同屋企人住就學唔到生活技能？會唔夠成熟？ 網民熱討：年近三十仲同屋企人住有冇問題？
喺香港租金同樓價都極高嘅情況下，搬離屋企自己出去住對好多年輕人嚟講絕對唔係一件客易嘅事，但若果近三十歲都仲同屋企人一齊住大家又認為有冇問題呢？最近就有網民喺連登討論區上發帖，表示自己將近三十歲，一直以來都與家人同住，未曾搬出去住過，感覺自己同廢人並無分別，結果就引起一眾網民熱烈討論：年近三十歲仲同屋企人住究竟有冇問題？
同家人住唔等於唔識生活技能？心智成唔成熟與有冇搬出去住無關？
樓主表示自已多年嚟都係同屋企人住，就連大學宿舍亦都未曾住過，導致自己缺乏煮食以及做家務等生活技能，並認為自己成熟度同二十歲嘅學生相差無幾，因此就覺得自己同廢人冇咩分別。對於樓主嘅情況，有網民就認為其實識唔識得做家務同係咪與屋企人同住冇關係：「30歲都唔識煮嘢食做家務關同屋企人住乜事？呢啲嘢要學好快就識」、「同屋企人住都可以(識)煮野食做家務」、「以前未搬出去住已經識買餸煮飯啦，睇你肯唔肯學嘅啫」，亦有網民認為一個人嘅成長與要背負嘅責任相關：「一個人嘅成長唔係睇你識唔識洗衫煮飯做家務，而係你經得起幾多痛苦同背負幾多責任。當你身邊越多人依賴你生活，責任越大，經歷越多痛苦，由被照顧變照顧人，自然就會發現自己真係真正成長左(咗)」。
亦有網民表示自己就算唔係同家人同住，心智亦不見得非常成熟：「我搬晒出去住，買埋樓，搞埋裝修，頭家井井有條，但我心智依舊係一個唔成熟細路」、「我都係自住緊，亦有試過係外國自己住過，個月(樣)都似成熟，但心智似中學生」、「自已住左近十年，但我都覺得自已仲好小朋友」，有網民就道出心智成熟與否跟是否自住無關：「搬出去住同心智成唔成熟無關係」、「搬唔搬出去住同個人有幾成熟無咩關係，搬出去住只係生活問題」，但亦有網民認為自住可訓練獨立：「家務要自己做，屋企大小家居電器清潔維修自己解決，其實係可以訓練獨立既」。
有網民認為就算同家人同住都一樣可以學識做家務及煮飯等生活技能。
有網民表示與家人同住或是自住都與個人的心智成熟與否並無關係。
有伴侶先有自住嘅需要？同屋企人住會影響擇偶？
另外有網民就認為搬出去住都需衡量自己嘅經濟能力：「自己一個搬出去住成本好高其實，都要有能力先得」、「搵得幾萬蚊一個月邊夠搬出來住呀」，所以有網民就覺得其實可與家人共住係一件好事：「你弱智？有得痴(黐)屋企點解唔痴(黐)？搬出去住好x煩又要駛(使)多好多錢」、「搬出去多好多使費，無辦法累積資產，成世幫地產商打工，同屋企人住，做十幾年野已夠財自」、「有屋企痴(黐)係好幸福嘅，請珍惜」。
＿而對於樓主呢個情況仲係與家人同住，有網民就認為其實並無問題：「香港大把人係咁啦，唔知你單身定點，就算拍緊拖會搬出去都係少數」、「有咩問題，你唔係有錢人儲到夠錢上車先搬出去囉」，亦有網民認為喺有另一半嘅情況下才有需要搬：「單身寡佬邊個理你丫..除非有老婆，怕婆媳糾紛，阻住2人世界先搬出去姐..」、「單身x有人理你咩，有女先搬出去都未遲啦」、「睇自己情況啦，你要結婚要生仔就一定要搬啦，疊埋心水一世單身，咁又無需要搬」，有網民則認為要視乎自己於家中嘅角色係點：「都睇你響(喺)屋企咩角色，最差當然係響(喺)屋企做廢人，唔煮飯唔做家務唔洗廁所，但亦有另一種就係屋企所有事都要你處理，所以先要你住響(喺)老豆老母屋企，調返轉係你睇住頭家」。
但亦有網民認為三十歲人應要獨立，不應再與家人同住：「正常人30歲都應該買樓啦，仲痴(黐)住屋企」、「30歲都仲做裙腳仔？我真係接受唔到簡簡單單隨時帶條女上黎都唔得，你地點生活？」、「30歲有老婆、有樓、有車、有小朋友好基本，而家要加埋移民英國先叫完整」，有網民更認為近三十歲仲同家人同住的話，於擇偶方面會有影響：「身邊好多單身狗90後都係跟屋企人住，又唔識獨立又諗野唔成熟，其實d(啲)女一揀就揀d(啲)自己出黎住既男仔嫁(㗎)啦，起碼識得照顧自己，唔洗(使)下下湊仔咁款，無錢買樓都可以租既者(啫)，30歲都同阿媽住，真係幾x下。。。」，亦有網民表示呢個現象只有喺香港先常見：「得香港人先咁弱智，30、40歲人仲痴(黐)住屋企人住」、「Exactly，美國人18歲就搬出黎自住，每年淨係thanksgiving day先返去探屋企人，呢啲先正常」。
有網民認為其實能與家人同住是一件幸福的事，亦能更容易累積財富。
有網民認為單身情況下與家人同住並無不妥，而當有伴侶才會更需要有自己的空間。
亦有網民認為三十歲是一個不應再與家人同住的年紀，若與家人同住會對擇偶有影響。
港生活人氣本地熱話
↓【限時搶⚡】Orca Skincare芭絲特貓神魔幻養肌蜜粉↓
↓櫻花粉色增添紅潤血色感｜蜜桃粉橙色提亮膚色↓
【寵主請留步】《社群》送您AQUA PRO+TECH「寵物護理入門套裝」🛁！
