正在閱讀
新蒲崗新發現 假日玩樂新蒲點

新蒲崗新發現 假日玩樂新蒲點

2013.09.12



從前,誰會想到新蒲崗會有大型購物商場,新私人樓宇六百多萬上落是等閒事?

今天,更有國際品牌酒店進駐?新蒲崗變了,不再定位為貨車來又往的普通工廈區,而是假日玩樂蒲點,單是鎖定五芳街與六合街,兩口子可於新酒店 relax,工廈內挑戰新登場的實境解謎遊戲,或一人前尋懷舊好物,甚至一大班人合作無間玩室內 wargame。蛻變中的新蒲崗,你察覺到嗎﹖

第 1 站 「謎路」 全新解謎遊戲館

 密室遊戲唔係新,開鑰匙式逃脫 game 好多人玩過。

 最近,新蒲崗工廈內開設新實境解謎遊戲館「謎路」,佔地約 4,000 平方呎,於 9 月 8 日開幕。

 「謎路」其中兩位創辦人林嘉豪和林忠明,強調新館非密室遊戲,「我們的設計概念唔係話要『逃走、脫離』,反而賦予玩家角色及任務,有故事性,亦重音響及燈光效果,重視體驗遊戲過程。五個創辦人中有四位是工程師,所以較多電子儀器等科技裝置,亦重視空間設計體驗。」

 講真,玩家未必在意故事背景,有挑戰性、跟平常玩開不一樣,才是王道。以玩「森夜行」為例,因切合森林主題,沒密碼鎖或鑰匙,全靠自動感應,對準位置就可開門過關,亦冇一字一句的提示,困難度增加。每個關卡空間地方不大,二至三人剛好,如找不到線索,卡在中間關卡,極有困獸鬥感覺。據知,日後最多有六個主題遊戲,半年至一年不定期改動及更新。

 留意:

 1. 遊戲最多只限三人同玩,非市面真人逃脫遊戲供六至八人玩,每人參與投入度增加。

 2. 入場前先睇片,導玩員會首先通過影片、影像、聲音等,向玩家交代故事背景及任務要求,投入故事角色,引領玩家進入遊戲第一幕。

 3. 大會提供電筒經歷四至五個場景完成任務,如需任何幫忙或提示,可向天花揮動電筒示意,每個遊戲只有一次提示機會。如果過唔到關,最後可要求「解謎」,心有不甘可再付款挑戰。因非必要解謎,所以冇規定每人限玩同款遊戲一次。

 4. 成功完成任務後,可以提供道具,於遊戲主題布景影相位拍照。

第 2 站 貝爾特酒店 型格品味酒店

 區內新事,何止是實境解謎遊戲館「謎路」,還有一街之隔,新進駐的香港九龍貝爾特酒店。近日廣泛宣傳及報道,酒店新食肆「潮味街」、「薄餅吧」大受歡迎,自助晚餐幾近 fully booked。

 其實酒店設計亦值得留意,完全沒有「廠廈區」味道,走型格路綫,有驚喜。甫入大堂,沒金雕玉砌式吊燈或巨型玻璃幕牆,以橡木地板配深紅色牆塊為主;簡約時尚,另外幽默式指示牌及播放外國流行曲,營造輕鬆感覺,非慣常酒店可見。

 說回房間,空間不算大,勝在床褥選用 Simmons,放心倒頭大睡,高層房間觀景可望向志蓮靜苑。推廣期內,$888 起可入住新酒店,本地兩日一夜躲於室內兩間遊戲室玩足球機、美式桌球及 Wii,做 gym 及享受美食,或借用單車外出踩番轉,新體驗新蒲崗型格一面。

第 3 站 Moon Castle Vintage Shop 維多利亞風雜貨店

 新蒲崗 shopping ,非只有 M 字頭商場,或開倉大平賣貨色,細心尋找,終發現懷舊二手雜貨店 Moon Castle。

 店子不是那種每日定時開門做生意的,必先預約,免摸門釘。愛 vintage 舊物的 Moon,十多年前欣賞新設計時,發現不少懷舊元素在內,慢慢地於外國旅行時尋找該類型,結果衣服、首飾、家具、玩具總有一些,當中以上世紀英國維多利亞時代,或 1920 至 1950 年代美國及歐洲婚紗喱士裙及禮帽為主,其實當時最實際的考慮,還是「舊嘢買得起」。

 的確,從前服飾設計簡單得來,高雅又易襯,難怪不少新娘子都租用店子的 vintage 婚紗、晚裝及禮帽作拍攝 pre-wedding之用(約售價的 35%),喜歡的話,買下帶它歸家。

 另外,從事攝影的 Moon 亦提供化粧、造型及攝影一條龍服務,以 pre-wedding 計約 $15,000(不計租用服飾費用),打造古典懷舊造型。

第 4 站 Impact Force C.Q.B. 室內WARGAME激戰

  一大班人齊集新蒲崗,要玩得刺激,又可以玩得耐,非室內 wargame 莫屬。

 老實說,新蒲崗區內室內 wargame 場不止一家,但 IMPACT FORCE C.Q.B. 面積夠大,佔地 35,000 平方呎,分三個主題戰區,10 人對戰不局促,而且時間選擇彈性,凌晨都可 book 場玩。

 新手初試玩,基本上不用準備甚麼(衣着宜長衫長褲),場內可租用戰術背心、面罩、短槍、手套等裝備,職員亦指示及簡介留意地方,兩組對戰每節 10 分鐘後,可稍休息,唔辛苦,至少我知道這裏冷氣充足。

 Impact Force C.Q.B. 經理 Michael 話︰「初玩室內 wargame 的朋友多怕『中槍』,玩法冇咁進取,愛到亞馬遜森林主題戰區,因為多叢林障礙,有多地方躲避。但玩多幾次,會轉向適合中距離火力對戰的古墓迷城戰區,走動更大,最後挑戰長距離火力的柬埔寨戰區。」

 他說,玩室內 wargame冇年齡界限,年齡最小的 6 歲,最大 67 歲同樣樂在其中。