36歲的梁浩銓年齡僅僅合乎《中年好聲音》的門檻，但他人生所經歷的卻比許多中年人來得崎嶇不平，曾欠債累累被家人拒諸門外，被迫在麥當勞留宿。憑心中的堅持與勤奮，重回生活正軌之餘，在比賽中鼓起勇氣與父母重新修補破裂的關係，為自己快將出世的孩子做一個很好的榜樣之餘，讓生命無憾。
梁浩銓16歲的那年曾經參與2002年「TVB全球華人新秀歌唱大賽」，可惜四強止步，後來亦苦無發展機會。梁浩銓曾經做過獨立歌手，後來轉戰幕後，自組製作公司，仍然跟音樂結緣。他笑言：「主要做音樂製作同活動音響，所以我成日講話平時遞咪畀人唱歌，多過自己唱歌。入行15年，自己公司咩崗位都要做，所以《中年好聲音》入面我係比較識得照顧人嘅一個參賽者。」他笑言人人以為做老闆，就可以無後顧之憂盡情投入比賽，但現實卻剛巧相反，「器材上未必個個同事跟足，每次錄影或者綵排前我都返公司搞掂先放心，所以其實壓力好大，成日睇實個電話怕有咩甩漏，所以冇乜完全投入享受過個比賽過程。」
要兼顧正職和比賽，縱然辛苦，但浩銓仍然無怨無悔，「如果冇參加，我反而會呢世都唔安樂！今次係我視為最後一次比賽，20年唔係一個短時間，但呢20年我嘅宗旨就係就算冇得唱，我都不斷練習。」他笑言比賽入面100強有一半人早就認識，部分是客人，部分是多年來認識的朋友，更視周吉佩亦敵亦友，他笑言：「比賽以來我好多對手都贏過，但唔明點解永遠贏唔到周吉佩，我話贏唔到第一唔緊要，我點都要贏一次周吉佩。於是《暴風女神Lorelei》我完全豁出去，最終高分過佢贏咗佢！」梁浩銓被斥黐線，為何要針對周吉佩，他表示只是一個良性的假想敵，為怕對方誤會，他特別傳一段長文心聲給對方，幸好對方都明白體諒，畢竟大家是認識十幾年的老朋友，「佢好明白亦冇影響友情，我心入面最想係周吉佩贏！」
梁浩銓透過比賽跟父母修補關係的一幕，令不少觀眾動容，這位梁浩銓在鏡頭前喊到失控，他說：「呢幕係事實，7年前因為做生意，我被人夾走嚿錢走佬欠落一身債，債仔殺上屋企追數，（家人趕你走？）唔算，不過佢哋換咗鎖唔畀我返去，當下我都好Hurt，不過好明白，係阿媽都唔想生個咁嘅仔。我就嚟做人爸爸，我覺得要解決件事，寫封信都預佢哋唔嚟，因為我最熟悉我父母性格，點知細佬突然話我知佢哋去緊TVB，我即刻心神都亂晒，咁啱當日就係譚詠麟做評判，我阿媽最鍾意就係佢，我仲唔命都畀埋佢咩？」梁浩銓的演出獲得評判一致好評，聽到梁媽媽在觀眾席上的一句說話，「我哋放低咗，今日係嚟支持你！」
終於將7年來家人心中的鬱結解開，浩銓說：「未正式食飯，不過就約好晒。我同父母當日已經傾番偈，有厚面皮就無敵，最重要踏出第一步，特別係婆婆年時已高，趁呢段時間修補番，唔好講到照顧但知道我哋冇事喇，佢應該會安樂好多。」雖然太太不太支持他今次的比賽，但能夠與家人和好，絕對是勇氣可嘉。
梁浩銓稱一直以來夢想是希望工作跟音樂有關，自組公司當日已經圓夢，今次比賽絕對為人生錦上添花，「3000人去到而家12強，真係好唔錯呀喇！12強入面大家各有特色同必殺技，之後結果係點已經唔重要。肯行出去，年紀大真係唔緊要，得唔得，冇嘢可以輸。由當初我要瞓麥當勞，真係好徬徨，慢慢一步一步行返上嚟，到而家走到紅館唱歌喎！我唔會讚自己叻，但我絕對係勤力同堅持嘅人，今次除咗贏番親情，仲畀咗我做自己嘅勇氣。」
攝影：陳健珊
採訪：楊安莉
」，
App內睇文同睇片可隨時捕捉U Fun彩蛋，
換領現金券及禮品！
↓【限時搶⚡】Smartech環保智能UV廚餘機！↓
↓ 廚餘轉化成肥料｜消除食物異味及殺滅細菌↓
【聖誕送禮🎄】《社群》x wwwtc mall聖誕驚喜4重賞！
↓送您人氣下午茶套餐及禮品套裝↓
