唔少人買樓或租樓，都好重視單位嘅座向同屋外環境，有網民就喺連登討論區發帖，話自己住村屋地下，周圍都係其他村屋，逼住晒，間屋無陽光射入來，詢問其他網民究竟問題大唔大？網民唔單止講咗一堆缺點，更加熱烈討論揀屋邊個方向好，而且仲有網民認為西斜其實都有優點，點解呢？
無陽光入屋，買枝太陽燈得唔得？
一聽到樓主呢個情況，網民即刻話情況不妙：「無太陽曬下間屋咪濕氣重啲、牆身易發霉咁囉，咁你問風水個啲又唔識答你喇」、「好大問題，影響荷爾蒙褪黑激素」、「超大問題，住得耐個人會越來越無精神」，有網民建議：「長開抽濕機啦」，亦有具創意嘅提議：「買支太陽燈解唔解決到？」，但最估你唔到嘅，都係呢個諗法：「係（喺）出面裝塊鏡折射入屋得唔得？」，即刻有網民擔心：「會著火！」、「唔聚焦得唔得？」，有網民就認為：「光煞，風水上唔好」，不過就住呢個做法，有網民提出另一個創意問題：「其實我都想問俾商廈玻璃幕牆折射西斜入屋，個d陽光仲有冇殺菌效用？」
網民話長時間住喺一間無陽光嘅屋，人會愈嚟愈無精神。
間屋無陽光射入屋，會比較潮濕，網民話要長開抽濕機。
有網民好有創意咁提出：如果買枝太陽燈，或者喺外面裝塊鏡折射陽光入屋，其實有無幫助？
住向東南樓，想瞓晏啲都唔得？！
呢個問題更引起網民熱烈討論揀屋究竟邊個座向最好，似乎東南同西南嘅票數最高：「東南 / 西南 > 南 > 向北狗都唔住啦！」、「住緊西南，真係好正，夏天太陽唔入屋，冬天可以日光浴」、「一定係東南，朝早有太陽曬入屋個人都精神啲，曬左成朝到下晝又涼返啲」、「只講方向一定是東南or正南最好，但加埋其他因素，例如景觀、東南正南向樓景園景，西斜向海，咁又不一定就會選東南」。不過亦有網民認為向東樓唔好：「春天吹東南海風，濕X死，朝早太陽直射入屋，曬+熱，瞓多陣都冇」、「咁又真，我向東南偏東，而加（家）朝朝8點準時熱醒，提早叫醒我返工。冬天都還好，太陽9點先曬到熱」。
大部分網民都認為向東南或西南嘅樓係最好。
揀屋係西斜先係爽？！
但原來有網民對向西嘅屋，情有獨鍾：「咁即係其實冇最好啦，都係景行先，不過我買樓都鍾意向西，香港太X潮濕啦，五六點西斜啲陽光好爽好舒服」、「揀屋係西斜先係爽」、「夠乾爽」、「向西有西斜唔明有咩唔好，一年四季，春天冬天陽光最好，照入屋不知幾爽，如果東邊有窗仲爽，長年對流風，可能我變態d ，住屋最少要求有一個向西既窗」。不過大部分網民都唔認同：「我西斜到正，weekend係（喺）廳要開兩部冷氣、一部會出汗」、「我住過西斜向海，熱到嘔」、「西斜到夜晚9點牆身仲熱緊，不了不了」。
又有住向北單位嘅網民問：「向北有咩唔好，利伸：單位向北」、「向北，冇陽光直接入屋，仲要俾隔離折射入屋，係咪極差？」，網民回應：「係，會個人精神差，搞到易做錯野，而且死氣沈沈」、「如果單位開揚，季候風食到應，好似打風咁」。
有網民認為西斜嘅樓其實夠乾爽，係一大優點，不過大部分都認為熱到嘔，絕對唔係好選擇。
網民認為如果單位向北，遇上冬季嘅季候風，隨時大風到好似打風咁。
text/joyce
photo/HKET圖片庫
============
同場加映：
【蝸居睇樓團】元朗520呎市中心樓！
變私人打卡cafe 展示旅遊手信＋清新木系庭園風
港生活人氣本地熱話
↓【限時搶⚡】La Maison du Chocolat 冰雪朱古力禮盒↓
↓香脆朱古力外層｜配上軟滑朱古力慕斯↓
↓【限時搶⚡】卡樂B粟一燒熱浪香辣味！↓
↓ 粟一燒結合熱浪，香辣惹味！↓
