網民熱討:將軍澳兩房單位 蔚藍灣畔、維景灣畔同新都城點揀好?

2022.09.01

近期樓價下跌,好多有意置業人士都想把握機會上車,不過萬一揀錯樓,都真係好麻煩!有睇中將軍澳樓嘅網民就喺連登討論區發帖,徵求網民意見,問喺新都城、維景灣畔同蔚藍灣畔之中,究竟要點揀好?引嚟網民媲美「泥漿摔角」式嘅熱烈討論。

樓主表示自己買樓預算大約800萬,想搵間保值嘅兩房單位,夠兩個人住,得閒又可以有空間請朋友嚟屋企玩下。樓主本身都分析咗呢三個屋苑嘅優同缺點:

1.蔚藍灣畔 (500呎 兩房) 現價都要8.5m
優點:坑口樓王,會所設備ok,坑口配套完善
缺點:不過就有露台又有窗台,廳好窄

2.維景灣畔(500呎 兩房)價位就8.5-9m
優點:風評好,保值
缺點:尺價貴,配套商場檔次較低

3.新都城(524呎有三房)價位7.5-8m有得deal
優點:呎價平,多間房好用啲,管理費平,配套完善
缺點:廳偏細,成個樓盤偏舊。個人覺得同為廿年樓,佢既整體感覺舊同市場價值低

樓主研究過蔚藍灣畔嘅單位,嫌有露台又有窗台,而且廳好窄。

新都城嘅呎價同管理費比較平,但感覺比較舊。

自駕、養狗人士宜揀維景灣畔
呢三個屋苑揀邊個好,引嚟網民展開咗熱烈討論,意見百花齊放,但普遍都話如果自己駕車嘅話,維景灣畔揀得過:「維景啦!揸車仲要有條私家路出九龍」、「會唔會揸私家車?會,維景;唔會,新都城(地鐵一定有位坐)」、「自己渣車就維景,坐黨鐵就蔚藍,新都城就絕不揀,寶琳又多童黨,又舊又殘」。維景灣畔另一好處,原來係可以養狗:「維景可以養狗同大部分無露台,怕狗嘅要考慮下;出九龍維景轉少過坑口一次車,不過個人鐘意隔離都會多D,無狗+露台+靚會所」。

有首選揀維景灣畔嘅網民就咁樣比較呢三個屋苑:「我自己排:維景>慰(蔚)藍>新都,維景環境感覺無咁逼,同埋MTR 班次密,有晒寶琳康城嘅車,起(去)九龍又唔洗轉多次車,揸車私家路反而條橋開左優勢無咁明顯;慰(蔚)藍係ok 但環境感覺逼,由其對住東港城個邊;新都城就附近太多公屋同舊殘」。

維景灣畔唔少單位有海景,仲可以養狗。


維景灣畔鄰近調景嶺站,但網民話如果自駕,有條私家路直出九龍,比搭港鐵更方便。

蔚藍灣畔近港鐵  露台超正
但若果日常會以搭港鐵為主嘅話,網民就認為應該揀蔚藍灣畔:「講方便一定新都、蔚藍,樓下大商場地鐵站計埋搭lift都係5分鐘」。至於樓主認為係缺點嘅露台,網民就話其實係賣點:「蔚藍出咗名樓王,個露台先至係最正嘅賣點,佢唔係新樓嗰啲垃圾工作平台,係真係一個拎嚟用或拎嚟chill都得嘅露台!地鐵班次係唔洗擔心,過康城車就真係少,坑口寶琳其實多車」,有網民全面分析:「長遠淨諗自住:蔚藍,會所正,地鐵正上蓋,樓下4個商場生活配套齊,生活質素較高;缺點:同區比較放租回報較低」。

網民認為蔚藍灣畔會所正,樓下商場生活配套齊全,自住十分值得考慮。

網民亦認為蔚藍灣畔單位嘅露台夠大兼好用,絕對係賣點唔係缺點。

蔚藍灣畔直駁港鐵坑口站,十分方便。

新都城管理保養差
至於新都城,優點係價錢比較平,同價錢有機會買到3房單位,但舊同管理,似乎有啲問題:「將軍澳人揮手!雖然住過新都城但都投蔚藍一票,新都城d管理幾年前開始差好多,舊又未算好舊,但啲外觀真係過時,維景唔係揸車真係唔建議,但鍾情海景就一定係維景」、「有親戚做物管就係做正新都城2期,佢話好多維修都係求其做,例如漏水佢地唔會搵源頭,你睇唔到再漏水就算,所以啲嘢整完又整,保養又差。另外我揸車泊入佢停車場,長期一陣屎味,唔知係唔係屎渠老化出左問題(呢個純斷估無supporting)。相反東港物管做得幾好,內園啲嘢算係企理,但一樣有老化問題,之前爆鹹水浸停車場」、「新都城,平only,又殘又舊,管理不善,留意如果就到維修期,大把野執,如果budget唔係好緊盡量唔好諗」。

不過有網民就覺得,其實將軍澳區仲有其他樓盤,可能更加啱樓主嘅需求:「將軍澳中心有露台果座有哂你要嘅嘢」、「佢個筆直買將廣就最好,市中心+唔駛怕康城車,又無露台又新過新都城」、「將軍澳區我會咁:近鐵:天晉>蔚藍>將中將廣君傲>維景三期>新都=康城=都會;唔近鐵:天晉3B=Monterey>海天晉=帝景>海翻匯=Alto=Capri=嘉悅>維景一二期>Savannah」。

有網民表示新都城嘅外貌比較老土之外,近年嘅管理愈嚟愈差,好多如漏水等問題出現。

有網民建議樓主可以考慮埋將軍澳其他屋苑,例如將軍澳中心。

text/Joyce
hoto/HKET圖片庫

============
同場加映:
【蝸居睇樓團】沙田380呎舊公屋變身日式部屋!3大WFH寫意空間:地台床變儲物櫃、麻雀枱

用App賺U Fun換獎賞!

會員登入U Lifestyle App即可領取
迎新禮遇 150

立即登入領取

↓【送禮】送您5G智能電話及寵物店現金券!↓

↓ 立即分享貓狗相片 贏走豐富禮物!↓

立即分享貓狗相片 贏走豐富禮物!

↓「App限時搶」大派禮品↓

↓記得逢星期三3PM入App搶!↓

記得逢星期三3PM入App搶!

評語

相關文章