牛頭角下邨交通好方便？海達邨、油塘邨有海景？ 網民熱議：全港邊一個公共屋邨配套最完善？
據香港房屋委員會資料顯示，香港現時一共有191個公共租住屋邨，而喺眾多嘅公共屋邨之中，究竟邊個所擁有嘅配套係最好呢？最近就有網民喺連登討論區上發帖，問各網民認為香港邊一個公共屋邨配套最好、最完善，結果就引起一眾網民熱烈討論，紛紛提出各自心目中所認為配套最好嘅公共屋邨以及當中嘅原因。
牛頭角下邨有超多條巴士路線？某幾個屋邨配套完善仲有海景？
樓主表示自己就認為牛頭角下邨係全港配套最好嘅公共屋邨，原因則為牛頭角下邨位於九龍區，鄰近有九龍灣港鐵站，交通非常方便，而購物及消閒方面亦可去德褔廣場以及牛頭角街巿。有網民就認同樓主嘅講法，認為牛頭角下邨配套最好：「牛頭角下邨，大部份文娛康樂設施都有齊，附近(有)：戲院、圖書館、運動場、泳池，民生配套嘅街市、超市都有，去醫院又近」、「牛頭角下邨，交通：地鐵站上蓋，觀塘道(有)68條巴士線，民生：有佐敦谷泳池，有DONKI，除左(咗)冇壽司郞(郎)之外，諗唔到缺點，仲要係半新樓」。
有網民就認為位於黃大仙區並於近年新落成嘅啟鑽苑配套最好：「啟鑽苑，全部可行步程，返工：新蒲崗工業區，九龍東商貿區，買(嘢)、食野(嘢)：樓下公屋商場、mikiki、荷里活廣場、新蒲崗大量民生小鋪食店，交通：樓下兩分鐘地鐵，龍翔道巴士站基本上香港你講到的地方都可以一程車到，屈機。」亦有網民認為同樣位於黃大仙區嘅鳳德邨配套亦不錯：「鳳德邨，配套除咗附近無大政府醫院，乜都齊，地點旺中帶靜」。
亦有網民認為鄰近於南昌港鐵站嘅海達邨以及富昌邨先係最好：「海達邨真係痴(黐)x線，有條橋直接過去南昌站，去荔枝角有(又)得，有啲仲要有海景」、「海達(邨)高層海景仲可以睇到煙花，你匯璽成千萬望富昌邨果(嗰)d(啲)新年都只可以睇住電視放煙花」、「富昌(邨)，近南昌站，又有V Walk同公屋商場，有d(啲)又有靚境(景)，仲要係20年前公屋，size唔細」，有網民亦指出位於油塘嘅鯉魚門邨以及油塘邨除咗都有海景之餘，配套亦同樣完善：「油塘邨，交通方便、地鐵站上蓋，有瓦遮頭去商場，海景」、「鯉魚門邨、油塘邨唔止有屋邨商場，仲有個大商場，又多巴士線同近地鐵站，仲要望到海」。
有網民認為牛頭角下邨交通極方便，除了鄰近九龍灣港鐵站外，亦有多達68條巴士路線可供選擇，而大部份文娛康樂設施亦一應俱全。
有網民就指出海達邨、富昌邨、鯉魚門邨以及油塘邨除了配套完善之外，邨內單位更望到海景。
葵芳多日本品牌商鋪？乙明邨背山面河仲有泳池？
網民認為配套最好嘅公共屋邨亦不止限於九龍區，有網民就認為葵青區嘅葵翠邨以及荃灣區嘅祈德尊新邨配套亦好好：「葵翠邨，近mtr，乜巴士都有，又有新都會、葵廣」、「葵芳幾屈機，交通冇得頂，先唔講鐵路，極多巴士路線，近呢幾年，新都會又大翻新，無印、一田、壽司郎進駐，有運動場、沙排場、體育館，唔係話最好，不過生活真係好方便」、「荃灣祈德尊新邨(其中一座公屋)，依家都係屈機，天橋連接成個荃灣，五分鐘鐘(到)荃灣西，又可以選擇行去荃灣站，就近又有楊屋道街市，又(有)室內運動場」。
亦有網民認為沙田區嘅乙明邨同瀝源邨都擁有完善嘅配套：「乙明邨，有埋游泳池」、「乙明邨個景又唔錯，背山面河，行去市中心又得，又有沙田圍站，可惜就舊左(咗)啲」、「瀝源邨，天橋直通沙田站+沙田市中心各大商場，對面游泳池+沙田公園，返工可以去石門/火炭，樓下(有)瀝源街市/沙田街市，又有巴士總站，仲有埋政府診所，睇醫生都唔洗(使)搭車」。
有網民認為葵芳除了有無印良品、一田超級市場及壽司郎等多間日本品牌商鋪之餘，亦擁多條巴士路線及多個不同運動場所令生活極為方便。
亦有網民認為位於沙田的乙明邨配套完善之外，更背山面河以及擁有游泳池。
港生活人氣本地熱話
↓【限時搶⚡】Dermeze得美滋無皂清潔沐浴乳↓
↓修復、補濕滋潤、鎖水保水｜遠離乾燥和粗糙↓
↓【限時搶⚡】Stecco Natura意式雪條↓
↓免費意式雪條｜杯裝意式雪糕買一送一↓
