香港嘅住屋問題，的確係最困擾嘅民生問題，因此好多人都話若果抽中居屋，簡直係人生勝利組！但有唔少人都發現，近年落成嘅居屋，由外觀、用料、面積到間隔，同公屋根本分別不大，質疑唔值得花幾百萬去買居屋。有網民就喺連登討論區發帖，問大家究竟而家居屋同公屋有乜嘢分別？有啲答案，都幾「發人深省」！
舊居屋間隔好好多 唔會一入屋就對住廁所
網民慨歎：「之前有啲居屋嘅則係同公屋唔同，但佔小部份。而家新果批就跟曬公屋則」、「間隔大小完全一樣的，居屋聲稱用料會好D」，有心水清網民回應：「唔係03 年之後全部一樣嘅咩？！記得當年因為怕再出現紅灣半島件事，所以統一標準，方便居屋轉公屋」，亦有網民留意到其實有部分近年落成嘅居屋，如尚文苑同旭禾苑，部分單位都係有啲特別嘅開則，例如有個隔音露台，但網民就話：「因為要隔音，但又唔好用，又唔拆得」。
近年居屋間隔同公屋分別不大，其中一大被人「詬病」之處，係一入大門就對住廁所！
部分新居屋會有隔音露台，但網民普遍認為並不實用。
網民都好懷念舊式居屋：「2000年前幾居屋多數都唔同，有康和，有私人參建，間隔好過唔少私樓」、「靚過宜家果D添，90年代尾00年果批，有浴缸，有廚櫃，就好似今日房協同私人樓咁，房協跟得上7成，但房委會就淨係識起埋D垃圾清水樓，以前識起，今時今日唔識起」、「以前既居屋間隔好好多，起碼唔會一入屋就對住廁所」、「畀人鬧足10年，都要KEEP住呢個設計，無得頂，居屋又係畀人鬧愈起愈細，今年夠膽拎180呎出黎賣，嘔血！」，最令人慨歎嘅係：「居屋管理費+地租+差餉=公屋租金」！
好多網民都懷念舊式居屋嘅間隔，認為實用程度媲美私人樓。
居屋可以繼承 日後唔使再審查入息
不過亦有網民話居屋點都好過公屋：「鄰居質素好過公屋好多，廚房可以改開放式，買左之後唔會再理你入息同資產，15年後可以賣左佢移民」、「公屋限制左你資產上限，搵到錢既點都要轉」，有網民更好真咁歸納咗居屋同公屋嘅異同：「新果批，應該復建居屋後，全部統一標準，方便居公屋轉換，所以講間隔方面，居公屋係一樣，分別如下：1: 買同租分別、2: 唔洗審查 - 富戶趕走、3: 唔怕加租、4: 人少唔會搬細、5: 下一代可以繼承、6: 夠年期，可以未補價或補地價賣左佢、7: 居屋可以揀位置樓層 - 唔似公屋硬食，淨係住到殘，可以賣或繼承呢一點都屈晒公屋機啦！」，有網民反駁：「某程度上公屋都可以繼承，加個名搞掂」，但有網民認為如果長遠計，住居屋都係有好處：「要審查，仲有大搬細呢？你諗下，上一代好多4人家庭，到個仔果代，有x人生仔咩，得1丁友（如果父母走左），比你過到審查，窮到x咁，你認為有得住4人單位咩？！居屋就唔同啦，一人住3房2廁大單位都得」。
網民認為居屋始終係自置居所，可以自由改裝間隔，例如轉開放式廚房。
亦有網民認為買咗居屋之後，唔再需要作入息審查，將來可以出售或傳承畀下一代都比較容易。
text/Joyce
photo/HKET圖片庫
============
同場加映：
【蝸居睇樓團】又一村750呎單位 原則超唔好用？ 打卡圓鏡梳妝枱 弧形櫃用料2大Tips
」，
App內睇文同睇片可隨時捕捉U Fun彩蛋，
換領現金券及禮品！
↓【限時搶⚡】位元堂凍乾水果脆套裝！↓
↓ 冷凍乾燥技術鎖住濃濃果香！/ 保留營養素及豐富膳食纖維！↓
↓【必收藏】最新深圳食買玩攻略！↓
↓ 大灣區一小時生活圈！最新打卡熱點／熱門美食等！↓
