41歲的龍婷是《中年好聲音》的人氣擔當，曾在西洋菜街街頭表演吸納一大班粉絲，獲得「旺角小龍女」美譽。龍婷感激父母的支持，雖然不是一般的上班族，但都樂意放手讓她追求自己喜歡的事，更為她分擔比賽的壓力，「爸爸覺得難得我搵到自己嘅跑道，就勇敢向前衝吧！」
龍婷近年由內地來港發展，在西洋菜街街頭賣唱，唱出名堂，擁有大批支持者。由以往零錢打賞，到後來成立自己的粉絲團，全因她擁有一把溫柔又打動人心的靚聲。龍婷坦言從小就愛唱歌，常常憶起小時候坐著爸爸單車後座唱着《甜蜜蜜》那份溫馨的感覺，「父母成日喺親戚面前要求我唱歌，我都乖乖唱。人生第一次上台表演係小學一年級，學校文藝匯演叫我一個人唱一隻歌，當時唔識緊張係啲咩，只知有機會唱歌，就要做好佢。」
龍婷熱愛唱歌的程度有增無減，只要有機會唱歌，任何舞台都不會錯過，機緣巧合下獲「旺角羅文」邀請下，體驗街頭賣唱的生活，「西洋菜街連舞台都算不上，但呢個係自己最鍾意嘅事，初頭只係滿足自己，後來發現令聽歌嘅人可以開心快樂紓緩緊張情緒，慢慢成為事業嘅一部分。」靠打賞不能維生，龍婷一直有做零售方面的工作幫補生活，夜晚再唱歌，家人只知她不是一般的上班族，「成日覺得唱歌係青春化，過咗青春就冇。但真正畀人話我唱歌好聽，係我過咗30歲之後。有日媽媽問我點解成日咁多散紙，我直接將網上片段畀佢睇，仲以為佢會鬧我，點知佢讚我唱得幾好聽，好支持我做我鍾意做嘅嘢。」
龍婷認為歌聲各花入各眼，就算唱得多好都有反對的聲音，街頭表演被投訴太吵都沒辦法。「初時去到檔主同我講：『唔好睇小呢個舞台喺馬路，佢哋先係真正聽歌嘅人。』起初我唔明白，但經歷夏熱冬寒，就算冇冷氣、冇暖爐、落滂沱大雨，佢哋都喺度聽，由只係兩圈圍觀群眾，到後來多到水洩不通，我就明白呢句說話意思。」西洋菜街表演2018年在熱鬧聲中被禁，行人專用區再次讓車通行，龍婷跟團隊都無奈告別，「西洋菜街冇咗，我係好唔捨得，情緒低落。我鍾意咗唱歌咁多年，個天對我好好，畀一年幾時間畀我發光發熱。鍾意唱歌同聽歌嘅人好多，街頭表演如果有牌照規範，絕對可以係一個美麗嘅風景。」
龍婷早已是歌手，曾舉辦過不同的演唱會，但她卻選擇參加《中年好聲音》挑戰自己，引起不少網絡討論，她從來不看網絡留言，但評判的勸言卻成為她進步的金句，「唔同比賽唔同壓力，比得賽就要有爭冠軍嘅心態，評委老師對我要求都唔同，幸好我個人鍾意挑戰自己，係提升自己嘅好方向、好機會。當我唱完《紅豆》、《我最親愛的》、《甜蜜蜜》等，我個風格就喺呢度，評委叫我撇甩鄧麗君影子、叫我唔好笑等等，其實係幫我開緊條路，否則我會冇方向。」《中年好聲音》是長途賽，龍婷最意外的是得到一大班「歌友」，參賽者成為好朋友，「佢哋好好，咩話題都鍾意傾偈同埋聚會，我本身唔係好識交際，直情係比較困難嗰種，但佢哋慢慢溫暖我，融化咗我，比賽期間有朋友喺身邊一齊比賽、紓緩咗好多緊張。」龍婷坦言每一步都是學習的過程，正如她會挑戰唱廣東歌，努力練好咬字，來港生活過程中難免被嘲笑「譚仔話」，但正能量的她亳不介意。「如果成日諗埋一邊會好唔開心，其實呢一行需要心胸寬啲、接受包容多啲，講嘢唔正一定被人笑，笑我咪改囉，唔笑我唔知道講錯嘛！始終呢度做嘢，學廣東話係有需要，唔係好辛苦，靠睇電視新聞同《東張西望》。」
龍婷是愛家之人，父母是她的「樹窿」，開心不開心都會跟父母分享，在比賽的過程中，爸爸都不斷鼓勵她，「爸爸話既然搵到屬於自己嘅跑道，就向前跑囉，同佢哋講完壓力就冇咗，雲淡風清冇咗事，我嘅減壓方法就係屋企人。」
攝影：陳健珊、何家賢
採訪：楊安莉
」，
App內睇文同睇片可隨時捕捉U Fun彩蛋，
換領現金券及禮品！
【登記送🎁】L'OCCITANE 3款臻緻節日倒數日曆🎄！
↓一次帶走24件護膚、身體／頭髮護理及香水產品↓
↓ 【毛孩請試用】Royal-Pets蘆薈溫和修護沐浴露！↓
↓去除身體污垢，成分溫和無添加！↓
