月入得萬六蚊 要搵屋住 一個人租樓住可以有咩選擇?

2022.08.11

租樓係好多香港人日常最大嘅開支,隨時佔人工嘅一半,而如果月入只得萬幾蚊,喺租樓上又可以有咩選擇呢?最近就有網民喺連登討論區上發帖,表示自己人工月入只有一萬六,但有搵樓自住嘅需要,因此就詢問一眾網民究竟一個人可以住咩地方會比較划算,而網民們都熱烈參與討論,紛紛提出唔同嘅意見啊!

可住劏房、村屋、服務式住宅?搵人夾租會抵好多?
樓主簡單介紹自己嘅背景,表示自己月入萬六,有租樓嘅需要,現時冇女朋友亦唔需要畀家用,喺租樓上若位置較偏遠亦可接受,就想請教一眾網民究竟邊度抵租。對於樓主嘅情況,有網民就建議可租住劏房/套房:「旺角/TST(尖沙咀)劏房平D(啲),應該5-6K就有」、「最近都睇緊好多租盤,其實好多旺角深水埗尖沙咀既唐樓套房好多都4k-5k有交易,100-120呎,一丁友無咩需求夠用啦」、「租住劏房先囉,4-7K都有,豐儉由人,16K一個人用,冇其他支出實夠用」,亦網民認為租住新界區嘅樓亦係一個唔錯嘅選擇:「村屋5k左右已經夠大夠舒服,同價位市區除左工廈其他真係比狗住」、「元朗有啲套房5000幾蚊都四正嘅,不過你16k日日來回大西北同旺角你交通洗費都幾甘,仲未計返時間成本呢啲」、「八鄉村屋有6-8k,你可以搵搵,但1130後好多都無車,預咗要飛的」

有網民就建議樓主可搵人夾租以減輕負擔:「搵多個人夾租la,一個人租會好辛苦」、「唔mind可以同人夾租,抵過湯(劏)房,不過湯(劏)房勝左自己住哂」、「其實搵多條友夾真係抵好多,有啲地方15k都租到間兩房,除返開都係7.5k一個人,環境一定好過劏房,不過前題係搵到多條友」,亦有網民建議樓主可以考慮租住服務式住宅(Serviced Apartment):「Service appartment(Serviced Apartment),慳水電煤,打掃洗衫又有人跟,一個人有限錢,又唔洗兩按一上」、「service apartment(Serviced Apartment),唔洗搞家私電器,住住下有事,都唔洗自己跟」

有網民認為樓主可選擇租住劏房、村屋或服務式住宅等租金較平嘅單位。

亦有網民建議樓主搵人夾租,一來會比較划算,而居住環境亦會比劏房更好。

要住得近返工地點?「偷雞」住工廠大廈?
對於應該租咩地區嘅樓住,有網民就認為應該要選擇鄰近返工嘅地方,以節省交通費用:「住近返工嘅地方,慳車錢,一個人,空間夠就得,唔洗大」、「16K如果真係要搬出黎住一定要近公司,首先咁樣會慳到車錢先」、「你係邊返工?建議租附近,小一筆車錢同外賣錢」、「我覺得租市區一帶會好D,始終時間車費都係一個好大既考慮因素,講緊一個月車費可能唔見成千幾蚊,但你住得近可能慳到一半,同埋收工可以快D(啲)返屋企休息都好大影響,反正一個人住,無乜要求D(啲)劏房都幾好」

有部份網民就建議樓主「偷雞」住工廠大廈:「偷雞住工廈,平太多」、「考唔考慮工廠大廈,叫做大啲地方、平啲 ,咁當然地方就未必太就腳,如果要沖涼、廁所就會貴啲」、「工廈啦,女就驚姐(啫),仔唔洗(使)驚 ,地方大、地點多 ,又可以買個電磁爐自己煮野食慳返幾兩,不過麻煩就係住址證明個啲」、「一條麻甩佬(住)都幾好,平又大,樓底高,除非上面開BAND房,唔係隔聲(都)好」

另外有網民就認為樓主月入只有萬六,租樓會有好大嘅負擔之餘亦難以儲錢:「認真答得16k其實好抆水,可能日常生活都要慳住洗(使),搵屋盡量唔好搵d(啲)過5k,份糧叫做仲有10k做洗(使)費,因為搬出黎開支真係大好多好多,燈油火蠟水電媒雜費真係好多」、「有20K以上諗會實際啲。淨俾租+水電都起碼每月減你5K+以上」、「8-9k都租到深水埗紅堪(磡)果(嗰)堆新樓蚊型單位啦,一個人住岩岩好,但真係唔洗(使)儲錢」、「市區劏房都5k起,仲要交水電,租8k真係唔使諗儲錢、旅行之類」

有網民認為樓主月入不多,應要住在靠近公司的地方,以節省交通開支。

有網民則提議樓主「偷雞」住租金較平以及地方較大的工廠大廈。

亦有網民認為一萬六的月入實在對租樓有太大的負擔,會令生活變得艱難,而且並沒法儲錢。

text/Jonathan
photo/HKET圖片庫

============
同場加映:
【蝸居睇樓團】上門睇風水!龍師傅解答風水屋謬誤 背山望海唔一定好、大門對窗唔一定漏財?

用App賺U Fun換獎賞!

會員登入U Lifestyle App即可領取
迎新禮遇 150

立即登入領取

↓【隆重登場】香港咖啡地圖2022!↓

↓即睇精選50間咖啡店(附評分及介紹)↓

即睇精選50間咖啡店(附評分及介紹)

↓「App限時搶」大派禮品↓

↓記得逢星期三3PM入App搶!↓

記得逢星期三3PM入App搶!

評語

相關文章