《中年好聲音》季軍羅啟豪（Ramon）形容比賽令人生180度轉變，怕醜內歛的他因著對唱歌的熱愛，爆發儲足38年的勇氣在舞台上爭勝，由「隱形人」到後來獲得粉絲「豪殼」的傾力支持，他甘願放下英國的一切，正式踏上歌手之路。過往在濕疹影響下，Ramon缺乏自信，遇到心儀對象都不敢主動結識和表白，近年開始敞開心扉，期待遇到合適的另一半。
Ramon自小性格怕醜，記憶中3歲開始喜歡唱歌和音樂，但礙於自信的關係，總是不敢踏前一步，上台表演，說︰「父母成日叫我喺阿姨叔叔面前表演唱歌，但我太怕醜，暱埋喺飯枱下面。我個心真係好驚，其實好想唱但又唔敢，成個胃就好似乸住乸住咁，好唔舒服。」全身濕疹甚至影響社交生活，「濕疹簡直困擾我整個人生！細個好嚴重，全身都會出水發炎含膿，而家仲有濕疹，觀眾都唔難發現我條頸比較紅。好彩我心理質素尚算唔錯，過去大半人生因為咁樣而錯過好多機會，而家唔理得太多，頸紅就紅啦！」
Ramon憶起《中年好聲音》海選時壓力大得雙手和說話都不斷顫抖，就算入圍100強、50強、26強，狀態越戰越勇，總是不被留意，「比賽初期真係冇乜人留意，我覺得自己係隱形人，有少少不忿！參加得比賽梗係想畀人睇，但我實在太靜，而且我唔係要搶鏡博見報，只係默默咁唱好自己嘅歌。」
直至團戰遇上陳早怡，她絕對是Ramon的小天使，「團戰時，佢一見到我就捧住我塊面，可能覺得我好得意啦...後來發覺佢同我家姐有共同朋友，所以變得好錫我，亦成為我嘅傾訴對象。佢曾經提過自己是ADHD患者（專注力失調或過度活躍症），而我就係性格內向、怕醜，有社交恐懼，佢成日開解我，因為佢都係過來人，呢個係共通點，雙方變得好有默契。」有陳早怡的「加持」下，Ramon跟《中年好聲音》的參賽者逐漸熟絡成為好友，經常都會出席聚會，終於不再感到陌生膽怯，建立屬於自己的社交圈子。
害羞的Ramon錯過好多機會，感情生活都一樣，「我個性太怕醜，真係認識唔到另一半，點算？咪咁囉！我當然都想有另一半，隨緣啦...細個有傾慕對象，但唔敢主動接觸對方，成日都想人哋做主動。近幾年我放膽咗少少做主動，仍然未識到一個可以拍拖嘅對象。」年屆38歲，Ramon坦言已經接受單身的事實，到了這個年紀已不敢說「期待婚姻」，同時也不會放棄擁有伴侶的期盼。
比賽後，Ramon跟無綫簽約成為歌手，並決定放棄英國的人生在香港重新啟步。「我實在太鍾意唱歌！唔想錯過呢次機會，我願意為歌唱事業全力出擊。其實冇話中年，去到人生一半就唔可以追夢，我就係一個好好見證，唔講得上係好成功。我肯踏出呢一大步參加比賽，完全180度改變咗我人生，用咗38年時間先做到呢件事，我做到咗，我無悔！」他表示現時目標是擁有原唱歌曲、出碟，心願是想跟許多著名作曲家合作；最想跟李佳老師合唱，回唱二人合唱《當愛已成往事》時，他非常享受，期待可以跟她合唱一首情歌。
採訪：楊安莉
攝影：陳健珊、何家賢
」，
App內睇文同睇片可隨時捕捉U Fun彩蛋，
換領現金券及禮品！
↓【限時搶⚡】卡樂B粟一燒熱浪香辣味！↓
↓ 粟一燒結合熱浪，香辣惹味！↓
《社群狂歡大激賞》！送hellolulu最新系列袋款🎁！
