屋企發現有床蝨點算好？ 網民分享各種應付床蝨方法！蚤粉、DE粉，邊隻有用？木製產品都要扔？
瞓覺嘅時候經常會畀蟲咬？可能你屋企隨時已經有床蝨！若然屋企有床蝨的話應該要點做？最近就有網民喺連登討論區上發文，指自己屋企張床最近出現咗大量嘅蟲，並附上圖問該蟲究竟係咩嚟以及應如何處理，有不少網民看圖後就確定該蟲為床蝨，並分享多項解決床蝨嘅辦法！
蚤粉、DE粉、千赤士、淘寶毒藥，邊隻有用？
在樓主附圖後，有不少網民一睇就知令樓主受困擾嘅就係床蝨，並向樓主建議多種解決床蝨嘅方法。有網民就建議買蚤粉：「蚤粉，有隻好勁話可以令蚤互相傳染，全屋周圍放蚤粉」、「買瘙(蚤)粉，放去每個間(房)每個位，殺蟲公司都係用呢d(啲)」，亦有網民建議使用俗稱為「DE粉」的矽藻土：「你第一步買DE粉大量，圍住張床邊沈(糝)啲粉落去，唔好慳，厚少少，最好清一清啲唔要雜物減少匿埋嘅機會，每日洗床單換枕頭袋」、「DE粉真係有用，我屋企都係用DE粉」，另外亦有網民推薦一款名為「千赤士」嘅床蝨殺蟲劑：「千赤士，一用就斷尾」、「買乜x de粉係無x用，買千赤士先有用」、「千赤士都好有用，不過啲人話有毒，我自己用過就覺得用完個人好乾同埋有幾聲咳，所以你自己決定啦」，更有網民指要用喺淘寶買嘅毒藥先有效：「試過蒸汽/de粉都無用，唯有淘寶毒藥一次斷尾」、「係啊！我之前困擾咗勁耐都搞唔掂！但淘寶毒藥真係用一次就斷尾，但隻毒藥勁臭！！！」、「淘仔買白僵菌，啲農民用黎(嚟)殺蟲用，一劑就收皮」
用滅蝨彈有反效果？搽苦棟油可預防被咬？
有網民就建議樓主用滅蝨彈去處理屋企床蝨問題：「買滅蝨果(嗰)d(啲)炸下間屋先」，隨即遭不少網民反駁指滅蝨彈不單冇效用之餘，仲會帶嚟反效果：「咪點人啦x你，床蝨炸佢嘅話，殺唔死佢之餘仲會搞到一屋都係」、「極度唔建議用炸彈，炸完會令佢散得更加開，會奶(瀨)野(嘢)」、「千祈唔好用炸彈，炸x到成間屋都係，你啲鄰居都多x謝你」，另外有網民就建議可於身上搽苦棟油以預防被床蝨咬：「如果唔想俾佢咬就搽印度嗰隻苦棟油，包保唔會俾佢咬，但係臭到xx，係臭到第二朝醒黎(嚟)仲會keep住浸味」
有網民建議可買蚤粉、DE粉、千赤士、白僵菌等滅蟲產品以解決床蝨問題。
有網民指用滅蝨彈除了不能消滅床蝨之餘，更會令床蝨在屋內四處散開。
要換晒所有寢具、衫褲？全屋木製產品都要扔？
亦有網民分享以往自行處理屋企床蝨嘅做法，指需清洗或更換屋內所有寢具以及衫褲：、「之前7月果(嗰)時又係比(畀)床蝨咬x到我xx，跟住張(將)成張床套所有野(嘢)去洗，跟住洗完被套有隻蝨比(畀)太陽晒(曬)到變乾屍，換過晒床套所有野(嘢)後到而家都冇咩野(嘢)」、「我朋友嗰陣搞咗半年，啲衫褲換過晒，枕頭被鋪乜x都換晒都仲有，要再曬粉同埋蒸下個床先搞掂，你參考一下」、「你唯一方法係所有衫褲同床具60度水洗兩次，再放入垃圾袋封死曬太陽一星期。洗唔到的床具買黃色蒸氣機焗。平野suggest掉x哂佢。全屋執+吸+蒸。做完上面，DE粉圍住所有人會訓(瞓)的地方3個月。如是者3個月會成功，滅蟲公司都無用，做一兩次都未必斷尾」，更有網民指需扔掉所有屋內木製產品：「呢啲好難斷尾，如果淨係房有，就要掉哂木製既(嘅)野(嘢)，當然床褥都要，唔好天真以為用炸彈炸得死，無用，如果全屋都有就..gg，我個(嗰)時搬左(咗)屋重新買傢俬先唔洗(使)再受苦，晚晚比(畀)佢地咬到痴(黐)線」
