網民熱議：點解白居二逾半中籤者棄入市？ 首期貴過私樓？日後轉手無人接？
為咗協助基層家庭上車而推出嘅白表居屋第二市場計畫（俗稱白居二），連續三年錄得過十萬宗申請，但根據房委會數字顯示，對上一輪「白居二 2020」實際只得約2,000名中籤者選擇入市，即係有約有2,500名中籤者放棄利用配額上車，係計畫恒常化以來最多嘅一次，而「白居二」嘅成交比例，已連續兩期跌至大約得四成幾嘅水平。究竟「白居二」有乜嘢問題，令咁辛苦（咁好彩）中咗籤嘅人都放棄機會唔入市呢？好多連登討論區嘅網民，都覺得「白居二」搵笨，究竟點解呢？
新少少嘅二手居屋已經係私樓價 好難買得落手！
有網民話自己就曾經係呢啲有資格但最後都係放棄咗買「白居二」嘅人：「我就係用家庭名義抽中白居二，過埋資產審查，再俾7舊水拎埋購買資格信都冇買嘅其中一個。原本睇中馬鞍山，近老婆返中大醫院，都唔明 19年居屋點解可以賣到4、5M，最終放棄。而家專心儲錢等第時供阿仔去留學好過」，但有網民就唔同意呢個做法：「有咩問題？4/5球買九龍中，得200呎咋喎！」
好多網民都覺得呢啲「白居二」二手居屋，原業主叫價太貴，樓價同樓嘅質素唔相符，仲話計過條數，不如買私樓好過：「白居二不嬲都係搵水魚，垃圾居屋賣私樓價仲要未補地價」、「白居2個價貴到咁，買個啲真係傻仔」、「呢幾年貼私樓價買白居二嗰班，真係不知如何面對」、「真！新少少嘅二手居屋個價已經係私樓level，舊嘅又做唔足按揭年數，自用都好難買得落手」、「一手居屋就話狗衝啫，居二班業主咁大咬要食咁高溢價，買唔落手都正常」、「居屋管理費拍得住，有會所嘅私樓」、「個制度有啲 on9，而家好多未補地價居屋都要四成首期，真係仲難過買私樓」、「居二有資產限制，舊居屋按揭又有限制，仲要預筆裝修錢，其實計完數唔係好多盤揀」、「4成首期要成幾十萬至百萬，買私樓新樓都可能得；水位一手業主賺晒，唔謊有下家接手，供完都唔值錢」、「居屋供完之後，下手又冇得借9成，變相冇人接層樓，點會幾百萬買層冇人接到嘅嘢，買一城，舊極都可以做到30年按揭」。
好多網民都話計返呎價，好多二手居屋仲貴過私樓，覺得唔值，寧願去返買私樓。
亦有網民擔心日後若果想將白居二單位出售，因樓齡太高按揭年期短，更難搵人接手。
按揭只借到6至7成 不如買私樓上車划算啲
有網民有嘢唔明：「無知一問，點解下手無得借9成？樓齡太舊？未補地價？」，網民熱心解答：「政府只承保30年，所以銀行只會呢30年內借9成，當層居屋啱啱過咗20年，銀行借9成，但要10年還晒。所以銀行通常只借6-7成俾20年樓齡嘅居屋，除非補咗地價」。
有網民仲好細心咁計咗條買白居二同私樓嘅上車費用比較：「其實睇你點睇，當你5球樓咁計，居屋白居二同樣大細地段都要賣3球，5球9按：50萬+雜費30萬，即係80萬，要約4萬5月薪；3球6按：要120萬+雜費30萬， 即係150萬首期。問題係你2個人搵4萬5，儲多70萬首期分分鐘要5年，呢5年仲要搵地方住！好多白居二L真係寧願上咗私樓算」。
買超過20年樓齡舊居屋嘅一大問題，係好大機會只做到6至7成按揭。
雖然樓價平啲，但若果要畀4成首期，仲可能要一大筆裝修費，令不少人卻步。
白居二根本係益咗居屋業主炒樓
有唔少網民都覺得而家白居二個買賣制度，根本有問題，其實係益咗買入一手居屋嘅業主炒賣：「富榮花園當年一手賣150-250（萬），轉手出去600-960（萬），根本係抽籤做中產」、「而家係補地價可以賣去私人市場，唔補就淨係可以賣返畀白居二，變相比居屋業主有得炒，然後就會話居屋四四方方間隔好洗，炒到二手居屋同私樓差唔多價」、「而家個溢價係貴過私樓㖭呀，啟德未補$15000/呎，仲要52折，即係補完價成$25000/呎，掉返轉如果要補地價先賣樓，條友開唔開到$25,000/呎呀？答案係開唔到$18,000-$19,000/呎都比多佢啦！居屋業主自從有咗白居二賺得仲多過之前」，有網民認為個買賣二手居屋制度應該係咁：「白居二個制度改成最高售價 = 原價（由房署按不同年份樓價升幅去計算既figure，可升可趺），抽中無得再高溢價賣樓，又畀到空間佢地換樓，居屋本身唔係投資工具」、「最正路係咁，而家政府折扣價賣俾你，hold 3年轉個頭正價賣返俾白居二，一手居屋班X樣睇住白居二嚟食」。
有心水清網民就講出咗白居二另一個令人卻步嘅問題：「無人講另外一個重點出嚟，係有幾年停賣停起居屋，令到可以做925嘅居屋少咗好多，另外好多抽中居二嘅，都想住三年，之後樓換樓，之後發現下手做唔到925 = 賣唔出，補地價又貴，結果抽中咗果班又唔買，業主就更加企硬個價，因為做到925，所以唔會平畀你。居二，跟本就係畀政府玩爛咗，就算放寛925年期，變相咪係 >20 年樓齡果堆嘅樓升返上去咁解，都幫唔到手。」
有網民認為而家嘅白居二轉手方法，簡接令二手居屋變投資工具，亦令真正想買嚟自住嘅人卻步。
text/Joyce
photo/HKET圖片庫
============
同場加映：
【蝸居睇樓團】大角咀納米樓18萬搞掂！衣櫃/儲物/梳化3合一、5大增空間感TIPS
港生活人氣本地熱話
【請您睇戲】投選您心目中的金像獎影帝影后🫅🏻👸🏻
↓立即投票贏禮物！↓
↓【限時搶⚡】Stecco Natura意式雪條↓
↓免費意式雪條｜杯裝意式雪糕買一送一↓
