中上環又舊又唔方便?但勝在氛圍夠好? 網民熱議:中上環一帶究竟好唔好住?

2022.08.25

中環以及上環一帶主要為香港嘅商業中心地區,每日都會有唔少人去呢一帶地區返工,如果係作為居住地方的話,中上環等地又究竟好唔好住呢?最近就有網民喺連登討論區上發帖,表示自己認為住喺中上環一帶有優亦有劣,並問到一眾網民對居住於中上環有何睇法,而網民們都熱烈地參與討論,紛紛發表唔同意見!

中上環啲樓又舊又殘?返屋企都行到一身汗?

樓主就認為住喺中上環一帶嘅好處為該地區嘅建築群依山而建會令人有一種特別嘅感覺以及居民質素普遍較高,而缺點則為多酒吧的原故,亦會有較多機會遇上醉酒人士,以及樓齡偏高且多數為唐樓必需要行樓梯,亦因建築群依山而建的關係,經常要行斜路,出入都會比較辛苦。而一眾網民亦紛紛發表自己嘅意見,有網民就認為以居住嚟講,中上環一帶缺點多多,完全唔好住:「係果(嗰)頭返過工,我自己就好唔鐘意,出街要上上落落,夏天好熱好辛苦。食野就一係好貴,但有好野食既,一係就平野但勁難食,可能我唔識搵野食,好似無咩中價或者平民美食既選擇咁,住就睇過d(啲)單位,基本上都四正實用,但好多都係舊樓,好易有漏水之類既野」、「係中環送過外賣,完全唔知中環邊忽好住,樓舊多唐(樓),食肆選擇少又貴,行人路依山而起行x到爆汗氣咳,啲路又窄車又多,空氣極差,娛樂又少,揸車落lkf(蘭桂坊)、大館個(嗰)帶酒吧又唔方便,星期日直頭變賓妹樂園污煙瘴氣」

有網民則認為住喺中上環一帶交通極之唔方便:「唔好住,朝早塞車塞死你,9點打後=死城,隔涉」、「咁唔方便,又要上山落山,行死人咩,冇交通,冇商場,冇球場體育館,輸晒比屯門」、「住過中環,出街記得帶齊嘢,再行返屋企真係半條人命,太多斜路樓梯」,亦有網民認為該區物價極高:「月入無5萬都咪住果(嗰)頭,住窮你」、「ifc嘆下冷氣就得,啲舖頭同戲院乜都貴其他區幾倍」,更有網民形容該區嘅居住環境似深水埗:「只係覺得係高級D(啲)既深水埗,硬件用返70-80年代,唐樓街道好聽D(啲)叫古式(色)古香,難聽D(啲)叫又殘又舊,仲要多麈多車」

有網民認為中上環有著交通不便、多斜路、食肆選擇少並貴、多舊樓唐樓等等的缺點,並不是一個好住的地區。

亦有網民認為中上環該區物價極之高昂,比起其他區高出幾倍,需收入高才足夠負擔得起。

中上環相對較靜?氛圍亦一流?

網民意見亦並非均認為中上環一帶唔好住,有網民就認為中上環該區其實相對較清靜,買嘢食嘢亦方便:「住緊嗰頭嘅唐樓,好處係屋企附近勁多超市,落樓下唔洗(使)兩分鐘就到,食嘢其實還好,係多貴價餐廳,但一樣有正常價嘅嘢(講緊$4x碟頭飯連嘢飲都做到)」、「上環幾好呀平時唔多人,星期六日更加清靜,又多嘢食,樓梯同斜路係多咗啲,對老人家來講就有啲唔方便,我嗰邊冇乜酒吧所以夜晚都唔算好嘈,舊樓係多仲要行樓梯,不過相對實用」、「星期6日假期夠哂靜,周圍多果(嗰)D(啲)藝術鋪、cafe,又無太多D(啲)茶記酒樓搞到環境污糟,朝早落去cafe哄(嘆)著咖啡應該會有種去左(咗)外國feel」、「米芝蓮餐廳大部分係中上環,仲有好多舊港式老字號都係中環多,如果講特色,中西區有齊洋日中印各地特色菜,仲要唔係大集團啲垃圾,真正由外國人煮返佢地既家鄉菜」,更有網民指出中上環一帶擁有優良嘅校網:「住中西區最屈機嘅野係校網,九龍區有九龍塘,港島就係中西區校網獨大,想搵間廢啲嘅中小學都難」

亦有網民認為中上環一帶勝在氛圍極好,適合慢活嘅生活方式:「中上環係sell個vibe,舊城窄巷,中西交流,遊閑既local community,唔會太多人,朝早落樓真係可以同街坊say個hi,例如太平山街一帶,請(講)緊既係個(嗰)種生活方式,確實係好吸引」、「住荷里活道唐樓,Vibe幾好,上少少太平山街放假(去)cafe hea吓,樓吓(下)西餐bar為主,無想像中咁嘈,樓吓(下)鬼佬都係飲杯嘢傾吓偈」、「中環荷里活道一帶係香港嘅Old Town,真正有歐洲城市feel」,有網民更指出外國人會特別鍾意中上環嘅呢一種氛圍:「個vibe真係正,又chill,又慢活,D(啲)鬼佬最like呢種」、「好多有錢外國同事勁鍾情唐樓,可能佢地係鍾意花樣年華果(嗰)種feel既舊香港」

另外有網民就提出只有香港人會鍾意屋企樓下係大商場呢個現象:「客路唔同姐,其實得香港人鐘意住d(啲)一個屋苑十棟,樓下商場,成萬人share一齊用,大部份其他國家既人都係分開住宅,商場,同返工地方,唔會住商場上面,星期六日要去商場就渣車去」,有網民亦隨即表示認同:「呢樣真,屋企樓下九萬幾人走黎走去,想舒服落街食個早餐都要又排又逼餐死,然後話呢d(啲)叫好住」、「個(嗰)d(啲)其實先叫做有生活氣息,連d(啲)街坊都nice d(啲)chill d(啲),D(啲)商場盤就成班行屍走肉既人咁,衝衝忙忙,乜都趕頭趕命,完全無舒服可言,一d(啲)生活氣息都無,得求生存既感覺」

有網民認為中上環居住環境較寧靜,有極多不同類型餐廳供選擇,而且擁有優良校網。

有網民則認為氛圍為中上環最主要的賣點,適合外國人以及喜歡慢生活的人。

亦有網民指出只有香港人普遍會喜歡居住於擁大型商場的地區,缺乏生活氣息。

text/Jonathan
photo/HKET圖片庫
============
同場加映:
【蝸居睇樓團】元朗520呎市中心樓!
變私人打卡cafe 展示旅遊手信+清新木系庭園風

用App賺U Fun換獎賞!

會員登入U Lifestyle App即可領取
迎新禮遇 150

立即登入領取

↓【隆重登場】香港咖啡地圖2022!↓

↓即睇精選50間咖啡店(附評分及介紹)↓

即睇精選50間咖啡店(附評分及介紹)

↓社群送禮!贏走人氣網上超市現金券!↓

多玩多中!立即參加!

多玩多中!立即參加!

評語

相關文章