最好搵滅蟲公司？有寵物要特別用熱能處理？
而有網民就認為床蝨問題難以自行解決，建議應搵滅蟲公司幫忙處理：「唔好搞咁多野(嘢)，搵滅蟲公司搞，大boss黎(嚟)，搵完滅蟲同時仲要洗晒屋企d(啲)野(嘢)，再搵真空袋封d(啲)洗完既(嘅)衣物幾個月，先有機斷尾」、「自己搞唔掂架(㗎)，上年中過，搵滅蟲公司搞啦，要做兩次，其實我做完一次已經無曬，做埋第二次安心啲」、「得滅蟲公司幫到你，真係唔好掙扎，搵幾間報價，記得要留意埋包幾耐保養同埋d(啲)衫最好佢地幫你搞埋，如果d(啲)衫要你自己搞，你搞得唔好又黎(嚟)過，果(嗰)時搞好多野(嘢)諗住自己搞得掂，最後只係晒自己時間心機同錢」，更有網民指坊間多款滅蟲產品嘅功效都不大，遇上床蝨最好都係搵滅蟲公司處理：「唔好信de粉/天鹽清/千赤土，任何自稱天然無害既(嘅)殺蟲劑都唔會殺到呢隻野(嘢)，而且大部分一般街邊買到既(嘅)殺蟲水都殺唔死呢隻野(嘢)，最好搵滅蟲公司」、「咩DE粉、天鹽清、蒸氣機、拎晒d(啲)野(嘢)乾洗、換床、換傢俬，都唔好再做，應該第一時間就搵滅蟲公司，其實平平地幾千蚊一間噴藥嘅滅蟲公司已經斷到尾」
另外有網民就指出若家中有養寵物的話，需搵專業嘅滅蟲公司進行熱能處理：「之前屋企有，搵公司用熱能處理搞掂，屋企有貓，淨係可以用呢一種方法」、「熱能真係對人對動物都最安全，有養貓狗真係要揀熱能處理，粉都唔放得，我果(嗰)時揀左(咗)其他噴藥公司，屋企有缸魚諗住封實個頂都得，但佢上黎(嚟)噴完藥屋企魚缸都有條魚死左(咗)」
有網民指若自行處理床蝨問題，需更換屋內所有寢具以及衫褲之餘，更要用上蒸氣機以及滅蟲粉等工具。
亦有網民認為找滅蟲公司處理床蝨問題為最好的解決方法，自行處理恐怕只會浪費時間、心機以及金錢。
床蝨會經紙皮帶入屋？用熱水洗衫可預防床蝨？
另外就有網民問到其實屋企點解會出現床蝨，以及應如何預防床蝨，有網民就解釋係因為香港天氣潮濕以及屋內多木製傢俬：「香港啲屋咁多木傢俬，又細，天氣又潮濕，應該好多人屋企都試過有，如果間房無窗果(嗰)啲一定要注意多啲」，亦有網民指床蝨會經紙皮或於家外環境帶到家中：「淘寶/網購經紙皮packing帶入屋，旅行/酒店staycation跟返屋企，搭車/睇戲唔好彩既(嘅)話都有機會」、「其實所有野(嘢)都拆晒d(啲)外皮先好拎番(返)屋企，d(啲)紙皮入面有機會有」。至於預防方法，有網民就建議應將衣物以熱水清洗或用蒸氣清潔：「洗衫果(嗰)陣要較60度洗同乾，普通溫度既(嘅)水洗，洗完會未殺得死啲虱」、「真係要好小心既(嘅)話就每日返屋企蒸氣/熱風吹晒全身衣物、袋、鞋，即刻去沖涼，當然加埋買任何野(嘢)(例如有紙皮箱果(嗰)啲)都要處理」，亦有網民建議新購的木製傢俬應要先用熱風機處理：「其實買返黎(嚟)果(嗰)陣用熱風機吹一轉啲木製傢俬先，Bad(Bed) bug怕熱，過60度就會死」
有網民則認為床蝨會從包裝的紙皮、木傢俬、街外環境等途徑被帶入屋。
有網民指以60度水溫的熱水清洗衣服以及用熱風機吹新購的木製傢俬等方式可預防床蝨。
港生活人氣本地熱話
↓【限時搶⚡】factiv CAT1 離子保濕潔膚乳↓
↓潔面、保濕、修復三效合一｜持續保濕洗面後不繃緊↓
↓【限時搶⚡】Stecco Natura意式雪條↓
↓免費意式雪條｜杯裝意式雪糕買一送一↓
