葉麗儀罕提患腦癌孫仔 擔憂流淚：佢將來會點？

日前，葉麗儀接受HOY TV訪問，她指George在康復後仍要接受特別照顧和教育，而這些經歷卻有助她演繹今次的角色，葉麗儀說：「導演話要有淚光，我就諗到自己個孫，眼淚馬上出嚟，我諗番起個孫患病初期，經常出入醫院嗰種徬徨、同埋嗰份擔憂，即使到而家都仍然會擔憂，佢將來會點樣呢，不過呢啲已經唔到我理，我都已經70幾歲。」

+8

+7

點擊圖片放大

回想George接受治療期間，她表示雖然擔心到睡不着，但也要感恩，「因為我仲有時間同個孫一齊玩，一齊游水，可以每日見到佢。喺佢病嘅時候，我哋全家都好擔心，我個仔同新抱，差唔多每日，其中一個一定喺醫院過；而我嘅責任就大孫女，大孫女搬咗去我度住，我就每日買餸煮飯，至少有一餐晚飯，係我哋全家人坐埋一齊食。」

對於今次獲獎，葉麗儀指自己不是真正的演員，所以是憑直覺去演繹，她說：「同演員交流嘅時候，有啲戲佢哋畀我，我又會畀番佢哋咁樣，因為有機會同年輕一代合作，欣賞而家香港演員，佢哋對演戲真係好有熱誠。」

此外，提到著名音樂人顧嘉煇在年初於加拿大離世，葉麗儀對於未能見恩師最後一面感到很遺憾，她說：「雖然你意料到呢啲會發生，佢始終年紀大，但當然唔希望咁快發生。上次冇去到佢屋企，只係通過電話。因為嗰陣時疫情啱啱開始，今年再冇限制，我就諗如果有機會去嗰邊，就一定會去探佢，可惜已經太遲喇！」葉麗儀坦言很掛念顧嘉煇，亦懷念昔日跟他共事的日子，想到對方如何提攜自己，都是一個難忘的經歷。