週末推介　3大下午茶甜品好去處

必食皇牌千層蛋糕！人氣泰國過江龍Cafe甜品買一送一

如果你喜歡食千層蛋糕，一定要試Greyhound Café。雖然坊間不少甜品店以量取勝，但Greyhound Café只用10層班戟皮，配上散發奶香的幼滑忌廉，同樣誘人。

千層蛋糕有椰子、朱古力香蕉千層、芒果、雜莓和泰式奶茶5款口味，水果食材更由泰國空運到港，重現當地味道。

1月26日前去沙田新店食仲有買一送一優惠添！

※優惠只限堂食，適用於相同款式和口味的甜品

圖： Greyhound Café

齋睇丸久小山園店內以木為主的設計已經好有和風感覺。店內供應多款茶，包括傳統的濃茶和薄茶，最啱愛茶一族。

抹茶甜品有軟雪糕、年糕紅豆湯等，不但食材全由日本直送抵港，就連製作方法都跟足日本本舖。

眾多款抹茶甜品中，小編最鍾意卷蛋糕，抹茶忌廉軟滑之餘仲有濃郁抹茶香，夾住蛋糕和舖面的抹茶粉一齊食，層次十分豐富，最啱下午茶慢慢歎。

加入抹茶系列！CRUMBS乳酪店強勢復活

CRUMBS終於返黎喇！主打的雪糕乳酪依然大大杯，Toppings配料亦落得相當大方，食到尾每啖都仲有toppings。

今次回歸帶來新口味，雪糕乳酪有原味、北海道抹茶、抹茶扭紋3款口味任君選擇；

Toppings除了最受歡迎的House Crumbs、糯米糍和新鮮水果外，亦有煙韌大福、香印青提、抹茶蛋糕、迷你馬卡龍等新配料。