床上吊櫃意外多?風水唔好又有壓迫感? 網民熱議:睡房係咪唔應該裝床上吊櫃?

2022.08.17

香港地寸金尺土,一般人嘅屋企都未必會有太大空間,而為咗收納或者擺放雜物,有人就會選擇於牆身安裝吊櫃,但若果吊櫃係安裝喺床上面的話,大家又覺得會唔會有問題呢?最近就有網民喺連登討論區上發帖,詢問一眾網民對於床上安裝吊櫃嘅睇法,並表示自己不能接受睡房內安裝床上吊櫃,害怕吊櫃會因安裝不穩而令自己受傷,結果就引起一眾網民熱烈討論:睡房其實係咪唔應該安裝床上吊櫃?

床上吊櫃好易跌?既唔方便又有壓迫感?
樓主表示自己接受唔到於床上安裝吊櫃,全因擔心床上吊櫃唔安全:「成日覺得訓(瞓)覺係人類最脆弱最無警覺性既時刻,訓(瞓)訓(瞓)下如果個吊櫃唔穩跌落黎就GG,仲要好多時都係做係頭上,真係想多d(啲)儲物(空間),我寧願做地台」,有網民就對樓主嘅睇法表示認同,同樣對床上吊櫃的安全性有所擔心:「瞓覺時真係有咩徵兆都留意唔到,我就唔多夠膽」、「自己訓(瞓)個位上邊整個吊櫃真係ONx,整個地台櫃都係一x野放到咁多野,只係升高左,好過訓(瞓)訓(瞓)下怕個櫃放得太多野,頂唔住跌落黎」,「咪搞…都唔知啲螺絲幾時攰」。

有網民更以親身經驗表示發生過吊櫃跌下嘅意外:「以前床頭頂有個書櫃仔,有一日真係跌咗落嚟,好彩細個成日前後倒轉訓(瞓),咁啱唔係訓(瞓)正櫃嗰邊,如果唔係就成個櫃跌落塊面度」、「以前廁所個吊櫃真係跌過落黎,同死神擦身而過,前後唔夠20秒」、「真係危險,千祈唔好裝。自己老竇就係咁瞓覺時吊櫃跌落,好好彩只係老竇避到但隻耳仔要縫針住院2日。但已搞到兩老有陰影。」

亦有網民表示除了安全問題之外,於床上安裝吊櫃其實並不方便,亦會帶來壓迫感:「接受唔到,好有壓迫感,成日形(縈)住會跌,最多接受地台床」、「呢啲櫃大都冇用,你又唔敢放好重嘅嘢,其次,唔跌都有壓俾(迫)感,其實將個櫃放喺床下面又易拎,張床升高又未到祿(碌)架其實幾爽」、「呢d(啲)設計好多唔方便使用,例如放野拎野唔方便、放重野搬上搬落辛苦、清潔困難.....等等」,更有網民指出於床上安裝吊櫃會影響風水:「訓(瞓)覺俾重野砸住,風水勁差」、「由細到大都已經知床上頭頂如果有櫃有架壓住個(人)係風水唔好」、「頭上整櫃聽講會風水唔好,之前裝修唔識,諗住整多啲收納位,跟住即刻俾個師傅話唔好咁整」。

有網民認為於床上安裝吊櫃並不安全,會增加意外發生的機會。

亦有網民認為床上吊櫃會令人感到壓迫而且並不實用,其設計亦會令屋內風水變差。

安裝得好就唔會跌?空間不足先唯有用吊櫃?
亦非所有網民都認同樓主嘅說法,有網民就認為其實吊櫃係相當之安全:「我屋企以前係用呢D(啲)設計,然後我自己拆,係有多枝入牆長釘,所以都穩陣」、「其實上多幾口螺絲其實真係冇乜可能會跌,香港又唔會地震,如果床頭床尾有support就更加好」、「你知道啲螺絲咩構造就知道唔會跌。會跌落嚟只可以講抵死,亂咁搵啲19師傅做」、「安全做得好就無乜分別,吊燈直上直落,要計危險吊燈仲危險,做得吊櫃理論上都會打幾粒爆炸螺絲入牆,做得好一d(啲)都唔會危險」,有網民更認為有人是過份擔心吊櫃嘅安全性:「咁驚的話,分體式冷氣機部室內機都有機會跌落黎」、「出街都會比車撞啦,有d(啲)擔心係多餘」、「太多無謂顧慮就冇意思,天花燈都有機會跌啦,唔通全部坐地咩」。

有網民則認為選擇安裝吊櫃都係迫不得意,只因香港人大多嘅居住空間都過細:「有錢有地方邊個想咁整,唔通你日日拎衫都開地台?」、「當然地方若夠大唔會想咁整,香港土地問題,整一兩個吊櫃好駛(使)好用」、「地方細係咁,邊個唔想住豪宅,有得揀咩,又想要床又要儲物但地方又細,無錢就咪咁x多要求啦,求x其就算」、「整得吊櫃都係因為唔夠位,唔夠位因為窮,窮人條命係賤d(啲),好合理」。

另外有網民就建議若想有更多收納以及儲物空間,除了安裝吊櫃外亦可考慮用碌架床、超高床等:「可以(用)碌架床,上架床、下架衣櫃/書櫃。感覺上安全啲」、「用d(啲)一體式囉,宜家興超高床,下面兩三格櫃桶啦」、「而家興地台櫃啦,唔用吊櫃喇,好高風險」、「做地台或者買變形床好過,裝吊櫃要靠師傅手勢,有啲驚」。

有網民就認為害怕吊櫃會跌下是過份擔心,吊櫃若安裝妥當其實非常安全。

有網民則認為大多數人都因屋內空間不足,才會在不情願下選擇採用吊櫃以增加儲物空間。

亦有網民建議可採用碌架床、超高床、變形床或做地台等方式以增加房間的儲物空間。

text/Jonathan
photo/HKET圖片庫
============
同場加映:
【蝸居睇樓團】鑽石山23年4房居屋型格翻新!深木色配花磚搶眼玄關+愛心玻璃觀鳥房

用App賺U Fun換獎賞!

會員登入U Lifestyle App即可領取
迎新禮遇 150

立即登入領取

↓【隆重登場】香港咖啡地圖2022!↓

↓即睇精選50間咖啡店(附評分及介紹)↓

即睇精選50間咖啡店(附評分及介紹)

↓「App限時搶」大派禮品↓

↓記得逢星期三3PM入App搶!↓

記得逢星期三3PM入App搶!

評語

相關文章