魔術師甄澤權（Louis Yan）的囡囡「小魔女」甄允菲（Kacy）現時10個月大，原來前日（25日）小Kacy參加BB爬行大賽，更順利勝出，勇奪人生中第一個冠軍，認真叻女，令Louis和太太喜出望外！
Louis前晚在社交網公布喜訊，原來他和太太Elffi為囡囡報名參加BB爬行大賽。只見小Kacy以《反斗奇兵》（Toy Story）的薯蛋頭「戰衣」上陣，比賽一開始，Louis以女兒喜歡的零食乳酪粒粒作餌，Kacy一見零食立即一馬當先，一邊笑一邊向爸爸努力爬，屁股扭扭，大髀用力划的樣子十分可愛。
誰知一開始快速爬行的Kacy，爬到一半突然哭起來！幸好她沒有停下腳步，喊住爬到終點，爸爸Louis立即抱起囡囡呵番！結果Kacy成功獲第一名，得到人生第一個獎盃。Louis寫道：「呢個小朋友竟然可以喺分組賽160個BB當中，以24秒嘅時間贏得第一名！爸爸媽媽好開心，我哋會一直陪你經歷人生更多嘅挑戰，希望你繼續快樂成長！」不少網民留言大讚Kacy叻女，張名雅更搞笑問Louis：「好勁！你係咪用咗魔法！」
Louis接受本網訪問，親解Kacy爬爬下突然爆喊的原因：「我諗係因為佢見我越叫越走，佢嬲咗我，Kacy平日都算係一個比較黐身嘅bb，成日都希望有人同佢玩。」他笑言不少育兒專家表示BB多爬行對腦部發展好，「我哋成日都有畀Kacy去會所嘅playhouse爬，可能因為咁佢進步神速，平日都係爬得比較快。」Louis笑言發現Kacy對音樂亦甚有興趣：「平日可能我哋成日播音樂畀佢聽，仲有啲節拍都幾勁，佢好似每次聽到音樂，就扭身扭勢un腳咁樣，唔知會唔會對跳舞同音樂有啲興趣。同埋睇條片都見到，佢好鍾意食零食，對食物都好有興趣。我都好想佢慢慢發掘天賦，最緊要可以做到自己鍾意嘅嘢。」
Kacy目前十個月大，Louis笑言時間過得好快：「我仲覺得佢好似出世無耐咁，每日仍然覺得好新鮮。疫情後我好多工作都回復番，多咗返內地同海外工作，反而辛苦晒太太同屋企人幫忙照顧bb，好在Kacy都錫住媽咪，唔算畀好多難題我哋。」早前Louis將自己童年照與Kacy的大頭相對比，父女猶如餅印，他笑說：「過年時屋企人拎返童年相出嚟睇，突然見到我一張童年相同kacy嘅近照一樣，連眼眉都似埋，覺得好神奇。好多人都話生女係似爸爸，咁我當然開心，但都好想佢大啲會似番媽咪。」
撰文：娛樂組
圖片來源：受訪者提供、magiclouisyan IG、magickacyyan IG
」，
App內睇文同睇片可隨時捕捉U Fun彩蛋，
換領現金券及禮品！
↓【限時搶⚡】Canuxi Feathery薄荷綠3D立體防護口罩！↓
↓ 高透氣過濾層/ 不起毛不黏笠↓
↓【社群送禮🎁】大派亞洲旅遊數據卡350張！第2擊！↓
↓4日無限數據！12 個地區適用！↓
