關西攻略の新年番外篇 新年跟杜如風遊大阪

過多兩星期就到大年初一，杜如風 再次與 TVB 合作拍旅遊節目，來個 關西攻略 番外篇，食好西、玩 日本 大阪之餘，當然仲要來個新年散財大計，趁年頭 大減價 掃平貨，立即出發，跟 杜如風 去大阪！

01　跟「風」玩大阪　四天王寺搶閘敲鐘

大阪 市內 四天王寺，每年大晦日（12 月 31 日）都聚集一班信眾，人龍排到去大門口，為的是由深夜 11 時半，響起的 108 次除夜の鐘。佛家相傳人有 108 種煩惱，新一年要敲夠 108 次鐘聲，隨住鐘聲嗡嗡作響，彷彿煩惱亦就此散去。

如風帶隊來到熱鬧到似年三十晚車公廟的四天王寺，古有夏蕙姨搶頭注香，今有杜如風搶閘敲鐘！如風新一年有咩煩惱想敲走？希望敲走佢阿媽的煩惱——唔再鬧佢又買咁多衫呀！

02　阪急搶福袋　明年請早

很少早起身的如風， 1 月 2 日，8 點半鐘就準時出現 大阪 梅田阪急正門，準備與一班同樣購物成狂的日本人殺過！日本福袋多在 1 月 2 日開賣，之前曾往東京過新年的她已是搶福袋專家，事前已作好調查，未過年前先到喜愛的牌子睇啱款式，忍手等到今日才入貨。

9 點正開門，如風亦鑽入人群中衝去掃貨，睇中的第一個福袋，竟然不是買畀自己的名牌女裝？只見如風直衝 11 樓，一手搶返個童裝福袋。原來呢層童裝特賣場，每年皆有名牌童裝福袋，分晒男女冬夏不同 size，一袋 2 萬 yen 的福袋，入面已裝有近 5 萬 yen 的童裝，抵咁多，難怪一班日媽搶住買！「契媽幾錫你？自己啲嘢都未買呀！」如風手拎幾袋童裝，衝去畀錢，繼續買買買！

阪急梅田本店
地址：日本 大阪府大阪市北區角田町 8 番 7 號
電話：+81 (0)6 6361 1381
營業時間：星期日至四 10am-8pm，星期五及六 10am-9pm
網址：www.hankyu-dept.co.jp/

03　大阪油甘魚火鍋　食完升呢？

關西人過年愛食「出世」魚，不是指剛剛出世的 bb，而是會升呢嘅魚！有種魚，生在日本，可以得到升級機會，就是ハマチ（音：ha-ma-chi），長大成魚後，只要夠 80cm 以上就可以升呢為鰤魚（ぶり），亦即油甘魚。

如風帶路來到「一步」，這裡的魚多數從日本海入貨，如油甘魚就由石川縣入貨，其他則多數由鹿兒島購入，這裡的油甘魚之所以出名，只因多數油甘魚為養殖，但這裡卻是天然長成，更矜貴。「日本人新年仲會送出世魚畀女婿，寄望佢出人頭地，即係串佢未夠資格啦！」如風試食兩款魚後笑稱一般人應該喜歡食肥美啲的油甘魚，不過自己有「戀童癖」，鍾意食啲嫩口啲。歡迎各位看官自己嚟試試到底鍾意嫩口定成熟啦。

四季遊食 一步
地址：日本 大阪市中央区千日前1-7-7 1F
電話：+81 (0)6 4708 0558
營業時間：5pm - 1am（逢星期二休息）
網址：www.shikiyusyoku-ippo.com
交通：乘地下鐵至難波站徒步約 8 分鐘；或乘近鐵難波線至日本橋站徒步約 4 分鐘
備註：油甘魚火鍋需事前預約

【杜如風其他推介】

04　LANVIN en Bleu

文：Tea、相：JAY