奶奶暗示想喺自己坐月時幫忙 生完bb請陪月定搵奶奶幫手好？

樓主表示自己現時懷孕4個多月，而奶奶就有暗示過想之後幫手照顧bb，但當聽到老公話到時候要畀錢奶奶當作照顧嘅人工時，就認為要畀錢的話點解唔請陪月員，而樓主其後亦表示到與奶奶的關係只屬一般：「同奶奶關係一般，可能只係一個月見2-3次食飯，佢成日都用佢個(嗰)時做媳婦個(嗰)套嚟同我講，我知係經驗分享，但好似有D(啲)不合時宜，覺得佢有少少長氣同煩」，所以就問到一眾網民喺奶奶同陪月員之間應該點揀好。而大部份嘅網民都建議樓主於產後應該請陪月員比較好：「搵陪月，真心建議」、「一定選陪月」。

作為準媽媽的樓主正在糾結坐月期間應請陪月員還是讓奶奶幫忙，而網民大多建議應請陪月員。

陪月員比較專業？搵奶奶冇得叫佢做嘢？
對於網民認為應該請陪月員嘅原因，有網民就認為陪月員較為專業：「搵99(奶奶)幫手都要計返錢，咁不如請陪月專業啲。俾錢99(奶奶)真係貼錢買難受，千祈唔好啊」、「如果比(畀)得錢嘅，搵陪月啦，人地再專業D(啲)」，有網民則認為難以命令奶奶去做各種事，若奶奶做得唔好又不能畀意見：「建議你快找陪月。外人可以話，可以命令，奶奶...不可以啦！」、「千千千千千萬不要奶奶陪月，比錢99(奶奶)陪月根本搵笨，你敢唔敢點佢做野(嘢)？你比(畀)錢請陪月心安理得點人做野(嘢)都得，99(奶奶)就唔可以，仲要幫埋手，係咪搵笨」、「真心一定要請陪月，陪月收錢幫你坐月，你有咩要求都起碼可以同佢講，氣氛會客氣d(啲)，但如果係99(奶奶)，就算佢做得唔好你都唔可以出聲」

搵奶奶陪月分分鐘會有產後抑鬱？
有網民更指若搵奶奶陪月的話，隨時可嚴重到患上產後抑鬱：「一定陪月！我就係同你一樣經歷，當時講得好好聽，結果講一句唔啱佢心水成個月我自己捱夜湊b！佢一日都冇幫手就唔理，完全反口唔認人，結果搞到產後抑鬱，唔知你奶奶係點，未生前我同佢關係幾好，最後都係自己啊媽心痛日日走過來幫手，差d(啲)同老公因為呢件事離婚」、「唔想有產後抑鬱，最好就請！到時先後悔已經太遲了」，而有網民就認為除非與奶奶關係非常好，才會考慮搵奶奶陪月：「俾錢請陪月，千祈唔好搵99(奶奶)，除非你本身同佢關係好好，老公又會企你果(嗰)邊，咁你先好搵99(奶奶)」，不過亦有網民認為就算關係好都應可免則免：「我有個好奶奶但都無搵佢陪坐月或湊bb，你爬下文就知，第一千祈唔好搵奶奶坐月，第二唔好同奶奶住，9成9無好結果」，有網民更認為就算搵親友幫忙都不應搵奶奶：「真心既(嘅)，陪月，搵親人都係搵娘家啦，幾時到男家。老實講，自己阿媽正常點都不會搵個女笨，男家嗎？冇人敢包」

有網民認為陪月員較為專業，加上難以命令奶奶去做事，建議請陪月員較為合適。

亦有網民更認為若產後安排處理不當的話，嚴重可導致患上產後抑鬱症。

搵奶奶陪月要畀錢好合理？隨時可能仲要畀多啲？
就當搵奶奶幫手陪月需唔需要畀錢呢個話題上，有網民就認為要奶奶幫忙的話要畀錢係好合理：「樓主應該搞清楚件事，搵99(奶奶)湊bb要比(畀)錢係好合理嘅事，所以你c6(意指老公)提出係無問題嘅，但當然嘅有得㨂，一定係搵陪月好過99(奶奶)湊，就算99(奶奶)點都唔係收錢，都係搵陪月好」、「攪(搞)清楚，搵99(奶奶)好搵陪月都好，錢呢，係要俾既(嘅)。分分鐘老人家果(嗰)舊(嚿)仲要俾多D(啲)，費時(事)讓人實話你5(唔)熟5(唔)食」，有網民更強調千祈唔好佔老人家便宜：「你慳自己慳老公甚至慳小朋友，都唔好搵老人家笨。記住，冇免費午餐。你今日搵老人家笨明天要十倍百倍還」

表示唔想奶奶辛苦以捥拒奶奶幫忙？
至於該如何拒絕奶奶嘅好意，有網民就建議可向奶奶表示並唔希望令佢辛苦等較為捥轉嘅意思：「你婉轉啲講，生完之後，產婦情緒好波動，令99(奶奶)受氣就唔好啦，況且湊初生要好夠體力，太辛苦，唔應該要99(奶奶)受苦」、「唔想傷感情先至搵外人，加油強調唔想老人家辛苦的立場，數下(吓)煲湯煮飯幫湊仔做家務需要幾多對手」、「你可以講得好聽啲，既然要俾錢 不如請個外人返嚟勞役，點要求都得，甚至語氣差啲都仲得，奶奶收嗰兩萬咁少錢做到隻狗咁有乜謂呢，請佢輕輕鬆鬆負責坐，齋嘆，玩下(吓)孫咪好，到時新手媽媽產後荷爾蒙波動又唔夠瞓，可能會發脾氣，火山爆發噴親奶奶修補唔到啊」

有網民認為支付陪月費用給奶奶是相當合理，金額甚至比起請陪月員會更多。

有網民認為可以向奶奶表示不想令她受氣、辛苦等的原因去捥拒奶奶的好意。