元朗520尺市中心樓 變私人打卡cafe 展示旅遊手信、清新木系庭園風

2022.08.23

今次介紹嘅蝸居同平時唔同,屋主冇搵到室內設計公司幫手,而係同相識多年嘅朋友合力設計呢個單位。有別於一般嘅日式、北歐風或工業風,屋主更加希望營造旅遊手信主題嘅家居,令人好似置身於旅行之中,再配合Earth Tone色系及大自然嘅元素,營造出文青休閒嘅感覺,恍似喺咖啡室品嚐慢活人生一樣!屋內更有多個區域展出來自世界各地嘅紀念品,即刻睇睇仲有啲咩特色設計啦!

男戶主可以話係「旅遊狂」,曾經遊歷多個國家,收藏咗好多紀念品,佢希望新居可以將紀念品好好展示出來,等佢可以同朋友一同細味每個旅遊故事,令人有種置身於旅遊嘅感覺,所以就構思出一個旅遊及文青兼備嘅設計。

全屋以Earth Tone暖色系及大自然元素為主,包括:木、石、泥、植物、水等,無論客廳、睡房或書房都有唔少實木傢俬及設計,配合植物作為做裝飾,簡約得嚟又帶點生氣。


由於單位樓底高,屋主喺客廳、飯廳及睡房都選用了吊燈,配合原木層板作點綴,暖光照射出來更有氣氛。


門口對住嘅呢個位置就做咗道暗門,除咗可以遮住工作平台嘅門口,改善「直入直出」嘅風水問題,仲特地整咗塊磁石板,收藏屋主喺世界各地買返嚟嘅磁貼。


白色牆身較易整污糟,所以就喺暗門嘅開關加上白色「貝母」紙皮石嘅拼貼,延伸至飯枱旁邊嘅牆壁,既有裝飾效果,又唔會覺得突兀。


成個客飯廳我最鐘意就係呢個打卡位,真係好I-Gable啊!


呢幅漸變色嘅牆就用咗五種同色系,但係唔同深淺度嘅乳膠漆嚟營造出日出日落嘅感覺,滿滿氛圍感啊!
長木凳下面嘅石頭cushion實用得嚟又貼近大自然~


成個客廳最吸睛就係呢盞樹枝燈啦,喺樹枝同吊燈掛上其他裝飾又可以營造唔同嘅風格,主題可按照節日靈活變動~


以往屋主收藏嘅特色小擺設冇適合嘅位放置,而家新居經過規劃之後就可以好好咁展示出嚟!但又考慮到傳統嘅展示櫃睇落比較單一,所以就利用多個「木紋方型骰仔櫃」組合成一個特色展示架。


窗台就運用咗尺寸不一嘅實木條,拼湊出四幅有層次感嘅窗框飾面,再配合度身訂造嘅「咖啡檯」。屋主嘅朋友就可以喺度飲茶、睇書、欣賞下旅遊手信,仲有得睇埋日落添啊!


貫徹全屋嘅主題,睡房都用咗好多木元素做裝飾,包括牆身置物架、木框玻璃畫、實木窗框。而側邊呢隻窗仲做咗個可調節嘅木窗簾,既可以遮光,又唔會阻擋外面嘅風景。


由於屋主唔多雜物,所以睡房冇選用擁有收納功能嘅地台床,轉為改用懸空地台床,望落去更有空間感。


【Info】
裝修支出表:
預備工程 $15,000
水電工程 $20,000
油漆工程 $55,000
泥水工程 $50,000
傢俬及木器工程 $90,000
雜項工程 $20,000
-------------------------------
總數:$250,000


text/Phoebe
photo/Kuen

用App睇片‧賺積分‧換獎賞!

認住 U Fun 標誌「」, App內睇文同睇片可隨時捕捉U Fun彩蛋, 換領現金券及禮品!

開啟 App 成為會員賺U Fun!

↓【U Lifestyle App聖誕周年慶】DayDay送大禮!↓

↓勁送機票/電話/遊戲機等巨獎!↓

↓勁送機票/電話/遊戲機等巨獎!↓

↓「U Lifestyle App限時搶」↓

↓逢星期三3PM入App搶!↓

↓逢星期三3PM入App搶!↓

評語

相關文章