網民熱心分享:裝修點樣先唔會中伏!點樣上門監工而又唔得罪裝修師傅?

2022.09.09

幾乎每個裝修過嘅人,都會同你吐一大輪苦水,包括同裝修師師嗌交,以及中伏!有網民好細心咁將自己跟進裝修過程嘅心得,喺連登討論區同網民分享,仲同網民展開咗一輪裝修如何避免中伏嘅交流!究竟要點樣搵裝修公司?點樣親身上門監工而又唔會得罪班裝修師傅呢?裝修使唔使買保險?最後,樓主嘅裝修工程究竟有無中伏呢?就算無打算裝修,睇完都學到嘢呀!

樓主嘅裝修心得分享如下:

1.Google 間嘢係咪黑店
最基本要做嘅嘢,見住個氹都踩入去咁冇人幫到你。

2.間裝修公司有冇做過差唔多格局單位嘅經驗
去佢公司網睇下佢放出嚟晒命嘅成功例子,如果佢有經驗做過和諧式,你間屋又係差唔多樣,就可以搵佢報個價

3.平面圖
我諗有好多人都會覺得次次報價都要上嚟度尺好麻煩,其實根據2,如果佢做過差唔多嘅單位,佢又有料嘅,基本上佢可以即刻畀到幅差唔多嘅圖你。你可以跟佢幅圖執,如果你自己設計師上身畫好晒圖,你都可以畀幾十蚊R幅圖嚟對比下。

4.報價單
首先要熟知報價單應該要有嘅嘢,而唔係一句50萬全包乜X都冇,到時200個電掣係咪包?500蚊道木門係咪收貨?20蚊塊瓦仔係咪又要收貨?裝晒櫃入面嘅小五金又點計?

以下我略略講講:
A清拆 $8,964
1 拆a
2 拆b

B水喉
1套廁水龍頭 $831 etc

C電力
*寫明掣位計算方式
單蘇、孖蘇、3掣、4掣,個個師傅唔同計法
*寫明幾多個掣位
*附牆身平面圖掣位位置

樓主提醒大家要問清楚啲電掣位究竟係點樣計同有幾多個電掣位。

D泥水
呢度要留意防水用料牌子,要唔要爆牆,起牆。仲有其他傢俬尺尺價、傢俬平面圖、傢俬色碼、假天花、新追窗、淋浴屏、執漏限期、保養限期、裝修佬保險幾錢、有冇電工牌etc不能盡錄。總之你裝修有啲乜都要寫撚晒入去,包括不限於長闊高,價錢,牌子,有冇連工包料,定係戶主自購。

5.分期(付款),最少四期係基本
每做完一個工程收貨畀錢,再接下個;唔收貨,裝修佬玩嘢,直接唱臭佢再搵人接手,千其唔好格硬畀佢做落去,畀人拆X晒爛尾都可以輸少當贏

建議每做完一項工程,檢查過無問題收貨先付款,全程最少分四期付款。

6.監工
每日/每兩日睇一次情況係基本,每次影相都係基本,知道師傅開工做重要嘢,e.g 泥水、防水、地台,必須監工

7.睇YouTube
監工你唔知佢做啱做錯,其實係冇意思。上YouTube睇晒報價單入面所有工程係點做,唔識落手都要識睇。好似防水咁,佢做到膝頭哥咁高,你係咪又收貨?髹咗得一層防水,你係咪又收貨?砌完地下冇地腳線你又會唔會留意到?掃口粉知唔知點用?點樣先叫好/靚嘅收口?

8.防水
唔該請假去監工,完工自己試水,拎個花灑射翻幾個鐘。全屋嘅嘢伏晒,都唔會夠你伏個防水咁麻煩。

可能睇完會有人話,你咁X多要求,又要平又要靚又要正,搵鬼做咩?!其實做得晒上面嘅嘢就真係好難,但做得幾多得幾多,做多樣就減少一個比人搵笨嘅風險。

盡量請假去裝修現場監工,用花灑試吓浴室嘅防水做得好唔好。

夜晚上單位跟進裝修進度
有關樓主呢個細心分享,網民一致讚賞!但跟住就紛紛提出好多裝修問題求救:「師兄點搵裝修公司或師傅?」、樓主回應:「Google搵,之後間間都wts問價問圖,睇吓佢覆咩。大公司就覆得比較直接or串,佢唔預你有咩交流,一句達埋嚟50萬做唔做?細個啲就會有啲交流,問下會點搞法,預幾錢,咩圖咁,傾到兩句,事後諗翻起都覺得自己好X大膽」。

