網民熱議：800萬預算將軍澳區兩房單位 揀維景灣畔、蔚藍灣畔定新都城會比較好？

維景灣畔揸車有私家路？撘港鐵亦同樣方便？
樓主就表示三個私人屋苑都各有優點同缺點，維景灣畔風評好，保值，但尺價貴而且配套、商場檔次較低，蔚藍灣畔則屬坑口樓王，會所設施不錯，而且坑口嘅配套完善，但單位就有露台以及窗台，廳嘅空間亦相當之窄，而新都城尺價平，相同價錢可買到三房單位，而且管理費平，配套又完善，不過廳嘅面積偏細以及整個樓盤偏舊，因此就問到一眾網民嘅意見。有網民就認為有揸車的話首選係維景灣畔：「如果日日渣(揸)車出入，維景有澳景路出藍田油塘，則(側)邊又有將軍澳交匯處去藍田隧道/誇(跨)灣大橋」、「揸車咪維景囉，成條私家路任你飛車，唔揸車佢呢3個盤都係維景好小小，調景嶺站兩條線，出觀塘唔洗(使)轉車，坑口寶琳遲早再減班比(畀)康城」，亦有網民認為維景灣畔除了交通方便之外，更有多個為小朋友而設嘅設施：「維景都唔錯，實用，自成一格。樓下好多小朋友設施，好合適有工人的家庭，黨(港)鐵雙線站頭，非常好」維景灣畔行去港鐵站好遠？商場又咩都冇？

不過有網民就指維景灣畔來回港鐵站有一定嘅距離兼會日曬雨淋，非常不便：「一見到人話維景方便就笑左(咗)，住將軍澳返放工主要靠地鐵，就算住16座、17座，行去地鐵嗰程要經商場電梯又上又落，住1期2期就行到傻，有頂又等於冇，好天曬落雨淋，又冇乜配套」，亦有網民指維景灣畔嘅商場如同虛設：「維景個配套商場以至全調景嶺都x到無輪(倫)，要乜冇乜，稍為多少少野(嘢)食要行勁x遠去到彩明痴人地公屋商場先得」、「雙線加私家跑的維景就只得垃圾商場」

有網民認為維景灣畔最適合駕駛人士居住，因鄰近有人少車少的澳景路可作為「私家路」出入九龍區。

但亦有網民認為維景灣畔與港鐵站距離較遠以及樓下商場生活配套不足。

蔚藍灣畔有超大露台？但坑口人多好擠迫？
有網民就認為蔚藍灣畔交通方便之餘，單位擁超大露台更係一大賣點：「蔚藍出咗名樓王，個露台先至係最正嘅賣點，佢唔係新樓嗰啲垃圾工作平台，係真係一個拎嚟用或拎嚟chill都得嘅露台，地鐵班次係唔洗(使)擔心，過康城車就真係少，坑口寶琳其實多車」、「蔚藍多個地鐵商場入口，超級方便又近，露台勁大」、「有露台變咗缺點真係好x癲，大把公屋仔就係為咗有露台，人生目標先去買樓，喺有啲人眼中係大優點，又可以晾衫又可以唞戲(氣)」，亦有網民指蔚藍灣畔生活配套齊全：「蔚藍樓下商場配套唔錯，會所都好，座數唔多夠share」、「長遠淨諗自住-蔚藍，會所正，地鐵正上蓋，樓下4個商場生活配套齊，生活質素較高」。不過亦有網民認為蔚藍灣畔所處於嘅坑口人太多，過於擠迫：「蔚藍其實都唔錯不過坑口真係太迫太多人」、「蔚藍係坑口人好多，樓又密，而且坑口站長遠都會落後，越來越多班次同康城share」

有網民認為蔚藍灣畔擁超大露台為最大賣點，而且鄰近地區配套齊全。

不過有網民就指蔚藍灣畔身處的坑口人口太多，感覺非常擠迫。

新都城配套完善？但又殘舊管理又差？
而有網民就指新都城一帶多嘢食、商場大以及配套完善：「唔煮飯既(嘅)新都會好d(啲)，多野(嘢)食」、「新都城個商場夠大」、「新都城都好住，落樓乜都有，又有巴士總站，街市」，更有網民指位於寶琳嘅新都城居住環境會比較舒適：「居住環境最好其實係寶琳，感覺無咁多人兼且花草樹木都多，係舒服嘅，商場唔使講啦」。不過亦有網民指新都城比較殘舊以及屋苑管理不善：「又殘又舊，管理不善，留意如果就到維修期，大把野(嘢)執。如果budget唔係好緊盡量唔好諗」、「新都城，好x逼，同埋去睇覺得超級殘舊」、「新都城，早期恒基樓，好多單位有漏水情況，建議落雨天去睇樓，10間有8間窗台漏水/發黑」

有網民則認為新都城擁超大商場，配套非常完善，非常方便日常生活。

亦有網民認為新都城又殘又舊之餘，管理亦不善，甚至有不少單位出現漏水情況。