71歲的吳大強是《中年好聲音》最大年紀的參賽者，每次表演從容淡定，盡情享受舞台上的感覺，俘虜所有評判及觀眾。退休之前，大強是酒店高級管理層，四個兒子長大成人陸續出身，他終於放下家庭的負擔追夢。他認為能夠體會到嚮往已久的演藝行業，藉著自己的故事鼓勵大眾，這件美事比贏出比賽還重要。
大強以71歲之齡參賽，唱功沉穩成功揮低不少後生仔女，暫時殺入十二強，成為不少參賽者的榜樣，他說︰「比賽去到而家已經係意料之外，唔會太睇重輸贏，最重要係為觀眾唱首好歌。而家街上面好多人叫我大強，有次我戴住口罩，有人走去我面前唱《Oh, Pretty Woman》，我話：『唔使唱喇！我真係大強！』其實好開心！」知道自己年紀比很多參賽者大，更加不想錯失機會，海選的時候見識到很多唱功高強的素人，他心態上是盡力而為。直至節目上每當被安排唱不熟悉的歌曲，他加倍練習，深信只有熟悉歌曲才能唱出靈魂。大強笑言：「好多人認為我個仔喺TVB工作，一定識好多人，坦白講我一個都唔認識！報名都冇話畀個仔知，直到海選完畢先話佢知我參加咗。」
大強從小就受兄姊薰陶，喜歡聽歐美流行曲，曾經在街頭遇過一位女生以結他自彈自唱英文語，激發起他的興趣，自學結他為嗜好，長大後都有參加大大小小的歌唱比賽，跟音樂結下不解緣。「當時覺得做歌手係一件遙不可及嘅事，一直都好嚮往演藝圈這個行業，中西電影、電視劇以至粵語長片都睇好多，絕對係『戲迷』。」可惜苦無入行的機會。他努力讀書，長大後當上班族，他慶幸在英文中學讀書，跟外籍老師交流，特別投契，有一定的英語基礎，後來成為酒店的管理層，游刃有餘。
在酒店任職高層，讓大強能夠為四個兒子提供一個不錯的學習環境，他們在國際學校升學，長大後各展所長，大強︰「仔好主要由太太照顧，事無大小都由她負責，我原則係佢哋互相尊重，唔係老大就有優待，細佬就冇，絕對唔會。兄弟之間互相支持、幫助，佢哋連衫都輪流著，大仔傳給二仔，二仔傳給三仔，冇乜所謂。喺較重紀律嘅家庭成長，佢哋生活得好開心。」大仔吳偉諾是消防員，二仔吳偉言是飛機師，三仔吳偉豪是藝人，四仔吳偉傑仍在澳洲讀大學，大強說：「希望佢盡快畢業返港工作，一家人團聚，喺埋一齊，我哋一直紮根香港。」
吳偉豪在TVB工作8年，吳大強年初在《萬千星輝頒獎典禮》現場親眼自見證囝囝得到「飛躍進步男藝員」獎項，絕對是難得。他說：「我支持佢哋嘅工作，首先佢要有興趣，就算求學時佢都有參加話劇班，而且我覺得佢有條件呀，學問、外型，又有演藝魅力，真係唔錯！聽聞呢一行好複雜，佢入行後，我又不太認同，特別係《愛回家之開心速遞》劇組，關係好似屋企人一樣，當佢係仔或者兄弟咁，我好放心。」他笑言不少消息都是靠睇報紙才知道，有時候追問阿仔，吳偉豪口硬不肯劇透。問到成為「同事」之後，是否有機會客串《愛回家》以父子檔合作？大強笑言：「從來冇諗過客串《愛回家》，就算有機會都要睇吓能力，講就容易，到拍攝時如果成日NG...我最怕拖累人。」
大強坦言比賽錄影時間長，對他而言的確辛苦，幸好本身他有運動習慣，體力上應付得到，「我相信通過呢次《中年好聲音》，比賽反而令我有動力去提升自己，追趕他人進度，否則就會落後。大家見到我呢個例子，畀到同年紀或者比我後生嘅人一份衝勁、希望，人仲有好長嘅路要走，心態要年輕，莫講話而家70歲 ，就算去到80歲，我相信只要有恆心，勤做運動，身體都唔會退化得太厲害，最緊要睇起嚟有神采、獨特之處。我對呢一行感興趣，而家親身體會到，絕對係一種福氣。」
」，
App內睇文同睇片可隨時捕捉U Fun彩蛋，
換領現金券及禮品！
↓【限時搶⚡】The Big Bounce 電子門票！↓
↓ 全球最大充氣城堡/ Sport Slam體育狂熱/黑夜彈跳派對↓
↓ 【毛孩請試用】Royal-Pets蘆薈溫和修護沐浴露！↓
↓去除身體污垢，成分溫和無添加！↓