又有網民問:「巴打總共請過幾多日假?如果自己收工上去睇其實要預有幾多時間?」,樓主回應:「收工上到去基本上唔會有人開緊工,但起碼可以睇到個進度。雖然師傅唔會日日上去,但你每日隔日去,去足成星期乜進度都冇,你就要留意吓發生乜事同埋有冇拖你工期。我防水請咗兩日,裝冷氣、鋪地磚、牆磚,請咗1-2日半假睇,佢鋪完話我知踩得,就上去每塊都聽下聲有冇空鼓咁」。網民再好奇問:「班裝修佬有冇屌X晒鬼話你唔信佢?」,樓主回應:「所以多數夜晚去,同埋唔搞突襲,講到明你做邊啲嘢我會嚟睇,帶半打餅,帶幾罐啤酒可樂,佢開心我放心!」

裝修期間樓主話要盡量抽時間上單位檢查進度,建議可以先知會師傅,同帶啲飲品小食上去。

記得買裝修保險  否則有意外發生會入業主數
繼續有網民問:「CHING,其實咩情況先要全爆?」樓主回應:「好睇你本身想點住法,住耐咗,仲用緊明喉我會建議全爆,新樓冇必要全爆,咪局部搞下油漆、傢俬,搭翻自己想行咩風格,買完冇鬆動錢,本身配套ok嘅,其實唔洗執都得」。又有人問:「樓主想問吓裝修時業主洗唔洗自費買裝修保險同第三保?」,有網民幫手回應:「正常你如果係搵公司包曬嚟做,你係要要求佢買,通常合約都有列明有買幾大額嘅保險,呢啲小型工程大約1,000萬都夠,如果你係自己搵師傅搞嘅,就麻煩少少,要自己買埋啦!」、「仲有記住買裝修保險,有親戚之前冇買瀨咗嘢,個師傅跌咗嘢落街揼到人架車,入業主數」。

不過大家最想問樓主嘅,都係:「咁你個計劃咁detail,你間屋最後有冇比人伏到?」,樓主回應:「整體暫時就冇乜問題,未來就唔一定知!但伏位都有幾個,未去到好嚴重。1.清潔就伏咗,清潔得好差,最後自己再搵多間出嚟抹多次;2.冷氣機裝完,佢口口聲聲講唔會用仲好心幫我封晒,最尾都係用咗又入X晒灰,變相都係要洗冷氣。雖然本身都預咗要洗,純粹口齒問題。之後幾次有拗撬都係執漏個時,因為多數佢地同時間做幾單,成日話呢日唔得閒,聽日又要入第二個客度咁,起完新牆收水開裂搵佢補牆,又多多藉口,話嚟唔到好難就時間!但你都知啲裝修師傅唔X激得,唔受得氣!咪唯有兜大啲個圈同佢條尾數點處理brbrbr」。

有裝修經驗網民提醒要買裝修保險,有人試過個師傅跌咗嘢落街揼到人架車,結果入業主數。

雖然樓主非常小心,但裝修最後階段嘅清潔問題,都同裝修師傅有抝撬。

text/Joyce
photo/HKET圖片庫

============
同場加映:
【蝸居睇樓團】荃灣33年舊樓變原味和風居室 日式鄉村小屋廚房、主人套房衣帽間連茶室

用App睇片‧賺積分‧換獎賞!

認住 U Fun 標誌「」, App內睇文同睇片可隨時捕捉U Fun彩蛋, 換領現金券及禮品!

開啟 App 成為會員賺U Fun!

↓【送禮】送您最新iPhone 14!↓

↓立即分享美食 贏走獎品!↓

↓立即分享美食 贏走獎品!↓

↓【聖誕送禮】送Soul Emotion Pro / Emotion Max耳機!↓

↓立即參加贏走!↓

↓立即參加贏走!↓

評語

相關文章