最平$80就食到！4大豪華海鮮丼率先睇

要講到最「壓力山大」嘅，一定係「弘CHIRASHI」嘅「松葉蟹二段丼」（$288），大家平時見嘅丼飯都係一個碗裝住飯，而飯上面就有刺身或者肉類，但二段丼就係將丼飯分成上下兩層，上層鋪滿各類海鮮刺身，而下層就係刺身飯，份量大而且料多，真係要兩個人食先食得晒！呢度嘅「松葉蟹二段丼」份量都好大，同樣分上、下層，上層放蟹蓋，下層插蟹腳，一上枱就好似成隻蟹咁上枱，係威係勢！

上層係雜菜沙律同蟹蓋蒸蛋，蒸蛋混合蟹膏，膏香嫩滑，雖然蟹蓋好味，但小妹覺得上層得沙律，仍然遜色，如果可以係刺身就會好啲。而下層就係蟹肉蟹膏蟹籽飯，仲有一隻隻肉質飽滿嘅蟹腳同蟹膏三文魚籽帶子刺身，下層就相對吸引好多！不過價錢就稍貴，搞咁大壇嘢，收番咁上下價錢，差唔多啦！

電話：2861 3001／6170 7774

地址：灣仔灣仔道221A地下
營業時間：星期一至日: 12:00-15:00，18:00-23:00 

如果鍾意食蟹肉丼，而又想價錢合理嘅，小妹覺得「丼家」都好值得試，佢嘅「蟹皇丼」最能夠滿足一眾蟹迷，雖然冇成隻松葉蟹上咁豪華，但係啲蟹肉全部由人手拆出嚟，鋪滿丼飯，誠意十足，再加上蟹膏蟹籽，味道鹹香鮮甜，仲有幾隻蟹鉗畀你過吓手癮，都只不過係平民價$88，係抵食之選，問題係你要入元朗食囉！ 

另外仲有「特選嵐山壽司」，有齊劍魚腩、吞拿魚腩、三文魚腩、油甘魚、海膽、帆立貝、牡丹蝦、火炙左口魚，種類多，用料新鮮，Oishi呢！ 

電話：5541 0744

地址：元朗鳳攸北街2-6號永富閣地下14B號舖
營業時間：星期一至日: 12:00-15:30，18:00-22:30 

「三滝 Mitaki」可以話係日式丼物店中嘅快餐店，買嘢攞餐、斟茶遞水全部你一個人搞掂，丼物最快３分鐘出餐，可以話係方便又快捷。而價錢方面亦係「貼地級」，最貴都係$88，小妹嗌個「春日丼」，有四塊「頗」厚切三文魚同十片加拿大海膽，都只不過係$88，快餐講求平、靚、正、快，「三滝」可以話係達標嘅。

電話：2590 6666

地址：荔枝角長義街10號昌隆工業大廈地下2B號舖
營業時間：星期一至六: 11:30-15:00，16:00-21:00 

同樣位於元朗嘅「丼家和食」，同樓上介紹嘅「丼家」差兩個字，雖然唔知係咪有關係，但同樣都係值得推介之作。雖然小妹嗌咗個好普通嘅三文魚親子丼，但係就覺得小店別具心思，平時食親子丼，一般都係普通三文魚肉加三文魚籽，但小店就用半三文魚腩、半三文魚肉嘅組合，要知道三文魚腩比起普通瘦肉部分貴，但係個丼就賣$78，價錢一樣大眾抵食！ 

另外仲有「丼家招牌卷」等特色卷物，唔使淨係食丼咁Dry！ 

燒茄子 

芒果蟹籽沙律 

壽喜燒 

電話：2343 3881

地址：元朗教育路71-79號京都閣地下1號舖

營業時間：星期一至日: 12:00-15:00，18:00-22:30