評論日出康城各期嘅優劣：「以下跟排名：Marini（會德豐/近海/外牆grand/新/CH有4個標準羽毛球場/勁厚牆)；晉海（shk/近海/外型唔得/半新）；Malibu(會德豐/近海/外牆grand/勁厚牆）；STS(Sea to Sky，雖然長實但個盤d人評價ok/但長實終始用料都係差咁d，廁所連浴室寶都唔比/新/景係最靚個3期之一/）；Montara (會德豐/外牆grand/開積正路/勁厚牆/近鐵落黨鐵最快/比其他期數圍死）；LP6(南豐/黨鐵去LP6得半瓦遮頭/個盤比人評價一般/景靚/外觀係最唔掂/牆厚/有d手工問題）；緻/首/領（長實/舊到外牆睇得出/多大積/以前多負面新聞）。仲有個三期，會德豐最後一期同LP10，起得好好睇睇可能上到頭3，信和起緊個期同montara就叮噹馬頭」。
但立刻有網民提出質疑：「厚牆唔係通常係缺點？同埋睇你描述唔明點解STS好過Montara」，出帖網民亦有回應：「缺點黎（但隔音黎講表現比較好……)，STS差唔多戶戶有海，同牆無Montara咁厚，Montara比其他期數圍死，低層園境（景）反而還好，中高層望出去其他期數唔係個個ok，康城嘅話，我揀景多d」。
有網民覺得Marini嘅單位牆身厚，隔音效果比較好，都算係優點之一。
Marini的會所有多個標準羽毛球場，加上係會德豐樓，成為網民心目中嘅首位。
晉海質素差 唔需要當新鴻基樓standard？！
有網民就認為晉海質素差，根本唔值得排第二位：「晉海設計同質素都好垃圾，稱唔上shk盤」、「之前都留過言，晉海好一般，過埋年尾保養期唔需要當新鴻基樓standard 睇晉海；lift槽底長期有鹹水；一樓公家路好多位成日漏水搵唔到原因；黑廁得浴室寶冇抽風喉，沖完啲濕氣攻晒入細房；企缸個龍頭喺浴門後面on9設計；每層樓個冷氣機台都生晒銹；電梯門又花曬冷氣又滴水，保養差；屋門居屋標準高度」，對於其他幾期，網民都各有負評：「領都部電梯成日壞冷氣，臭Ｘ到，又唔係維修都硬係停用一部電梯……」、「緻藍天景靚，但會所最垃圾。冇乜設施之餘，裝修亦好土豪，完全唔grand」、「我住marini，無海景……真係比較遠站」。
有網民覺得晉海嘅用料同設計質素都差，唔達到一般新鴻基樓嘅standard。
網民話晉海單位嘅黑廁，得浴室寶冇抽風喉，濕氣會攻晒入房，同時企缸個龍頭喺浴門後面嘅設計，亦相當唔好用。
對於緻藍天，有網民覺得雖然景色靚，但無乜設施，會所亦差。
text/Joyce
photo/HKET圖片庫
============
同場加映：
【蝸居睇樓團】上門睇風水！龍師傅解答風水屋謬誤 背山望海唔一定好、大門對窗唔一定漏財？
」，
App內睇文同睇片可隨時捕捉U Fun彩蛋，
換領現金券及禮品！
【登記送🎁】L'OCCITANE 3款臻緻節日倒數日曆🎄！
↓一次帶走24件護膚、身體／頭髮護理及香水產品↓
↓ 【毛孩請試用】Royal-Pets蘆薈溫和修護沐浴露！↓
↓去除身體污垢，成分溫和無添加！↓
