網民熱議：覺唔覺住青衣嘅人都比較唔開心？人口老化 生活壓力特別大？
究竟香港邊個區嘅環境，會令人住得最開心呢？暫時都未有正式調查可以參考，但有網民就喺連登討論區發帖，話發現住青衣嘅人好似壓力好大，青衣究竟好唔好住？早前喺討論區引起網民熱烈討論！究竟青衣島嘅居住環境同生活配套有乜問題？大家又覺唔覺得青衣居民真係特別唔開心呢？
樓主話某日請假入東涌行山，經過青衣站，發現：「撞正繁忙時間好多西裝恤衫友出出入入，唔算好後生但個個樣都似死老豆咁！啲人感覺好大壓力！其他區都有，但青衣個感覺特別明顯，應該係人生剩係得返工嗰啲人，我識幾個住青衣嘅都係咁， 性格比較負！山上又一大堆公屋，人口老化得好嚴重，成個島都偏向唔開心負能量好重！」
樓主話佢覺得青衣嘅居民好似唔識笑，生活壓力同負能量好大。
北面向墳場 南面向貨櫃碼頭吸黑煙
網民睇完樓主嘅感受，竟然都紛紛數出青衣嘅缺點：「不如講下住青衣有乜值得開心：啲樓又舊又殘，住北面對住華人永遠墳場，住南邊就對住貨櫃碼頭吸黑煙，日日聽船笛聲，無覺好瞓！住山上仲慘，車駁車幾次先返到工，想食啲好少少既西，一係要長途跋涉去青衣城，一係就直頭要過橋！想娛樂就得間濕x垃圾蚊螆戲院，係有條郊遊徑，不過景觀麻麻 ……」，至於碩果僅存嘅優點，就係「係做運動方面叫做好啲，有2個泳池 3個體育館，因為地方隔涉過頭，易少少book位！」、「青衣愈來愈多插針樓，搶人資源」、「我想出部26逃離下個孤島……點解可以半個島無車位？」。但隨即有網民反駁：「其實你住青衣邊度？我住南邊咁耐都無聽過笛聲」，有青衣居民回應：「唔對海就係，對海真係成日聽到」。
住青衣北面嘅居民，有機會望到荃灣嘅華人永遠墳場。
至於住南面嘅青衣居民，就有機會望對貨櫃碼頭，有網民話會吸黑煙，而船嘅笛聲亦搞到無覺好瞓。
至於購物同飲食，只有青衣城呢個選擇。
數青衣島嘅優點，網民有2 個泳池同3 個體育館，算容易book場。
青衣最啱老人同性格內向嘅人住？
亦有網民講心目中嘅「優點」，不過都真係唔知算讚定彈：「青衣唯二優點，係靜同交通方便，靜就係適合老人家同性格內向嘅人，交通方便就一定係適合黎生，所以入面d人都係陰陰沉沉咁！」，但隨即有網民附和：「你咁講又似係，身邊幾個50-60後青衣人，不嬲做慣黎字頭，出面朋友都冇多個！」、「老人家先最撚嘈，講嘢大聲，一樣嘢講十次，鍾意做拍手操！」
有住其他區域嘅網民就認為住青衣未必係最負：「東涌屯門天水圍元朗上水粉嶺呢？ 青衣已經唔算最邊邊啦！」、「住西貢先慘」，但有網民反駁：「西貢交通唔方便，但氣氛冇咁壓抑」，青衣人始終認為自己最慘：「有料就唔洗住青衣啦！」、「真，住親青衣最多係有少少錢但又打份牛工！」，有網民問：「請教下，住邊d 人先會開心？」，有網民好悲觀咁總結：「覺唔覺住香港嘅人都比較唔開心？！」
有網民認為青衣夠靜同交通方便，適合老人家同性格內向嘅人。
雖然有人覺得住西貢慘，但網民認為西貢雖然交通唔方便，但氣氛無青衣咁壓抑。
text/joyce
photo/HKET圖片庫
============
同場加映：
【蝸居睇樓團】360呎青衣舊樓變日式機關屋 睡床衣櫃二合一牆身櫃、流線型廁所連日式衛浴
港生活人氣本地熱話
全新功能《U GO》強勢登場🎉！
立即探索🔍本地熱門活動📍好去處🔔食買玩情報
↓【招募試食員🐱】送Harlow Blend全新貓糧系列！↓
