《婚後事》及《再見‧枕邊人》兩套關於婚姻的愛情劇集同時出街，雖然前者集中講婚姻關係，後者加入失憶和懸疑感，不過仍然難免令觀眾混亂，特別是一向劇集產量不多的羅天宇同一時間出現在兩線劇集，《再見‧枕邊人》中他飾演「流氓律師」相當寸嘴，而《婚後事》的他則是拍片的導演，最鍾意溝補習社的學生妹。
同場加映：孔德賢望年輕演員多磨練多進步 「作品唔可以抹走過去但睇到努力」
幸好的是兩套劇的監製在羅天宇的角色造型上都花了心思，《再見‧枕邊人》中，羅天宇飾演的金長勝有種《怒火街頭》的「Law霸」感覺，刻意為羅天宇塑造長髮紮馬尾的造型，十足一位不覊浪子，隨後他將會與麥秋成一齊焗桑拿玉帛相見，又會愛上晴天（黃智雯飾）追求對方。至於《婚後事》雖然是短髮，但就留住劉海，感覺更加年輕，他大爆事後將會有沙灘裸跑的戲份，亦分別跟胡美貽和王敏奕有激吻戲。
羅天宇接受本網電話訪問，他表示：「兩套劇同時間出街，其實我知道嗰陣都幾突然，一聽到都有少少驚訝，從來未試過，今次係我第一次，過去一年都冇乜劇出街，一嚟就兩套，有少少唔係好接受到。其實呢兩套劇拍攝時間相隔成年，拍攝時冇諗咁多，同埋播出時間呢啲都唔係我可以控制嘅事，希望觀眾睇到我喺兩個角色上所花嘅心機。」他坦言兩個角色都相對地粗魯，跟他本身斯文的性格不同，「好彩兩個角色背景、造型等等都好唔同，我都唔太擔心觀眾分唔到。兩套劇都關於愛情，係容易混亂，睇多一個星期就會容易分到。」
提到羅天宇上次獲林肯邀請拍《香港愛情故事》擔正男主角，劇集反應非常好，連帶演員人氣急升，今次他再跟林肯合作，雖然轉為配角，但仍然相當愉快，「好開心可以同林肯合作，佢好了解我係點樣嘅演員，當劇情真係需要粗魯嘅時候，佢覺得唔夠，就會靠練習再推進我粗魯嘅感覺。（預劇集再爆紅？）爆唔爆我哋控制唔到，只能盡力做好每一個角色，希望大家感受到我哋嘅用心。」
對羅天宇而言，還有一個突破就是與吳若希合唱《再見‧枕邊人》的片尾曲，「我有問監製廖晉碩，最後都有機會唱到。我本身唔係歌手，有機會唱到劇集歌，每個機會我都好珍惜，希望大家欣賞每個劇集演技之餘，歌曲都帶到新感覺畀大家。」羅天宇雖然不是歌手，不過以往都經常在網上分享翻唱歌的影片，大家都讚他是隱世好聲音。
撰文：娛樂組
」，
App內睇文同睇片可隨時捕捉U Fun彩蛋，
換領現金券及禮品！
↓ 《社群狂歡大激賞》玩盡2024！↓
↓送主題樂園丶室內遊樂場門票及人氣系列袋款等！↓
↓【限時搶⚡】moonwell尊貴花膠食療系列養生燉湯！↓
↓ 無添加、真材實料滋補養生燉湯！↓
