打咗散工十幾年 從未交過稅同冇供強積金 用現金買樓會唔會有問題？會否被稅務局追稅？

唔係黑錢就唔使驚？做按揭可減少被查風險？

樓主表示自己打算買二百萬左右嘅村屋作自住，並打算不做按揭及以現金支付費用，但因自己仲未交過稅嘅關係，擔心買樓會被稅務局追稅，對於樓主嘅情況，有網民就認為稅務局唔會追查：「大銀碼你證明到金錢來源便可以，一般細銀碼單位稅局係唔會查，大把三行佬，街市小販買樓都無証明啦」、「答你，唔會。除非你層樓幾千萬過億」、「現金買樓無問題wor，只要你講清楚資金來源，因為律師有守則要做足查證確保唔係黑錢，稅局都唔知可以查你啲乜，你打足stamp(釐印)，交晒錢咪ok」、「Full pay買樓，稅局唔會查，但財富情報及調查科會查你，只要你D(啲)錢唔係黑錢，就唔洗擔心」

亦有網民建議樓主應做按揭，減少被稅務局追查嘅機會：「借少少(錢)點都要，田土廳(意指土地註冊處)買賣要連住份mortgage(按揭)記錄，稅局先唔會查你」、「你膽(擔)心的可以做1(一)、兩成按揭，同時做銀碼定存，銀行一般有呢樣服務，可以玩一年，計落一年相差只係比少少息，有錢佬好多都係咁樣買樓，但一般細銀碼樓好少查」、「照打散工，然後每個月定時入數， 大概三個月到半年左右，然後買樓時做dd(啲啲)樓按，lee(呢)個方法應該會較安全」，但亦有網民質疑自已入錢呢個做法嘅成效：「無用，銀行要睇果(嗰)個入帳係咪salary(人工)，佢係自僱有銀行要睇有無供強(積)金架，自己入錢呢家野唔work架」，不過該名網民亦隨即反駁：「點會無用，我身邊個個都係甘(咁)買，好多職業都係比較煩，散工同自僱之間，如運動教練導遊之類，唔通佢地唔使買樓咩」

有網民認為若有清楚資金來源，以現金買樓就不會有問題，而稅務局亦較少會追查金額較細的樓盤買賣。

亦有網民認為做按揭及定期到銀行入賬可以減輕被稅務局追查嘅風險。

大機會會追查？正常賣家唔會收現金？

網民嘅睇法亦並非一面倒，有不少網民就覺得稅務局會向樓主追查：「死硬的，稅局好大機會開你file，律師樓都會問資金來源」、「都有機會查架，佢地開 file，條友從未報過稅，依家大拿拿交2(二)十幾萬印花稅，你真係當稅局流架」、「律師樓肯定報警，一係唔肯做你生意」、「d(啲)錢見唔到光就千萬不要買樓，防洗黑錢，問你拿一般會睇你銀行月結單出，大額就叫你解釋，解釋唔到成筆錢凍結你。等你交足稅再傾」，亦有網民認為以現金買樓不可行：「現金上會已有問題， 銀行不接受」、「正常賣家一般唔敢收現金，會叫你經律師樓，律師樓一般唔敢收現金，會叫你經銀行出本票/支票，如果經銀行，銀行見大筆錢入銀行，銀行有懷疑，就會報金管局」

另外有網民就以身邊人嘅經歷表示稅務局的確會追查：「識人FULL PAY個人名買樓，成3000幾萬，比稅局查返佢間公司7年數，好彩盤數乾淨，不過稅局都屈左佢間公司10幾萬補加稅先CLOSE FILE」、「小學同學屋企係街市賣生果，做咗3、40年都冇交過稅同強積金，17年全款買樓之後罰咗幾十(萬)稅，而家老老實實供強積金，公司做返有限公司報稅！」，亦有網民提出瞞稅可能導致嘅後果：「如果有瞞稅，要交番(返)稅同罰款之餘，仲會被告上法庭」

有網民認為稅務局大機會會追查樓主嘅案例，而律師樓亦會追問資金來源。

有網民則認為一般賣家在賣樓時不會收取現金，以現金買樓並不可行。